لو إنتا من الناس اللي بتحب المزيكا أكيد هتقضي أجازتك وسط حفلات مزيكا وغنا وفصلان.. ولو إنتا بتحب الكارتون هتقضي إجازتك في ديزني مع ميكي وبطوط.. أما بقى لو إنتا شاطر في الماث وبتقفله كل سنة يبقى مكانك الصح في فندق  EMC2 في شيكاغو أكتر مكان هيحببك في الرياضيات أكتر ما إنتا بتحبها 

فندق EMC2 موجود في حي ستريترفيل في شيكاغو.. وفكرة تصميمه كان هدفها تكريم إيمي نويثر عالمة التاريخ والرياضيات واللي كان ليها شهرة عالمية بسبب أبحاثها في مجال الرياضيات.. ف أول ما تدخل الفندق هتلاقي تصميمات لأبحاثها ونظرياتها مكتوبة ف كل ركن من أركان الفندق

إتولدت إيمي نويثر في ألمانيا سنة 1882 والعجيب إنها مدرستش الرياضيات خالص وهي طفلة وركزت على دراسة اللغات الأجنبية.. ولما وصلت لسن الجامعة طلبت من باباها -إللي كان عالم رياضيات- إنها عايزة تاخد فصول رياضيات في الكلية.. وبالرغم من إن مجال الرياضيات مكنش من المجالات المتاحة لستات إلا أن إيمي تفوقت فيه وحصلت على الدكتوارة في الجبر المجرد  

إنتقلت إيمي بعد كدة من ألمانيا لأمريكا.. وهناك تعاونت مع علماء مهمين جدا زي ألبرت أينشتاين  إللي ساعدته في تطوير نظرية النسيبة العامة.. ودة اللي خلا ألبرت يسميها العبقرية الرياضية 

هتلاحظ ف فندق EMC2 أن كل حاجة فيه هتخليك تفكر وتشغل عقلك.. ف أول حاجة عينك هتقع عليها أول ما تدخل لوبي الفندق جملة ليوناردو دا فينشي اللي بتقول "ادرس فن العلم.. طور حواسك.. أدرك أن كل شيء يتصل بكل شيء آخر"

وعشان المكان يحافظ على تصميمه الرياضي.. طلب من عالمة الرياضيات يوجينيا تشنغ الإشراف الكامل على تصميم الفندق من أول أماكن السابورة والنظريات اللي هتتكب عليها.. والرسوم البيانية ونوعية الكتب اللي هتتحط ف مكتبة الفندق.. وكل دة عشان يضمنوا أن الفندق يكون مكان إقامة مثالي لأي حد بيحب الرياضيات 

على قد ما المكان يبان أنه علمي جدا إلا أنه هيديك برضه طابع الراحة والترحاب إللي بتحس بيه في أي فندق عادي.. ف لو إنتا بتقفل الماث كل سنة يبقى تستحق تطلع رحلة للفندق دة