من أيام انتحر المطرب تشيستر بنينجتون.. المطرب الرئيسي في فرقة Linkin Park واللي كان ناجح عند ناس كتير لدرجة إن في ناس كتير فاكراه هو لينكين بارك نفسه مش مجرد مطرب في الفرقة.

تشيستر بنينجتون يمكن زي مطربين أو فنانين تانين عاشوا فصل الادمان والاكتئاب وغيره من المشاكل النفسية.. لكن على عكس كتير من الفنانين كان بيحول مشاكله دي لأغاني والغريبة إنها كانت أنجح الأغاني اللي عملها طول حياته زي أغنية Numb أوأغنية Crawling اللي كانت بتتكلم عن المطرب نفسه.

وحتى ألبوم Meteora اللي هو السبب الحقيقي لشهرة الفرقة كان أغلبه أغاني عن مشاكل بنينجتون مع الادمان والكحوليات وأفكاره الانتحارية.. والألبوم كان فيه أغنية Numb اللي كانت الأولى على قايمة البيلبورد لأحسن 200 أغنية في سنة 2002 وكانت أكتر أغنية شعبية للفرقة كلها.

ليه تشيستر بنينجتون وفرقة لينكين بارك نجحت على عكس باقي فرق الروك الجديدة؟

لينكين بارك مش مجرد فرقة روك أو حتى فرقة "إندي روك".. لأ هي في الحقيقة تبقى كوكتيل من الروك والراب والهيفي ميتال.. كمان مكنتش فرقة مقفولة على نفسها.. خليك فاكر إن ناس كتير مكنتش هتسمع أغاني جاي زي مثلا إلا عشان كان على المسرح مع تشيستر بنينجتون وعمل دويتو معاه بأغنية Numb Encore في 2004 وحتى شوف ريأكشن الجمهور لما بدأ تشيستر الجزء بتاعه في الأغنية.

أو حتى شوف أدائه مع صاحبه كريس كورنيل واللي هو نفسه انتحر في شهر مايو اللي فات.. وبطريقة فيها صدفة سودة وهي الشنق.. وكان تشيستر هو اللي كتب النعي بتاعه.

من الحاجات اللي نجحت الفرقة والمطرب هي إنك مش هتعرف تحطهم في تصنيف معين لأنهم كانو قريبين من جمهور كبير مش بس جمهور الروك سواء الكلاسيك أو الإندي.. الفرقة اللي عملت شهرتها في سنة 2000 طبعا لسة مفيش مقارنة بينها وبين البيتلز أو ليد زيبلين.. لكن الفرقة على الطريق أو كانت قبل تشستر ما ينتحر.. ولاحظ على طول إن الفرقة لا يمكن تكسر لحن في أي أغنية.. التون دايما موزون لحد التلت الأخير في أي أغنية.. وهنا بيطلع المومنتوم بتاعها.

المأساة الأخيرة

زي ما قولنا في الأول مطرب لينكن بارك مش أول مطرب ينتحر أو يكون عنده مشاكله النفسية.. لكن أخر الأخبار عنه بعد ما مات هي نظرية عند زمايله في الفرقة وعند البوليس بتقول إنه كان بيرتب للانتحار من فترة ومخطط التوقيت والطريقة كمان.. ودة بعد ما اتضح إنه من فترة قصيرة اشترى بيت كبير 5 أوض نوم و4 حمامات وتمنه 2.6 مليون دولار عشان يطمن إن ولاده الستة حياتهم كويسة بعد ما يموت.. والأكتر من كدة هو توقيت وطريقة الانتحار بالشنق زي كريس كورنيل .. ويوم 20 يوليو اللي هو يوم عيد ميلاد كورنيل.

في الأخر باعتباري من الفانز أنا متأكدة إن الفرقة هتختلف كتير عن الأول بعد اختفاء صوت تشيستر وكمان مش هنعرف ايه الاتجاه الجديد للفرقة ومين المطرب الرئيسي فيها إلا بعد فترة.. وإذا كان في محاولة لتقليد أسلوب تشيستر ولا هيقررو يقفلوا الموضوع على كدة ويعيشوا على ذكراه زي ما حصل مع مطربين تانيين انفصلوا عن فرقتهم أو ماتوا.