التوقيت الجمعة، 29 مارس 2024
التوقيت 08:32 ص , بتوقيت القاهرة

9 حاجات هتخليك "مبسوط" في مترو الأنفاق

ع الصبح كده انت رايح تقف في طابور عشان تقطع التذكرة، وعمال تحلم تلحقلك كرسي، وبجملة الأحلام بقى بتقول يارب المترو ييجي مكيف، حلو الخيال، تعالي كده وركز في اللي جاي هتلاقي إن المترو أحسن بكتير من غيره، الحاجات اللي بتقلق منها تخيل انها هتبسطك. 

(1) أن تكون "أحمد السقا"
اثبت مكانك.. عدي من على جهاز الليزر
فرصتك مع "الأكشن"، عرض يومي مستمر في محطة المترو، مشهد البداية وأنت بتستعجل موظف الشباك يديك التذكرة، وحواسك كلها مركزة مع صوت المترو، قدامك فرصة تجري زي أحمد السقا في فيلم تيتو؛ عشان تلحق الباب قبل ما يقفل، لو نجحت هتحس أنك بطل المشهد المنتصر، طب فرضًا وصلت بدري، برضه هتلعب دور المنقذ اللي بيمسك الباب قبل ما يقفل على زميل آخر.

(2) محل 2.5 متحرك
أي حاجة بـ 2.5 جنيه
لو كنت من بتوع المحلات اللي رافعة شعار " أي حاجة بـ 2.5 جنيه"، وأنت في عربية المترو، معظم الوقت يدخل عليك أكتر من شاب مصري ينادي على بضاعته : "الحق العرض.. فرصة السعر"، وكمان هيخليك تجرب المنتج، سواء مكنة حلاقة، أو هدية للجنس اللطيف، تطلعك من مأزق نسيانك إن اليوم ده "الفلانتين"، والمفروض خطيبتك هتشوفها المحطة الجاية. ولو متجوز أديك هتروح لها بطقم "إبر" معتبر.

(3) مفيش "موكب" بيعدي
سيادة الكومندا المهم هيعدي

تحت الأرض الوزير والخفير سواسية، مش هتفضل واقف في الإشارة مستني موكب السيد المسؤول يعدي، وهتوصل المشوار في ميعادك، المترو مواعيده أكثر دقة، إلا في حالة عطل، ساعتها مصر كلها بتعرف إن المترو واقف، وبتكسب حجة مناسبة لو اتأخرت عن الشغل، ده لو مكنش مديرك هو كمان في نفس العربية متأخر.

(4) يفكرك بميعاد الماتش
المدرج حته منى عرفت فيه طعم الحياه
لو حتى مش مهتم بالكورة، بتعرف إن النهاردة فيه مباراة كرة قدم مهمة، بتظهر البشاير لما بتلاقي نص ركاب العربية شباب لابسين تيشرتات الفريق اللي بيشجعوه، وبيغنوا بحماس كلام مش مفهوم، لاتقلق دول اسمهم "الألتراس"، لو قبل المباراة هيعرفوك الزمان والمكان، وبعد 90 دقيقة، لو فاتك حاجة في الماتش، هتلاقي فيهم الواد "الكوير"، اللي يديك الخلاصة كأنك  كنت في الاستاد.


(5) تقرا الجرايد ببلاش
يا واد يا عميق
لو غاوي قراءة، انزل المترو معاك كتاب، ولو بتحب تتابع الأخبار، العادي جدا إنك تشارك اللي قاعد جنبك في الجرنان اللي ماسكه، الموضوع في المترو بقى مألوف، لدرجة انه ممكن يسيبلك الجرنان وهو نازل، لو معاك سمارت فون، في المترو هتلاقي أكتر من مستشار، يساعدوك تعدي مستوى اللعبة، وينبهوك إن البوست إياه لازم تعمله لايك وشير. "غلاسة" تحولت إلى عادة يومية.


(6) مكان مناسب للتصوير
تخيل.. ديفيله في المترو
لو من عشاق التصوير، ممكن تاخد صورة سيلفي مع أكتر من خلفية مميزة لتصميمات المحطة، ولو في وقت متأخر ولاقيت نفسك لوحدك في العربية، ممكن تعمل ألبوم كامل، فرصة نادًرا لما بتحصل لمواطن. بس لو دخل عليك حد مضمنلكش هيبصلك إزاي.


(7) مكان مثالي للتجمع


إيه اللي جابني عربية الستات
"نتقابل تحت الساعة" أو "عند العربية الأخيرة".. دي أبسط الجمل اللي تقدر تستخدمها لما يكون فيه ميعاد في محطة المترو، ممكن تجمع الأصحاب والمعارف، أفضل مكان تجمع للانطلاق في الرحلات يبدأ من المترو.


(8) حار جاف شتاءًا


زحمة يا مترو زحمة


بص لنص الكباية المليان، الزحمة في المترو حاجة طبيعية وفعًلا أزمة، لكن في الشتا هتحس إن العربية أدفى مكان. بالنسبة للصيف ياريت متنزلش من البيت أصلًا.

(9) التذكرة بجنيه .. والحسابة بتحسب



انت مستنى الميزة دي من أول التقرير، طبعًا هي أرخص وسيلة مواصلات، بجنيه واحد ممكن تلف القاهرة من شرق لغرب، في المقابل هتوفر كتير بالمقارنة مع عداد التاكسي.  لكن اعمل حسابك ان الكلام عن زيادة السعر لسه شغال. 


تحديث: تم زيادة سعر تذكرة مترو الأنفاق إلى 2 جنيه بدءًا من الجمعة 24 مارس 2017