حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

: كلام جد تاني

الحب بيخسس طبعا.. بيخلي الواحد يحس انه خفيف.. ماشي طاير من فوق الارض.. بيخسسه ف روحه.. بيخف من عليه تقل همومه.. بيديله طاقة وأمل يطير ويتحدى سجن الجاذبية مهما كان وزنه.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأحد 13 أغسطس 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

انتا عمود قوي مهم لإرتكاز اساسي مستقر للطرف التاني ف اي علاقة بتخشها ف حياتك..الناس بتتسند عليك ودة متعب طبعا..انتا نفسك تتسند حبة على اي حد يطمنك ويحسسك بالأمان بس مش قادر تعترف..من جواك عاوز دة..بس من براك بتقاوح وتقاوم عشان متبانش ضعيف

برج الحمل عملياً:

مهم تعرف نفسك كويس قبل ماتعرف اي حد تاني او قبل ماتسيب اي حد تاني يعرفك..اعرف نفسك كويس واعرف هي فعلا عاوزة ايه وبعد كدة اتعامل مع الناس..مش تعيش تايه وسطهم مستني حد منهم يساعدك ويقولك تحديدا انتا محتاج ايه والمفروض تعمل ايه..اسئلتك زي ماهي جواك برضة اجوبتها كلها جواك..دور كويس بس

برج الحمل صحياً:

لو عرفت نفسك بشفافية وبشكل كامل هتصاحبها ومش هتحتاج حد اصلا ف حياتك غيرها يبقالك ونس ودة معناه انك قريب مش هتكون لوحدك تاني

إعرف توافق برج الحمل مع باقي الأبراج النهاردة

متوافق مع كل الحاجات الحلوة اللي جاية ف طريقك قريب ان شاء الله

*****************************************************************************

إعرف حظك اليوم برج الثور الأحد 13 أغسطس 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

عاطفي بشكل نرجسي النهاردة ومش حابب تيجي على نفسك عشان حد مهما كان..قشـطة انتا حر

برج الثور عملياً:

واخرتها ايه معاك جننتنا حضرتك..ماتثبت على حال..مش على بعضك ليه؟

برج الثور صحياً:

واضح انك بتمر بحالة من حالات التقلب والشقلبة النفسية ذات الكيرف العالي والامواج الهادرة..ربنا يوفقك وتنجح وتقب متغطسش

إعرف توافق برج الثور مع باقي الأبراج النهاردة:

متوافق مع الابراج اللطيفة اللي تقدر حالتك وتساعدك تتخطاها..مش تقف تتريق عليك او تعاديك

*****************************************************************************

إعرف حظك اليوم برج الجوزاء الأحد 13 أغسطس 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

مزقطط ومبسوط من جواك..حقك بصراحة اليومين دول تنبسط وتجهز لانبساط اكبر واعظم واشمل ومن كل اتجاه

برج الجوزاء عملياً:

متخشش ف بيزنس مع اصحابك او اهلك اليومين دول عشان دي حاجة اثبتت فشلها الذريع وقدرتها على افساد العلاقات ف تاريخ الحضارة البشرية كلها

برج الجوزاء صحياً:

محتاج تاكل خضار كتير وفاكهة وبالليل لما تجوع حاول تنقنق ف اي حاجة مفيدة ومغذية ومفيهاش كالوريز كتير.. يعني متضربش كوارع او سندوتشات مكرونة.. ابسلوتلي مينفعش

تعرف على توافق برج الجوزاء مع باقي الأبراج النهاردة:

متوافق مع سندوتشات المكرونة

*****************************************************************************

إعرف حظك اليوم برج السرطان الأحد 13 أغسطس 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

حاسس انك محتاج تنعزل وتتقوقع..تقوقع براحتك محدش له عندك حاجة ومن حق اي حد يتقوقع براحته

برج السرطان عملياً:

حاسس بقلة الثقة ف نفسك بسبب موقف ما او شخص سخيف..فكك..متستخباش من الحياة اكتر من يوم واحد بس

برج السرطان صحياً:

هتستخبى من الناس يوم تشحن فيه وترجع ترازي من رازاك وبثقة وهدوء تام ومن تحت لتحت

تعرف على توافق برج السرطان مع باقي الأبراج النهاردة:

متوافق مع التقوقع ومع الناس اللي بتعرف تحط آي لاينر صح من اول مرة

*****************************************************************************

إعرف حظك اليوم برج الأسد الأحد 13 أغسطس 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

إستعد عشان هتشهد جلسة صلح نفسية كبيرة مهمة مابين قلبك وعقلك النهاردة..حاول متتدخلش عشان متولعش المسائل زيادة..اقعد اتفرج وملكش دعوة

برج الأسد عملياً:

يابختك بجد بعقلك وقلبك..حاجة مفرحة وجميلة فعلا انهم بيقدروا يصفوا خلافاتهم وف الاخر الاتنين بيشتغلوا عشان مصلحتك..ربنا يخليهملك

برج الأسد صحياً:

انا لو منك اعملف بارتي كبيرة جدا بالعند ف الجو وف الناس وف الحياة بشكل عام

تعرف على توافق برج الأسد مع باقي الأبراج النهاردة:

متوافق مع الرغبة ف كيد العالم بفرحتك المصطنعة

*****************************************************************************

إعرف حظك اليوم برج العذراء الأحد 13 أغسطس 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

انتا نفسك مش فاهم نفسك ف مابالك باللي حواليك..هيفهموك ازاي تفتكر؟

برج العذراء عملياً:

حساس بزيادة النهاردة ولكن خد بالك ان في ناس كتير شايفاك شخص يعتمد عليه ف متخليش حساسيتك النهاردة تفسد حالة الثقة دي لأنها بصراحة كنز كبير..بس ممكن تطنشه لو عاوز مش ازمة متقلقش

برج العذراء صحياً:

محتاج تراعي قولونك عشان الجو كله رطوبة وبالتالي هيبقى في قلق من وجع البطن ومن صعوبة التنفس..ف ياريت متبوظش الدنيا زيادة بأكل دسم بزيادة..بلاش

تعرف على توافق برج العذراء مع باقي الأبراج النهاردة:

متوافق مع الابراج الترابية والهوائية

*****************************************************************************

إعرف حظك اليوم برج الميزان الأحد 13 أغسطس 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

كل حاجة كويسة ومش لاقي حاجة تشتكي منها ودة غالبا مضايقك طبعا دي حاجة معروفة

برج الميزان عملياً:

الصح انك تستغل الظروف دي وتلمع وسط الناس بعقلك وجمال شخصيتك وقوة تأثيرها الإيجابي السحلابي السنجابي على اللي حواليك

برج الميزان صحياً:

معقول حد يزعل عشان مش لاقي حاجة يعمل عليها مناحة بذمتك ياشيخ؟

تعرف على توافق برج الميزان مع باقي الأبراج النهاردة:

متوافق مع الرغبة ف التألق

*****************************************************************************

إعرف حظك اليوم برج العقرب الأحد 13 أغسطس 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

مبسوط وشبعان نفسيا وكل حاجة ماشية سموزلي زي السكينة ف الحلاوة

برج العقرب عملياً:

طبعا انتا مصدقتش الكلمتين اللي فوق دول..مش كدة؟

برج العقرب صحياً:

طالما مصدقتش الكلام اللي فوق يبقى مش هتصدق الكلام اللي هيبقى تحت..دة شيئ بديهي

تعرف على توافق برج العقرب مع باقي الأبراج النهاردة:

متوافق مع الرغبة ف أكل الحلويات بشراهة

*****************************************************************************

إعرف حظك اليوم برج القوس الأحد 13 أغسطس 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

فرحان بنفسك النهاردة وكمان بتكابر ف حاجات مفيش مجال للمكابرة فيها..قشطة..براحتك..من حقك برضة تعيشلك يومين حاسس فيهم بنفسك بس ياريت ميكونش في اعراض جانبية للفرحة دي تتضمن خسارة اشخاص بتحبك او بتحترمك وتقدرك او التلات حاجات دول مع بعض..انتا اكبر من كدة بمراحل..ف عيب

برج القوس عملياً:

ابعد عن اللون الاحمر ف كل حاجة

برج القوس صحياً:

محتاج تكبر بنفسيتك عن الصراع اللي داير حواليك عشان متلاقيش نفسك عيان فجأة

تعرف على توافق برج القوس مع باقي الأبراج النهاردة:

متوافق مع سندوتشات الكبدة والسجق

*****************************************************************************

إعرف حظك اليوم برج الجدي الأحد 13 أغسطس 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

رايق وف حالة سلم مع نفسك..يابختك

برج الجدي عملياً:

حاول تتجنب التعامل مع اي شخص ممكن يكون مفسد للمود الثمين دة

برج الجدي صحياً:

كل ماتتضايق بالليل اعمل فشار..مش اطلب بيتزا ديليفري..اعمل فشار وبس

تعرف على توافق برج الجدي مع باقي الأبراج النهاردة:

متوافق مع الابراج الهوائية والبرمائية

*****************************************************************************

إعرف حظك اليوم برج الدلو الأحد 13 أغسطس 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

مرتبك حبة ومش منظم بس منتج وجدا واكتيف اخر تلات حاجات ودي مجرد بداية بس..لسة الطاقة العالية كهربا جاية ف الطريق وهيبقى في رعد وبرق ف عز الصيف بسببك

برج الدلو عملياً:

حاول تركز عشان تفلح وياريت متمضيش لحد كمبيالات نفسية او عاطفية النهاردة بدون داعي..لو في داعي قشطة بس لو مفيش ياريت متتبرعش وتتحمس اوي وترجع تقول ايه ده..ايه اللي انا عملته دة..بلاش

برج الدلو صحياً:

صحتك كويسة انتا بس محتاج تنام وتظبط مواعيد اكلك ونوعيته حبة وتكمل اهتمام بنفسك وتتجنب الرطوبة الفظيعة اللي محدش عارف هي عاوزة مننا ايه بالظبط

تعرف على توافق برج الدلو مع باقي الأبراج النهاردة:

متوافق مع الابراج اللي مبتاخدش هزارك على صدرها

*****************************************************************************

إعرف حظك اليوم برج الحوت الأحد 13 أغسطس 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

متتخانقش النهاردة مع اللي بتحبه على اسباب تافهة لمجرد انك عاوز تسيطر عليه وخلاص عشان حران ومش عارف تتنفس..بلاش..هتندم..التلاكيك دي اخرتها وحش صدقني

برج الحوت عملياً:

متتعاملش مع الناس على انك بلطجي ومبيهمكش عشان انتا عارف زي مانا عارف انك غلبان جدا وهش من جواك جدا جدا..ف على ايه..تعويرة الوش مفيهاش معلش

برج الحوت صحياً:

اتمنى تكون فكيت العمل اللي معملولك دة علي خير عشان تعرف تنبسط وتفرفش بدل المود العنيف اللي مسيطر عليك النهاردة دة محدش عارف ليه

تعرف على توافق برج الحوت مع باقي الأبراج النهاردة:

متوافق مع صورتك وانتا صغير

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.

اعلان حظك اليوم
اعلان حظك اليوم