حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

  : كلام جد 

تخيل عالم معاكس لينا ف كل حاجة..كل الصح بتاعنا غلطهم والغلط بتاعهم صحنا.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأربعاء 16 أغسطس 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

إختار تبقى متسامح مش غلاوي وكياد..الغل والكيد بيستنزفوا الطاقة وانتا محتاج الطاقة دي اليومين دول عشان تعرف تصمد وتواجه وتكمل وتقف على رجليك بقوة ميهزهاش ريح ولا طوفان حتى

برج الحمل عملياً:

انتا قوي وهتنجح وهتعدي وهتكبر ..ثق ف كدة كويس جدا جدا

برج الحمل صحياً:

متضيعش الطاقة والكالوريز اللي ياما ضيعت ليالى بتحوشها من مصادرها الطبيعية ف الاكل والنوم ف الفراغ..انتا اذكى من كدة

إعرف توافق برج الحمل مع باقي الأبراج النهاردة

متوافق مع الصمود والتحدي والرغبة ف النجاح والسماح وبكرة اجمل مليون مرة من اللي راح

*****************************************************************************

إعرف حظك اليوم برج الثور الأربعاء 16 أغسطس 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

عاطفيا انتا ف البليلة وغالبا في عندك مشاكل عاطفية عشان عندي وبتركب دماغك وانتا عارف دة كويس

برج الثور عملياً:

اتحداك تقف ف البلكونة بالليل وتغني بصوت عالي للقمر والنجوم قدام الجيران

برج الثور صحياً:

صحتك كويسة بس نفسيا في مخاوف وقلق مضايقك ومش مخليك عارف تنام بعمق..سواء بتفكر ف بكرة ولا بتفكر ف امبارح مش مهم..المهم انك تركز ف الخرفان اللي لازم تعد فيها وهي بتنط من على السور عشان تعرف تنام..بس كدة

إعرف توافق برج الثور مع باقي الأبراج النهاردة:

متوافق مع الزغزغة بس بالعقل وبالراحة

*****************************************************************************

إعرف حظك اليوم برج الجوزاء الأربعاء 16 أغسطس 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

بيبقى عندهم فصام رسمي نظمي فهمي وبينتقدوك..عالم ملهاش عازة والله ولا تشغل بيهم بالك..انتا جميل وكفاية انك انتا تبقى عارف انك جميل وبس

برج الجوزاء عملياً:

اللي مش عاجبه تكوينك يورينا مايثبت انه سوي نفسيا او ف ليصمت ويولع بجاز..نفسيا برضة

برج الجوزاء صحياً:

تغطس ف البانيو ساعة وتدلع نفسك ف مزيكا وترقص وتنبسط وتفكك من اي احكام او كلام من اي حد ايا كان

تعرف على توافق برج الجوزاء مع باقي الأبراج النهاردة:

متوافق مع قلبك

*****************************************************************************

إعرف حظك اليوم برج السرطان الأربعاء 16 أغسطس 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

انزل إتدنجل حبة وشارك ف الزحمة ف الشوارع..هي جت عليك يعني

برج السرطان عملياً:

اتشعبط ف حلمك على قد ماتقدر النهاردة مهما حصل ومهما سمعت ومهما شوفت

برج السرطان صحياً:

صحيا انتا كويس بس نفسيا محتاج شوية فرفشة ونعنشة..محتاج تضحك بصوت عالي ومحتاج تبطل نكد

تعرف على توافق برج السرطان مع باقي الأبراج النهاردة:

متوافق مع الابراج اللي تعرف تفرفشك وتنعنشك

*****************************************************************************

إعرف حظك اليوم برج الأسد الأربعاء 16 أغسطس 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

مفاجئة منعشة ف المساء..يابختك

برج الأسد عملياً:

متقفش على ناصية الحلم وتقاتل..بلاش كلام فاضي..ناصية الحلم النهاردة مش مكان امان

برج الأسد صحياً:

متضيعش وقتك بتحاول تثبت انك زي الفل وصحتك كويسة..طالما تعبنا يبقى تكشف ومن سكات كدة ومن غير مقاوحة..دي صحتك مش اي كلام يعني

تعرف على توافق برج الأسد مع باقي الأبراج النهاردة:

متوافق مع الرغبة ف العند

*****************************************************************************

إعرف حظك اليوم برج العذراء الأربعاء 16 أغسطس 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

العقل طول الوقت خطر والجد طول الوقت شيئ ممل

برج العذراء عملياً:

احنا مش موظفين ف الحياة حضرتك خالص..إمرح وإنبسط حبة براحتك..بس من غير ماتضايق حد

برج العذراء صحياً:

النهاردة انتا محتاج مشاعر مش أكل عشان صحتك تبقى كويسة..قلبك محتاج ياكل حبة حب يعني

تعرف على توافق برج العذراء مع باقي الأبراج النهاردة:

متوافق مع الابراج كله بدبلوماسية نادرة

*****************************************************************************

إعرف حظك اليوم برج الميزان الأربعاء 16 أغسطس 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

بلا عواطف بلا بتاع..النهاردة عاوز حركة ونشاط وشغل ولعب وحبة حب ف الاخر.. مش أكتر من كدة

برج الميزان عملياً:

أجر عجل النهاردة وإتفسح بيه حبة مع أي حد لطيف من اصحابك المهم يكون من ذوي الطاقة العالية وميفهيصش منك بعد ربع ساعة ويخنقك ويبوظلك اليوم

برج الميزان صحياً:

مهم تفضل تورّ طول اليوم ومتديش نفسك فرصة للركود او الهدوء او الصمت او السكون..إوعاك ثم ف إوعاك..لو ركنت هتفكر افكار سودة وهتسرح ف المجهول..اشغل نفسك بالحركة وبالشغل وبالابداع وبس

تعرف على توافق برج الميزان مع باقي الأبراج النهاردة:

متوافق مع نفسك ودي احلى حاجة ممكن تحصلك ف الصيف

*****************************************************************************

إعرف حظك اليوم برج العقرب الأربعاء 16 أغسطس 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

محتاج تتدلع وتسمع كلام حلو ..بس مش الكلام اللي ف دماغك ابدا..مجرد كلام حلو وبرئ

برج العقرب عملياً:

محدش يوشوشك النهاردة ف ودنك خالص ولا يقولك تعمل ايه ومتعملش ايه..انتا حر زي الطير ف السما

برج العقرب صحياً:

تقدر تكمل ف الدايت بشدة وبعنف..اهم حاجة تاكل كويس وتنام كويس ومهم تحلم بالليل حتى ولو وانتا صاحي

تعرف على توافق برج العقرب مع باقي الأبراج النهاردة:

متوافق مع الابراج الهوائية والترابية بس مع الهوائية أكتر بمراحل

*****************************************************************************

إعرف حظك اليوم برج القوس الأربعاء 16 أغسطس 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

هتسمع كلام حلو ف التليفون من حد بيحبك او معجب بيك..حاول متقعدش تضحك وتتريق عليه وتبعده

برج القوس عملياً:

اللي مسافر جوة نفسه صعب يحس بالإنتماء لأي مكان مهما سافر او لف او اتحرك

برج القوس صحياً:

صحتك هتيجي علي الحب النهاردة مش على الخناق خالص وخصوصا لو الخناق دة مع نفسك مش مع حد تاني

تعرف على توافق برج القوس مع باقي الأبراج النهاردة:

متوافق مع نظرات الإعجاب ف عيون اللي بيحبك

*****************************************************************************

إعرف حظك اليوم برج الجدي الأربعاء 16 أغسطس 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

انتا المسئول الاول والاخير عن احلامك مش اي حد تاني

برج الجدي عملياً:

افتح دولاب نفسيتك وإرمي وكسر كل الشماعات اللي بتعلق عليها بطء إيقاعك وأوهامك وفشلك

برج الجدي صحياً:

كفاية ندب ياحبيبي عشان مش حلو عشان صحتك..بص قدامك مش وراك..زي ماخسرت ف اللي فات هتكسب ف اللي جاي كتير جدا متقلقش

تعرف على توافق برج الجدي مع باقي الأبراج النهاردة:

متوافق مع الابراج المائية والبرمائية

*****************************************************************************

إعرف حظك اليوم برج الدلو الأربعاء 16 أغسطس 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

قلبك مزقطط ودي أهم حاجة حصلتلك او هتحصلك ف حياتك..إستمتع

برج الدلو عملياً:

متحاولش تبهر حد ومتوجعش دماغك..مش مهم حد يفهم انتا بتفكر إزاي لأن كل واحد ف الاخر عاوز الدنيا مراية لجمال شخصيته وروعة تكوينه وبس

برج الدلو صحياً:

إكتفي بنفسك أحسن بلا وجع دماغ من بشر اقل مايوصفوا بيه انهم بشر بلاستك..انشغلوا بالدعاية لنفسهم ونسيوا ان مفيش جواهم اصلا حاجة لحد

تعرف على توافق برج الدلو مع باقي الأبراج النهاردة:

متوافق مع ادراك ان البشر مش فتارين إزاز

*****************************************************************************

إعرف حظك اليوم برج الحوت الأربعاء 16 أغسطس 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

خليك مع اللي يثق ف سواقتك لكل حاجة وينبسط بيها مش مع اللي يمثل انه سواقك الخصوصي لحد ماياخد منك العربية ويهبأ وتقعد انتا لوحدك من غير حاجة توصلك لأي حتة ولأي حد تاني غيره

برج الحوت عملياً:

اليوم مناسب لسماع اغاني عمرو دياب ولحبة دلع من حد بيحبك

برج الحوت صحياً:

الضحك علاج للحزن الدفين ف الانسان.. والأكل بالليل كمان بيعتبر علاج للحزن والإكتئاب برضة و لو مبطلتش تحاول تبين الناس كلها مبتفهمش عشان تبان انتا بس اللي بتفهم مس هيحصلك كويس من الحياة..عموما انتا حر

تعرف على توافق برج الحوت مع باقي الأبراج النهاردة:

متوافق مع الشفقة على نفسك وبس محدش عارف ليه

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.