معظم التوقعات بعد حلقة المعركة في Game of thrones كانت إننا هنبقى قدام حلقة هادية.. تمهيدا للمعارك الجاية بقى.. ويمكن الاعتقاد دة صح في حاجات كتير ف الحلقة الخامسة.. لكن في نفس الوقت الفانز الهارد كور كانوا على أعصابهم من الأحداث والاسرار اللي الحلقة كشفتها ولو بتلميح من بعيد لبعيد.

نبدأ الأول بالمشهد بعد المعركة..دنيريس مش بتضيع وقت وبتقتل راندل تارلي وابنه بعنف..رغم نصايح تيريون.. المشهد كان بيناسب الشخصية تماما.. دنيريس العنيدة بطابعها وراندل تارلي اللي الدنيا عنده أبيض وأسود زي شخصيته في الرواية تقريبا.. وعشان كدة رد فعله وهو بيمسك ايد ابنه ديكون كان مؤثر.. لأنه شخصية مش "فريندلي" بطبعه وغالبا كان صارم لدرجة القسوة مع ابنه التاني سام.

من أجمل المشاهد في الحلقة برضه كان تصرف جون مع التنين دروجون.. بيطبطب عليه كأنه كلب أو حصان.. تحس إنه جاي من فيلم How to train your dragon.. لكن برضه المشهد كان إشارة واضحة.. جون من عيلة تارجاريان زيه زي دنيريس حتى لو محدش يعرف.. كمان لقطة كوميدية خفيفة لما بتسأله إن كانت التنانين شكلها حلو وبيغير رأيه فجأة من الخضة.

بعد ما كنا زهقنا من دور ليتل فينجر الموسم دة لأنه مش بيعمل حاجة تقريبا.. أخيرا شوفنا مؤامرة جديدة بينفذها.. هي طبعا إنه بيوقع بين آريا وسانسا.. الاتنين اخوات علاقتهم ببعض مش كويسة في أحسن الأحوال لكن لأول مرة في المسلسل كله يمكن يكونوا متفقين شوية.. وعشان كدة المشهد بتاعه كله عبارة عن مؤامرة ازاي يخلي العلاقة تولع تاني.. آريا اتعلمت كتير في Game of thrones أكتر من الرواية لكن لحد دلوقتي متعاملتش مع حد في خطورة ليتل فينجر.. اللي في الحلقة دي بتعرف قد إيه هو تفكيره واسع.. والحيلة بتاعته هنا هي رسالة قديمة من الموسم الأول.

جيندري كمان رجع أخيرا بعد اختفاء كام موسم.. وبعد توقعات كتير إنه مش راجع أصلا.. لكن المرة دي شخصيته مختلفة.. أكبر سنا وعارف مين عدوه بس المشكلة إنه متحمس للمغامرة من غير ما يعرف مين هو عدوه أصلا.. عامل زي أبوه بالظبط.. حتى بيستخدم نفس السلاح.

كمان من اللقطات اللي فيها نوستالجيا تشبيه روبرت براثيون وتشبيه جون سنو بنيد ستارك والمشهد شبه الموسم الأول تقريبا الفرق إن جون هو الملك وابن الملك مجرد مساعد.

أما أكبر مفاجأة في الحلقة ف السخرية هنا إنها جاية ف تفصيلة صغيرة في مشهد لشخصيات جانبية.. جيلي وهي بتقرا كتاب مع سام وبتسأل يعني إيه طلاق.. دة للي تابعو Game of thrones في أخر الموسم السادس عندهم شك هل جون سنو ملك شرعي ولا مجرد ابن غير شرعي.. وايه بالظبط علاقة ليانا ستارك وريجار تارجاريان .. سطر واحد بس في الحلقة حل اللغز وبطريقة عايزة متابع متحمس.

قفلة الحلقة كانت لذيذة .. شلة أبطال كلهم تقريبا بيكرهوا بعض لسبب أو اتنين.. لكن المنظر ف النهاية هو ان عندك مجموعة أبطال في مهمة انتحارية.. ازاي تصطاد زومبي.. المشهد زي ما ناس كتير وصفته على الانترنت suicide squad .. وهي دي فعلا الحاجة اللي تعتبر تمهيد المعارك الجاية.