حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

  : كلام جد 

حاول متاخدش حياتك بشكل شخصي.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الخميس 17 أغسطس 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

بلاش غوامق لا ف الهدوم ولا ف طريقة التفكير النهاردة خالص يابرنس

برج الحمل عملياً:

شيل معاك اي حاجة زرقا النهاردة ف جيبك إحتياطي عشان العكوسات والحسد عشان انتا جميل النهاردة.

برج الحمل صحياً:

بطل تفعص ف كل حاجة ف الأكل بصوابعك

إعرف توافق برج الحمل مع باقي الأبراج النهاردة

متوافق مع الرشاقة والجاذبية الطاغية مع حبة طيش

*****************************************************************************

إعرف حظك اليوم برج الثور الخميس 17 أغسطس 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

متمشيش عكس اتجاه الرياح النهاردة وخد بالك من ان حاجة واحدة.. مجرد تفصيلة صغننة النهاردة ممكن تبوظ مزاجك تماما..عشان انتا بتتلكك اساسا من جواك عشان تتقمص وتزعل من الحياة

برج الثور عملياً:

غني بصوت عالي النهاردة وانتا بتستحمى

برج الثور صحياً:

اليوم مناسب للطواجن والصواني والأكل اللي معمول بحب وإهتمام وف نفس الوقت مهم تتمشى بتاع ساعة كدة بدون هدف محدد

إعرف توافق برج الثور مع باقي الأبراج النهاردة:

متوافق مع الابراج المائية والبرمائية

*****************************************************************************

إعرف حظك اليوم برج الجوزاء الخميس 17 أغسطس 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

دافع عن مساحتك وعن حقك ف إمتلاك البراح والخيال الخاص بيك ضد اي حد بقوة ومتخافش

برج الجوزاء عملياً:

من حقك تسرح ف خيالك براحتك.. دي أكتر حاجة محدش يقدر ياخدها منك مهما عمل.. والنبي لما يتنطط زي القرد حتى..برضة مش هيعرف

برج الجوزاء صحياً:

حاول تاكل جزر وخس او اي حاجة بتخروش كتير النهاردة

تعرف على توافق برج الجوزاء مع باقي الأبراج النهاردة:

متوافق مع التفاح الاخضر

*****************************************************************************

إعرف حظك اليوم برج السرطان الخميس 17 أغسطس 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

متهربش وواجه مشاكلك يابيه..ثم بتهرب ليه اساسا

برج السرطان عملياً:

مينفعش تسيب سفينة حياتك بالمنظر دة وتخلع او تقعد وتحط ايدك على خدك وتقولك اعمل ايه اعمل ايه؟.. تعمل الصح حضرتك..وخد بالك..الصح دايما صعب.. بس ف الاخر النتيجة حلوة وتستاهل..اهم حاجة تشيل مسئولية افعالك

برج السرطان صحياً:

بطل تمثل انك ضحية ف كل موقف وانتا هتبقى زي الفل والصداع والمغص هيروحوا لوحدهم

تعرف على توافق برج السرطان مع باقي الأبراج النهاردة:

متوافق مع الابراج الهوائية والمائية

*****************************************************************************

إعرف حظك اليوم برج الأسد الخميس 17 أغسطس 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

بطل تذمر وإمارة فارغة ياعم الحاج

برج الأسد عملياً:

الإشمئناط اول طريق الإستعباط خلي بالك.. انتا محتاج تفرفش مش تنكد على نفسك وعلى الناس حواليك

برج الأسد صحياً:

محتاج تخرج ومحتاج تعمل اي نشاط مختلف شوية عن المعتاد.. روح مثلا مع اصحابك سايبر والعبوا حبة ولا قص شعرك ولا اصبغه ولا اي حاجة

تعرف على توافق برج الأسد مع باقي الأبراج النهاردة:

متوافق مع الخروج من القوقعة النفسية

*****************************************************************************

إعرف حظك اليوم برج العذراء الخميس 17 أغسطس 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

متبديش إعتراضك على كل حاجة بتشوفها النهاردة مهما كانت مقرفة او مش على مزاجك وعدي اليوم وفكر ف حاجة واحدة.. انتا هتخربها ف الاجازة

برج العذراء عملياً:

هتعمل حفلة وهتتنطط فوق الكنب والسراير وهتعمل حرب بالمخدات وهتنبسط وتزقطط وبس

برج العذراء صحياً:

تجنب التوم والبصل الليلة عشان احتمال..احتمال تتباس.. بس مش مؤكد لسة.

تعرف على توافق برج العذراء مع باقي الأبراج النهاردة:

متوافق مع البوسة..لو حصلت

*****************************************************************************

إعرف حظك اليوم برج الميزان الخميس 17 أغسطس 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

متبصش وراك..قدامك أهم بمراحل

برج الميزان عملياً:

النهاردة قدامك فرص كتير للإنبساط ولو طنشتها احتمال كبير تطلعلك حباية ف مناخيرك..ف خد بالك وحافظ على مناخيرك

برج الميزان صحياً:

متتحركش النهاردة كتير ووفر طاقتك للحاجات المهمة وبس..وشوف حد يعزمك على شاورمة

تعرف على توافق برج الميزان مع باقي الأبراج النهاردة:

متوافق مع الشاورمة

*****************************************************************************

إعرف حظك اليوم برج العقرب الخميس 17 أغسطس 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

متضربش حد بالطوب لا ف الحقيقة ولا ف أحلامك

برج العقرب عملياً:

كمان حاول متبانش تنافسي اوي النهاردة عشان متعملش مشاكل ف قفلة الاسبوع تبوظ اجازتك وحاول متنفسنش من حد برضة النهاردة وياريت متنكرش كل الكلام اللي فات دة وتقول مش مهتم عشان دة بيبقى دايما أكبر دليل على اهتمامك

برج العقرب صحياً:

ايس كريم ومانجا ودرة وبس

تعرف على توافق برج العقرب مع باقي الأبراج النهاردة:

متوافق مع الابراج اللي بتاخدك على قد عقلك وتحسسك انك ذكي ومسيطر وجميل

*****************************************************************************

إعرف حظك اليوم برج القوس الخميس 17 أغسطس 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

من حقك لما تحط حاجة ف حتة وتحتاجها ترجع تلاقيها.. بس المبدأ دة للأسف مبينطبقش على البشر.

برج القوس عملياً:

محتاج تسافر يومين ف اي حتة فيها بحر بشكل عاجل

برج القوس صحياً:

متقفش حيران فاتح باب التلاجة ومنكوش بالليل عشان دة فال مش كويس عليك

تعرف على توافق برج القوس مع باقي الأبراج النهاردة:

متوافق مع الشيكولاتة اللي تلاقيها ف التلاجة مستخبية..حلال عليك

*****************************************************************************

إعرف حظك اليوم برج الجدي الخميس 17 أغسطس 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

شيل ف جيبك النهاردة زلطة صغننة شكلها حلو.. هتحتاجها بعدين.

برج الجدي عملياً:

ركز ف شغلك وبلاش رغي مالوش لازمة ف الفاضية والمليانة

برج الجدي صحياً:

صحتك كويسة بس محتاج تجري حبة ولو ف خيالك نص ساعة على الاقل عشان تنشط الدورة الدموية خصوصا بعد الاكل وانتا مقيل ونايم

تعرف على توافق برج الجدي مع باقي الأبراج النهاردة:

متوافق مع الابراج الترابية والهوائية

*****************************************************************************

إعرف حظك اليوم برج الدلو الخميس 17 أغسطس 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

حب براحتك محدش له عندك حاجة..ولا تبرير ولا شرح ولا اي حاجة اصلا

برج الدلو عملياً:

حاجتين انتا مبتحبهمش ابدا ولا بتستحملهم مهما كان.. الناس اللي بتعقد كل حاجة.. والناس اللي فاكرة نفسها عارفة كل حاجة

برج الدلو صحياً:

طز ف الاتنين وفرفش النهاردة وركز ف المزيكا والنوم والرقص والانبساط ومتردش على اي مكالمات ملهاش عازة من اي نوع.

تعرف على توافق برج الدلو مع باقي الأبراج النهاردة:

متوافق مع الرغبة ف الحب..ياحنين

*****************************************************************************

إعرف حظك اليوم برج الحوت الخميس 17 أغسطس 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

بتخش حياة الناس اللي حواليك فجأة وبتختفي برضة فجأة ودة عاملك ازمة معاهم عشان هما فاكرينك مصلحجي وانتا فاكرهم عاوزينك تبقى على مزاجهم..سوء التفاهم دة بيضيع وقت كتير

برج الحوت عملياً:

عاوزينك تبقى على مزاجهم..سوء التفاهم دة بيضيع وقت كتير.. بجانب انك بتحب تحب وتتحب بس بتخبي دة بشكل مبالغ فيه ليه؟..

برج الحوت صحياً:

خايف من ايه مش فاهم.. محدش هيحسدك متخافش ياخويا.

تعرف على توافق برج الحوت مع باقي الأبراج النهاردة:

متوافق مع الحب ف السر

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.