حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد:

أكيد اللي كان ف حياة سابقة تفاحة ولا خوخاية مش هيبقى زي اللي كان بتنجاناية ولا كوساية ولا جزراية..إيش جاب لجاب.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل السبت 29 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

بلا عواطف بلا بتنجان..انتا محتاج تنزل سايبر وتهري نفسك لعب وجيمز لحد ما تزهق او تتعب وتنام

برج الحمل عملياً:

الغضب حماقة والشماتة امرأة لتاتة(كثيرة الكلام يعني وبتحكي ف المحكي طول الوقت بدون اي معلومة جديدة او مفيدة)..ف ابتعد يابني عن اي حد معداش ف حياته على لعبة جاتا..(جي تي ايه يعني)..عشان غالبا مش هيفهم انتا ليه عاوز تهرب من كل حاجة ومن اي حاجة النهاردة

برج الحمل صحياً:

سنانك بيضا ماشاء الله ودة بيدعم جمال ابتسامتك..اللي هي جزء اصيل من جمالك العام

إعرف توافق برج الحمل مع باقي الأبراج النهاردة

متوافق مع الابراج الترابية والهوائية واي حد بيعرف يلعب جيمز

*****************************************************************************

إعرف حظك اليوم برج الثور السبت 29 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

لما تحس بالملل امشي من سكات..متتعبش حد معاك ومتوجعش دماغك ف تبريرات ملهاش لازمة..انتا زهقت خلاص..امشي من سكات

برج الثور عملياً:

إعتمادك على التكنولوجيا هيجيب ضرفها ان شاء الله..حاول تبطل الموضوع دة حبة عشنا هيتعبك فعلا مستقبلا..اتحرك واستغل طاقتك ف افادة نفسك بنفسك

برج الثور صحياً:

حاول تتقبل كونك بطوط ف نفسك النهاردة

إعرف توافق برج الثور مع باقي الأبراج النهاردة:

متوافق مع الملوخية ومع السبانخ

*****************************************************************************

إعرف حظك اليوم برج الجوزاء السبت 29 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

في تهور كدة ف الاجواء وفي نوع من انواع التدبير للمصايب الصغننة الجميلة..اما نشوف بتدبر لإيه ولمين بالظبط..ثم انتا بتحب بقالك فترة وبتتحب..مالك بقى..مش على بعضك ليه

برج الجوزاء عملياً:

خللي بالك وانتا سايق نفسيتك بالليل على الطريق الصحراوي للوحدة..وركز ف انك مش لوحدك ..طالما بتتحب تبقى مش لوحدك ابدا..إتطمن

برج الجوزاء صحياً:

محتاج تشرب عصير كتير جدا ومحتاج تدلع جسمك ف بابل باث حلو كدة كله فقاقيع وصابون ومعطرات

تعرف على توافق برج الجوزاء مع باقي الأبراج النهاردة:

متوافق مع الثقة ف الحب

*****************************************************************************

إعرف حظك اليوم برج السرطان السبت 29 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

بتتمسكن لحد ماتتمكن وبعد كدة بتقلب الترابيزة بالمشاريب على نفسك وبتفتكر انك كدة شخصيتك قوية..حاجة عجب بصراحة

برج السرطان عملياً:

متتخانقش مع حد ومتعضش حد ومتضربش حد بفازة على دماغه..خليك كيوت وجميل احسنلك

برج السرطان صحياً:

الدايت مهم طبعا..بس مش من حق حد يعلق على وزنك او شكلك النهاردة..انتا حساس حبة تجاه الموضوع دة

تعرف على توافق برج السرطان مع باقي الأبراج النهاردة:

متوافق مع اللون الازرق واللون الاحمر ومع الابراج النارية

*****************************************************************************

إعرف حظك اليوم برج الأسد السبت 29 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

ابتسامتك سلاح النهاردة مهم تستخدمه بشكل كويس..حاول متلعبش حواجبك لحد بس مع الابتسامة عشان متتفهمش غلط

برج الأسد عملياً:

هتظهرلك النهاردة فرصة تقدر تعمل فيها عمل بطولي نادر ومؤثر وقوي..حاول تتصرف بحكمة ف الفرصة دي عشان مينتهيش بيك الامر واكل علقة اوف أ لايف تايم..وتطلع سليم..نتمنالك كدة

برج الأسد صحياً:

طول مانتا مقتنع انك سوبر هيرو من جواك هتبقى كويس ومفيش مشكلة ف كدة ابدا..بس خلي بالك..مفيش سوبر هيرو بياكل طبيخ متسبك بصلصة ع الغدا ولا بيعض ف بصلاية مع الفول الطعمية الصبح ع الفطار..هيبقى سوبر هيرو عنده حموضة علاطول مفيش كلام ومش هيعرف لا يطير ولا يحارب الاعداء..خليك مع البطاطس النهاردة حبة

تعرف على توافق برج الأسد مع باقي الأبراج النهاردة:

متوافق مع البطاطس الصوابع والبطاطس المهروسة بالبقدونس وبالزبدة

*****************************************************************************

إعرف حظك اليوم برج العذراء السبت 29 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

الحب مفيهوش نام ولا عقل ولا منطق يافندم..وانتا عارف كدة كويس جدا..عموما انتا حر..حابب تتفرج على السعادة وهي معدية من قدامك وناكشة شعرها ومش معبراك انتا حر..حياتك وانتا حر فيها فعلا..احنا مالنا

برج العذراء عملياً:

لازم تنام كويس وتحلم عشان لما تقوم تبقى فايق وكويس برضة..ومهم جدا متتعاملش برسمية النهاردة مع حد وتخليك قريب كدة وتركن اللؤم حبة على جنب عشان ربنا يكرمك ف عيشتك خصوصا واننا اخر الشهر

برج العذراء صحياً:

قلة النوم حاجة مش كويسة طبعا..ولا كتره بصراحة برضة..ف الحل ان الواحد يقسم وقته كويس بحيث ينام ساعة كل تلات ساعات..دة الحل الامثل ول حابب تجرب الكسل اللي بجد واللي بتحلم بيه

تعرف على توافق برج العذراء مع باقي الأبراج النهاردة:

متوافق مع تسقية البسكوت ف الشاي

*****************************************************************************

إعرف حظك اليوم برج الميزان السبت 29 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

مشاعرك متقلبة زي موج البحر النهاردة ودة راجع لانك غالبا يابتحب يابتتحب بقالك فترة وكالعادة صعبان عليك تبقى مستقر ف بتحاول تدور على اي حاجة تعمل منها منكاش تنكش بيه ف كوم النكد..كالعادة يعني..ابعد يابني عن النكد ومتدورش عليه..كفاية هو بيدور علينا كلنا صباح ومسا وبلا اي نية كويسة

برج الميزان عملياً:

دايما إعمل مصايبك بثقة..ليه بقى؟..عشان انتا كدة كدة هتعملها ومفيش حد ولا حاجة ممكن تقنعك بالعكس..بالتالي الافضل لما تعمل المصيبة من دول تعملها وانتا واثق كدة ف نفسك ومستمتع

برج الميزان صحياً:

محدش يقدر ياخد منك سعادتك او احساسك بالكرامة وبالقيمة العالية الجميلة..انتا جميل وهتفضل جميل لو حافظت على دة ف حياتك..ولو بعدت عن السندوتشات اللي بتهربها لنفسك من ورا الكل بالليل دي برضة

تعرف على توافق برج الميزان مع باقي الأبراج النهاردة:

متوافق مع حقك ف الحياة لتاني يوم ومع المزيكا..تحديدا البيانو

*****************************************************************************

إعرف حظك اليوم برج العقرب السبت 29 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

الاستدعاء الدرامي للذكريات مش هيفضي لأي نتيجة كويسة الا اذا كنت جاهز بسلاح مناسب مكون من الفرحة ف اخر اليوم..غير كدة متقلبش ف اللي فات تحت دعاوي..الرغبة ف الحسم او تنضيف العقل..حسم ايه يادلعدي اللي بتدور عليه مانتا زي الفل اهو

برج العقرب عملياً:

العقل مبيتنضفش ولا بيترتب..العقل مش مكتبة برفوف عليها كتب..ثم مسيرك تعرف ان كراكيبه احلى مافيه اصلا..مسيرك تعرف وتفهم دة كويس

برج العقرب صحياً:

في حد حلو هيجيبلك ايس كريم النهاردة..حاول تقوله متشكرين وخليك نايس

تعرف على توافق برج العقرب مع باقي الأبراج النهاردة:

متوافق مع تجاهل الوقت ف سبيل الانبساط..ودة جميل..إستمتع

*****************************************************************************

إعرف حظك اليوم برج القوس السبت 29 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

معارك التناكة ومين يكلم مين الاول ومين سأل ومين مسألش دي معارك عبيطة وخنيقة ومش مهمة..المهم تحبوا بعض وبس..غير كدة مش مهم مين بيعمل ايه الاول..المبادرة مش مهمة ف المشاعر قد ما مهم يكون في مشاعر اصلا..انتوا مش ف سباق مع بعض ولا في سكور ولا حكم بيحكم مين بيحب مين الاول ومين بيهتم يبين الحب دة ومين مبيهتمش ومش ف دماغه

برج القوس عملياً:

واضح انك خطر النهاردة لسبب ما خفي..بس الخفي مسيره يظهر وهنعرفه وهنعرف انتا كنت ليه مبتسم وهادي رغم انك من جواك بتغلي وبتدبر لمصيبة..ربنا يستر ع الكوكب منك النهاردة

برج القوس صحياً:

افرد ضهرك كويس وانتا قاعد النهاردة وحاول متركزش مع الاستفزاز اللي هتشوفه ف وشوش الناس النهاردة

تعرف على توافق برج القوس مع باقي الأبراج النهاردة:

متوافق مع الطواجن بشكل عام ومع الابراج الهوائية

*****************************************************************************

إعرف حظك اليوم برج الجدي السبت 29 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

اللون الاسود بيغلب على المود الليلة ودة راجع لإحساسك ان الشهر خلاص بيخلص وانتا غالبا مستني فلوس او حاجة شبه كدة..متقلقش..الشهر هيخلص وانتا هتغرق فلوس قريب..مش هتغرق اوي يعني بس في فلوس جايالك ان شاء الله

برج الجدي عملياً:

نشاط وحيوية وخدود اللهم لا حسد..مهم النهاردة توظف النشاط دة ف الخير مش ف الشر طبعا وعليه مهم تحاول تساعد الناس خصوصا اللي يستاهل منهم مساعدة ولو ملكش مزاج مش ازمة..الموضوع مش اجباري ابدا..انتا حر

برج الجدي صحياً:

خد بالك من خدودك النهاردة عشان فيهم سر قوتك وكل ما كانوا فريش ووردي وبيلمعوا كل ما هتعكس ثقة اكبر ف عيون الناس ودة جميل..ابعدهم بس عن الشمس وتحت اي بند متخليش حد يلعبلك ف خدودك عشان العكوسات كتير النهاردة

تعرف على توافق برج الجدي مع باقي الأبراج النهاردة:

متوافق مع البيتزا بشكل كبير واكتر من اي حد

*****************************************************************************

إعرف حظك اليوم برج الدلو السبت 29 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

لما بتزعل بتتقمص وبتاخد جنب ومستحيل تتصالح..بتصعب عليك نفسك وبيصعب عليك فعلا كل الفرص اللي اديتهالهم ف السابق..بيضايقك انهم محترموش انك كنت حاططهم ف مكانة عالية وكبيرة من غير مايطلبوها ومن غير ما يتخانقوا عليها.. وف الاخر مقدروش كل دة..ياللا..منهم لله متزعلش نفسك

برج الدلو عملياً:

متقلقش..محدش يعرف يسيطر عليك..انتا اساسا كيان غير قابل للسيطرة..انتا اخرك تمثل انك أليف وهادي وكيوت..بس ف الحقيقة انتا اجن من الجنان ذات نفسه..ودي اجمل حاجة فيك على الإطلاق لو عرفت قيمتها ووظفتها ابداعيا صح

برج الدلو صحياً:

اهدى على نفسك ف الاكل ياحبيبي..مش كدة..بالهداوة وبالعقل..اتفجعت علينا فجأة كدة ليه؟

تعرف على توافق برج الدلو مع باقي الأبراج النهاردة:

متوافق مع الحرية المطلقة

*****************************************************************************

إعرف حظك اليوم برج الحوت السبت 29 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

عاطفيا انتا خطر النهاردة..في جواك ميل للعنف وفي نية للخناق والإشتباك عالية..واضح انك منمتش كويس او انك متضايق من حاجة خفية عننا ومعكنناك ومخلياك مطلع جنانك على الناس..عموما جنانك دة على نفسك ياحبيبي..على نفسك ياحبيبي..الحياة اجن منك ومن اي حد..ثم ذنب اللي بيحبوك ايه بالظبط ف الجنان دة كله

برج الحوت عملياً:

مواجهة مع اعداء النهاردة هتسفر عن مكاسب نفسية وخساير ف شهيتك ف الاكل ودة مش كويس

برج الحوت صحياً:

مش عشان اتخانقت يبقى تاخدها حجة عشان تسد نفس نفسك ومتاكلش..عيب..لازم تاكل عشان تكبر..انتا ف مرحلة نمو لسة متنساش

تعرف على توافق برج الحوت مع باقي الأبراج النهاردة:

متوافق مع اللي انتا شايفه صح وبس..مش مع الصح

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.