حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد:

تخيل واحد مأجر فرقة موسيقية عشان تعزف وراه ف كل موقف مزيكا مصاحبة تليق بالموقف..وتبقى ساوندتراك لحياته.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأربعاء 26 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

بتهري وتنكت ف نفسك على ايه وليه؟..كبر دماغك وكله مسيره ياخد على قد خياله وزيادة حتة كمان

برج الحمل عملياً:

إتقل لأن الزمن كفيل بكل شيئ..مع الوقت كل حاجة هتتحل لوحدها ومش لازم تتدخل تدخل جذري النهاردة بشكل يعقد الامور اكتر ماهي متعقدة..شوية صبر وكل حاجة هتبقى زي الفل

برج الحمل صحياً:

ركز هتسهر فين الليلة وكله هيبقى عنب..وعلى ذكر العنب..انتا محتاج جرعة عنب كبيرة غالبا النهاردة..وياريت يكون من غير بذر

إعرف توافق برج الحمل مع باقي الأبراج النهاردة

متوافق مع الابراج الهوائية بالنهار بس

*****************************************************************************

إعرف حظك اليوم برج الثور الأربعاء 26 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

حاول متعملش غامض النهاردة عشان انتا مفقوس خصوصا بالنسبة للي بيحبوك..ثم هتعمل غامض ليه..ايه الاستفادة مش فاهم

برج الثور عملياً:

متخشش جمعيات ولا تورط نفسك ف اقساط الفترة دي..بلاش سيادتك مش ناقص

برج الثور صحياً:

متكشرش كتير النهاردة عشان العكوسات وحاول تضحك وترازي الحياة على ماتقدر..دة طبعا تعمله وانتا واكل كويس ونايم كويس..اي قلة اكل هينتج عنها قلبان ف الحبشتكان..وانتا حر..اه..انتا حر

إعرف توافق برج الثور مع باقي الأبراج النهاردة:

متوافق مع الضحكة العالية الحلوة

*****************************************************************************

إعرف حظك اليوم برج الجوزاء الأربعاء 26 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

حب وبراحتك..واللي مش عاجبه يشرب من البحر

برج الجوزاء عملياً:

مش كل الناس هتفهم ان سخريتك اساسها اهتمام..مهم تقول اللي انتا حاسه النهاردة بشكل واضح..معلش عشان في ناس دمها واقف وبتتلكك ع الكلمة..خليك انتا الكبير ووضح قصدك ببساطة..ولو عملت كدة وبرضة اتلككوا يبقى تديهم بالبرطوشة فوق دماغهم..ولو ف خيالك طبعا..عشان انتا مبتحبش المشاكل انا عارف

برج الجوزاء صحياً:

محتاج تملى البانيو وتغطس فيه ساعتين تلاتة يابرنس..مع مزيكا جاز حلوة وشوية معطرات كدة وبخور..وبعدها تقدر تاكل اي حاجة بتحبها..دة ابسط دلع نفسيتك تستاهله النهاردة

تعرف على توافق برج الجوزاء مع باقي الأبراج النهاردة:

متوافق مع صوت موج البحر

*****************************************************************************

إعرف حظك اليوم برج السرطان الأربعاء 26 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

لا بتدور على الحب ولا الحب بيدور عليك..انتا بس صعبان عليك انك حلو ومبتتحبش زي باقي المخاليق..مش اكتر

برج السرطان عملياً:

قطقوط ف نفسك النهاردة جدا وجميل..تجنب بس انك تتكشف والناس تعرف النهاردة ان شعارك السري ف الحياة "هتمسكن لحد ما اتمكن"..عشان هتبقى فضيحة بحناجل وشناكل ومش هيبقى شيئ لطيف انك تقعد تنكر وتشرح انك مش كدة ومحدش هيصدقك وهتبقى حوسة..الافضل تستغل حالة القطقطة ف حاجة مفيدة..روح سينما مثلا بالليل ولا ملاهي..اللي يعجبك

برج السرطان صحياً:

الجو حر بس مناسب لإكتساب سمرة ذهبية وعمل تان حلو كدة يليق بيك..إستمتع

تعرف على توافق برج السرطان مع باقي الأبراج النهاردة:

متوافق مع المراية

*****************************************************************************

إعرف حظك اليوم برج الأسد الأربعاء 26 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

متعملش مهم على حبايبك..عيب والله..تواضع للحب حبة..يستاهل والله

برج الأسد عملياً:

معلش..متزعلش نفسك..كلنا كنا فاكرين نفسنا ف مرحلة ما من حياتنا محور الكون وبعدين فوقنا

برج الأسد صحياً:

متفطرش فول وبصل وبتنجان وفلفل مقلي غير على عربية فول حلوة ف الشارع النهاردة..ع الواقف كدة وف وسط البشر..وإحبس بشاي بعدها ع القهوة..ابتدي يومك بشكل نايس هيبقى كله نايس ان شاء الله

تعرف على توافق برج الأسد مع باقي الأبراج النهاردة:

متوافق مع الكرامة وعزة النفس والتشبث بالرأي ومع الابراج المائية

*****************************************************************************

إعرف حظك اليوم برج العذراء الأربعاء 26 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

لو مش جاهز لمناقشات مع حد النهاردة يبقى تتجنبها احسن..من حقك متخشش ف جدال ممكن يفضي ف الاخر لزعل او سوء تفاهم..عادي خالص..دة حقك وحق الناس عليك برضة طالما مش ف المود

برج العذراء عملياً:

من حقك تقول"ماتيجي ناكل ايس كريم احسن بدل مانتخانق"..وياريت متتخانقوش على مين اللي هيحاسب عليه..خليك انتا الكبير معلش وحاسب..ثم هما هيروحوا فين..النهاردة انتا تحاسب بكرة وبعده وبعد بعده هما هيحاسبوا..انتا مخلفتهمش ونسيتهم

برج العذراء صحياً:

تقدر تعك ف الاكل النهاردة براحتك طالما حاسس ان معدتك وقولونك ف الاوكيه..الفراخ النهاردة بالطريقة اليمني "المندي" هتبقى ظريفة جدا وخصوصا لو كانت مع السحاوق"الصلصة" بتاعتها وتحتها طبقة حنينة وصفرا من الرز البسمتي الفاخر..وتتمشى بعد الاكل..مهم جدا تتمشى

تعرف على توافق برج العذراء مع باقي الأبراج النهاردة:

متوافق مع كوباية العصير على بق واحد

*****************************************************************************

إعرف حظك اليوم برج الميزان الأربعاء 26 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

تقل بالليل لو هتخرج او خد معاك جاكيت نفسي كويس عشان السما إحتمال تمطر ذكريات..طبعا لو انتا خدت بالك دة مش هيحصل..خصوصا لو خرجت ومقعدتش لوحدك تجتر ف أحزانك كالعادة..اخرج وفرفش محدش واخد منها حاجة..انبسط..دة حقك

برج الميزان عملياً:

غالبا النهاردة عندك مشوار رزل انتا مش عاوز تروحه بس مهم تعمله عشان تخلص منه..حلو..كافئ نفسك بعدها بأي حاجة حلوة تعجبك..هتلاقي وقت المشوار عدى هوا طول ما فكرة المكافئة دي ف بالك من اول اليوم يامعلم

برج الميزان صحياً:

ان مكنتش انتا تهتم بنفسك مين هيهتم بيك تفتكر يعني..انتا مش طفل خلاص..ومسئول منك نفسك..لازن تأكلها وتشربها وتحميها وتسرحلها شعرها..وخصوصا شعرها دة..متقعدش منكوش الليلة عشان احتمال يجيلك زوار من كوكب تاني..استناهم ف البلكونة..هيقلبولك نور قبل ماينزلوا بالمركبة الفضائية على السطح

تعرف على توافق برج الميزان مع باقي الأبراج النهاردة:

متوافق مع الفضائيين وسكان الكواكب المجاورة

*****************************************************************************

إعرف حظك اليوم برج العقرب الأربعاء 26 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

حالة الشحتفة النفسية اللي عندك دي لازم تخلص وبأي شكل يامعلم النهاردة..تخلص وخالص..قشطة

برج العقرب عملياً:

تخرج او تتفسح او تاكل او تشرب او تقعد ع القهوة او قدام التلفزيون او تشغل مزيكا..المهم تحقق غرضك وتقضي على حالة الشحتفة اللي بتزحف جواك دي بقالها فترة

برج العقرب صحياً:

مهم تفرفش النهاردة عشان تمهد نفسك نفسيا للأجازة..حتى لو هتشتغل ف الاجازة..مش مهم..المهم التمهيد عشان نفسيتك متتفاجئش وتتخض وتزعل بدون داعي..وراعي ضغطك النهاردة حبة..ودلع نفسك ف نوع جبنة حلو او ف شيكولاتة

تعرف على توافق برج العقرب مع باقي الأبراج النهاردة:

متوافق مع الهدوء الذي يسبق العاصفة..بعد الشر عليك من العاصفة

*****************************************************************************

إعرف حظك اليوم برج القوس الأربعاء 26 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

مش لازم تتخانقوا سوا ف التليفون النهاردة..جربوا تحبوا ف بعض حبة من باب التغيير معلش عشان خاطر الجو والكوكب مش عشان خاطر نفسكوا وبس

برج القوس عملياً:

في كماشة بتتحضرلك وهتتعمل عليك النهاردة بشكل ما..عموما متعترفش بأي حاجة..إنكر كل حاجة وإعمل نفسك برئ..إعمل نفسك برئ

برج القوس صحياً:

طالما مبسوط يبقى تبسط اللي حواليك وخصوصا اللي بتحبهم..إعزمهم ف حتة نايس كدة واخرجوا اتعشوا برة واعملوا اب ديت لنفسيتكم واتحركوا كدة يمكن تخسوا سوا

تعرف على توافق برج القوس مع باقي الأبراج النهاردة:

متوافق مع الحب الرومانسي..يابختك والله

*****************************************************************************

إعرف حظك اليوم برج الجدي الأربعاء 26 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

دلع ف الطريق إليك..حاول متعملش نفسك مش واخد بالك وتطنش..اللي بيتكسف من الحياة ممكن الحياة هي رخرى تتكسف منه وساعتها هتبقى حوسة..انتا حر..انا نصحتك وانتا حر..تتنصح او متتنصحش انتا حر

برج الجدي عملياً:

عامل نفسك مش واخد بالك من اللي بيحصل كدة ليه..انتا فاكر انك كدة حويط..لا حضرتك..لما تغمض عينيك قدام اي اي فيلم رعب مش معناه ابدا انه هيختفي..بالعكس..هيفضل موجود وصوته بيرن اكتر ف ودانك..بطل خوف وواجه بشجاعة وخد حقك..متحطش صباعك ف عين حد بس مش اكتر..عشان عيب

برج الجدي صحياً:

تقدر تكسر الدايت النهاردة لو عامل دايت وتقدر تبتدي دايت لو مش عامل دايت..اليوم مناسب ف الحالتين

تعرف على توافق برج الجدي مع باقي الأبراج النهاردة:

متوافق مع الكفتة ام صلصة والرز جدا النهاردة ماشاء الله

*****************************************************************************

إعرف حظك اليوم برج الدلو الأربعاء 26 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

انتا سوبر هيرو..بس قدرتك الخارقة مش ف انك بتعرف تطير او بتعرف تعدي من الحيطان..قدرتك الحقيقية ف انك اكتر واحد بيعرف يضرب الدنيا صرمة

برج الدلو عملياً:

مش دايما كويس انك تضرب الدنيا صرمة ياخويا..لا الحياة هتفهم انك مخاصمها بالنوم ولا بالقمصة..ولا هتهتم بصراحة للي انتا بتعمله ف نفسك دة..زعلان على ايه..مانتا جميل اهو وزي الفل..هو حد لاقي الجنان الحلو دة ف عقله بذمتك..قوم وفرفش كدة وبلاش نكد

برج الدلو صحياً:

قوم واتحرك ودور بنفسك على كل اللي انتا عاوزه..اليوم مناسب للطموح ومناسب جدا للإسترخاء العام برضة مع حبة شغل صغنتتين..ميضرش..الشغل برضة مهم لنفسيتك زي ما الحركة مهمة لعضلات جسمك

تعرف على توافق برج الدلو مع باقي الأبراج النهاردة:

متوافق مع أي سوبر هيرو شبهك

*****************************************************************************

إعرف حظك اليوم برج الحوت الأربعاء 26 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

عواطفك النهاردة ناعمة وجميلة وجاهزة للحب..بس انتا بتفكر ف الطبيخ للأسف..مش ف الحب

برج الحوت عملياً:

شيئ أخضر ف الطريق إليك..ممكن تكون فلوس بالعملة الصعبة وممكن تكون مجرد ضوء أخضر ف أخر الطريق..ف الحالتين تجنب لبس اي هدوم فيها أخضر النهاردة منعا لأي عكوسات وف الحالتين المفروض تنبسط لأنه لا حد لاقي فلوس ولا ضوء اخضر ولا اي حاجة ثابتة او بتتحرك باللون دة من فترة..انا بقترح تتفاءل وخلاص

برج الحوت صحياً:

ابعد عن اي حاجة متبلة او متسبكة بصلصة النهاردة..حاول تاكل خفيف وتعدي اليوم بشكل لطيف من غير اي خناق محتمل ممكن يكركب معدتك بدون داعي

تعرف على توافق برج الحوت مع باقي الأبراج النهاردة:

متوافق مع الجبنة بالقوطة والخيار

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.