دلع ودنك معانا مع بلاي ليست محمد حمام 

ودنك هي حلقة الوصل بينك وبين العالم.. يعني لازم تهتم بيها وتقدرها أكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية.. وبما إن مهمتنا هي إسعاد ودان كوكب الأرض.. ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف أكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك..

النهاردة إحنا غطسنا في قاع الهامور وطلعنا برائد الغنا النوبي الفنان محمد حمام 

معلومات ع السريع عن محمد حمام 

بالرغم من المشوار الفني الكبير لمحمد حمام إلا أنه مشهور بأغنيتين هما "الليلة يا سمرا" و"يابيوت السويس" اللي كتبهاله صاحب عمره  عبد الرحمن الأبنودي.. حمام والأبنودي إشتغلوا مع بعض في أكتر من عمل فني.. وغنى حمام لأشهر شعراء مصر في الستينات والسبعينات زي حسن نشأت وفؤاد حداد وعبد الرحيم منصور وسمير عبد الباقي.. دة غير الملحنين التقال زي محمد الموجي والطويل.. بس التشتت اللي كان فيه حمام مابين شغله الوظيفي والفن خلاه ميخدش المكانة اللي يستحقها من الشهرة والنجومية..وفي أواخر شتا 2007 ودع حمام الدنيا وإتنقل بطيارة عسكرية من القاهره لبلده أسوان ويومها ضربت المدفعية 21 طلقة تكريما ليه وتنكس علم محافظة السويس 3 تيام حداد على روح المطرب اللي غنى أشهر أغنية في تاريخ السويس.. نسيبكم بقى مع الـ بلاي ليست.. إستمتعوا