حظك اليوم وتوقعات الأبراج اليوم معانا كل يوم على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد: 

الابراج الترابية متنفعش مع الابراج المائية عشان هيبقوا طينة ودي حاجة معروفة 

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأحد 23 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

عقلك الباطن مفزوع..حاول تهديه بالأكل والمزيكا وقليل من الدلع البصري المتمثل ف فيلم مقاولات تمنيناتي او مسرحية معادة مكررة انتا حافظ كل ايفيهاتها بس برضة بتحب تتفرج عليها

برج الحمل عملياً:

بلاش تأفور ف ردود افعالك النهاردة..خليك كوول وهادي وكل حاجة هتمشي على مزاجك

برج الحمل صحياً:

محتاج تلعب رياضة طبعا بس لو انتا النهاردة اجازة ف تقدر تقعد متعملش اي حاجة

إعرف توافق برج الحمل مع باقي الأبراج النهاردة

متوافق مع اللون الازرق التركواز

*****************************************************************************

إعرف حظك اليوم برج الثور الأحد 23 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

المشاعر فياضة وجاهزة للحب بس انتا اللي ملكش مزاج او الظروف معاكسة معاك..متزهقش وحاول مرة تانية..الموضوع يستاهل التعب

برج الثور عملياً:

بتشتكي ليه دلوقتي..مش انتا اللي عملت ف نفسك كدة..حاول تعدي اللي حصل وتبص لقدام..الايام الحلوة جاية كتير..الندم مش مفيد..ومش منطقي

برج الثور صحياً:

نوع ف اكلك حبة ولو تشرب عصير كيوي او مانجا ف نص النهار هيبقى فل..بالهنا على مراوحك مقدما

إعرف توافق برج الثور مع باقي الأبراج النهاردة:

متوافق مع اللون الأخضر

*****************************************************************************

إعرف حظك اليوم برج الجوزاء الأحد 23 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

انتا نصين..نص طيب ونص مجرم..هنفترض دلوقتي ان اللي بيقرا الكلام دة هو النص الطيب..النص المجرم بقى غالبا عنده حاجة عاوز يحكيهالك ياطيب..ابقى اسمعله ف وقت فراغك عشان ميعملكش دوشة ويلبخلك اليوم

برج الجوزاء عملياً:

طول مانتا مابتكروتش وبتعمل كل حاجة بضمير هتبقى زي الفل..غير كدة متشغلش بالك بكلام حد..انتا مبسوط ومحدش يقدر ياخد منك الانبساط دة

برج الجوزاء صحياً:

طول مافي رومانسية حلوة ف حياتك نفستك هتبقى فل ولما نفسيتك تبقى فل صحتك هتبقى ميت فل واربعتاشر

تعرف على توافق برج الجوزاء مع باقي الأبراج النهاردة:

متوافق مع الراحة النفسية بشكل كبير

*****************************************************************************

إعرف حظك اليوم برج السرطان الأحد 23 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

بلاش كيد ونفسنة اليومين دول عشان بشرتك متقشفش

برج السرطان عملياً:

متسمعش لشيطانك..بلاش النهاردة..النهاردة انتا طيب وأمور وبس

برج السرطان صحياً:

جميل وأمور وشطور وزي الفل ماشاء الله..الكوكب هو اللي مش كويس مش انتا خالص

تعرف على توافق برج السرطان مع باقي الأبراج النهاردة:

متوافق مع الكلام الحلو والإطراءات اللطيفة

*****************************************************************************

إعرف حظك اليوم برج الأسد الأحد 23 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

العصبية ممكن تبوظ حاجات كتير حلوة النهاردة..ابعد عنها تماما

برج الأسد عملياً:

متغرقش امال او احلام حد..ومتغرقش حد النهاردة..بلاش

برج الأسد صحياً:

اخرج بالليل مع حد بتحبه..اتمشوا واتعشوا وانبسطوا سوا..الكلام النهاردة والحكي هيريح اعصابك كتير..خصوصا لو خدت الفرصة تتكلم عن نفسك

تعرف على توافق برج الأسد مع باقي الأبراج النهاردة:

متوافق مع الأحلام الحلوة

*****************************************************************************

إعرف حظك اليوم برج العذراء الأحد 23 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

الشماتة ف العقل لتاتة..يعني بلاش شماتة ف حد عشان هتشغل عقلك على الفاضي بدون استفادة حقيقية

برج العذراء عملياً:

وقيل ف الاثر ان كل ذو طرفا اغر يأتي عليه يوما ويغتر..يعني ما تنططش بحلاوتك وجمالك على حد..عشان متفقدش الذاكرة وتفضل ماشي ف الممر محدش عارف انتا جاي ولا رايح ولا بتعمل ايه بالظبط

برج العذراء صحياً:

بلاش غل خالص النهاردة تجاه اي حاجة من اي نوع ياريت..ضغط دمك مش ناقص

تعرف على توافق برج العذراء مع باقي الأبراج النهاردة:

متوافق مع العقل والعقلانية وجميل وهادي ماشاء الله

*****************************************************************************

إعرف حظك اليوم برج الميزان الأحد 23 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

محتاج تثق بشكل اكبر ف اللي بتحبهم ومحتاج تحسسهم بدة اليومين دول وبسرعة..بلاش شك وبلاش غيرة وبلاش جنان..حافظ على اللي معاك واعرف قيمته

برج الميزان عملياً:

اللي بيهددك ميعرفش انتا لما بتقلب على الوش التاني بتبقى متوحش ازاي..مسكين والله وهيتفاجئ

برج الميزان صحياً:

مية كتير جدا عشان الاملاح وعشان الرطوبة لسة مستخبية ف الهوا وهتعرقك كتير جدا وانتا مش واخد بالك

تعرف على توافق برج الميزان مع باقي الأبراج النهاردة:

متوافق مع الابراج الهوائية والنارية والترابية..المائية مش قوي يعني بس ماشي حالها برضة

*****************************************************************************

إعرف حظك اليوم برج العقرب الأحد 23 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

متعملش اي حاجة النهاردة او تقول اي حاجة تحت اي نوع من انواع الضغط او الرغبة ف ارضاء الطرف الآخر..انتا حر ف مشاعرك ومش لازم تيجي على نفسك عشان تثبت لحد انك بتحبه

برج العقرب عملياً:

احلامك بتشتغل عندك مش انتا اللي بتشتغل عندها..ف خللي بالك مش اكتر واهدى على نفسك ف الطموح والجري ف الحياة حبة صغننة معلش..ريح وهتستريح والله

برج العقرب صحياً:

اليوم مناسب للإسترخاء بشكل كبير ومناسب جدا للخروج بالليل وللكلام الحلو..استفيد من التفاصيل دي كلها ياريت وانبسط

تعرف على توافق برج العقرب مع باقي الأبراج النهاردة:

متوافق مع الفضة مش مع الدهب النهاردة

*****************************************************************************

إعرف حظك اليوم برج القوس الأحد 23 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

خيالك بيلاعبك النهاردة حبتين..حاول متعكسشي دة على اللي بتحبهم عشان مش هيفهموا انتا متضايق من ايه بالظبط بسهولة حتى لو شرحت..فرفش احسن وياهم وانسى مشاكلك وارمي ورا ضهرك

برج القوس عملياً:

احلام اليقظة والاحلام اثناء النوم مش اكتر من هلوسة عقل باطن..مش اشارات ولا علامات على اي حاجة..كبر دماغك وانبسط ومتبوظش اليوم ومتحكيش احلامك لحد..متحكيش احلامك لحد

برج القوس صحياً:

النهاردة ممكن تاكل اكلة دسمة على مزاج مزاجك..طالما مش حاسس بحمو او حموضة مسبقة يبقى كله فل

تعرف على توافق برج القوس مع باقي الأبراج النهاردة:

متوافق مع الابراج اللي بتعرف تضحك من قلبها ببراءة

*****************************************************************************

إعرف حظك اليوم برج الجدي الأحد 23 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

متقعدش لوحدك النهاردة خالص..عشان واضح انك هتسرح بفكرك ف كل شيء مش لطيف وهتجتر ف الاحزان لحد ما تلبسها ف صباعها الكبير كستبان..ف على ايه..اخرج مع اصحابك وفرفش ولا اقعد ع القهوة حبة العبوا طاولة ولا بلاي ستيشن ولا اي حاجة وبلاش نكد ووحدة

برج الجدي عملياً:

متهريش وتنكت ف نفسك النهاردة على الفاضي ياريت..محدش حاسس بحد ولا هيحس..كل واحد ملهي ف مشاكله وف تفاصيله..ديل ويز إيت

برج الجدي صحياً:

العصبية طبيعي تعبلك البخت ف ضغطك..بالتالي يا تشرب كركديه ياتاكل حاجات حلوة..حسب ضغطك عالي ولا واطي..غير كدة كله فل وبونو وإحتمال كبير تحس بنشاط ورغبة ف الحركة بالليل

تعرف على توافق برج الجدي مع باقي الأبراج النهاردة:

متوافق مع الابراج المائية والترابية

*****************************************************************************

إعرف حظك اليوم برج الدلو الأحد 23 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

في حب ف الاجواء ودي حاجة متقدرش تنكرها..يا بتحب يا اما في فرصة حب..انتا حر طبعا تختار تحب او لأ بس خد بالك ان الحب المتاح حاجة نادرة ومش هتتكرر تاني..إحترم الفرصة دي ومتبوظهاش من فضلك عشان الحياة مبتدلعش حد الدلع اللي بتدلعهولك دة..انتا محظوظ فعلا

برج الدلو عملياً:

جنانك ممكن يجنن الناس..ف خللي بالك وانتا بتجنن عشان ممكن تعديهم بجنانك ودة شيء قد يبدو ليك طبيعي وعادي خصوصا وانك متعود عليهم بيقلدوك ف كل حاجة

برج الدلو صحياً:

محتاج تنام كتير عشان صحتك ومناعتك تستقر..حاسس بالذنب ليه تجاه الموضوع دة؟..ماتنام براحتك..دة حقك

تعرف على توافق برج الدلو مع باقي الأبراج النهاردة:

متوافق مع الحب لتالت يوم

*****************************************************************************

إعرف حظك اليوم برج الحوت الأحد 23 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

الحب الحقيقي مالوش علاقة بأي مصلحة..وانتا عارف كدة كويس..بتحشر المصالح ليه فيه بقى لما انتا عارف كدة..ليه بتبوظ الحاجة الحلوة..ولا خايف تطير منك ف بتحاصرها؟

برج الحوت عملياً:

متخافش..محدش يعرف يخوفك قد نفسك

برج الحوت صحياً:

المغص عشان انتا متوتر وضاغط على نفسك بشكل كبير وبدون داعي حقيقي..كمان التزامك بالدايت حلو وحاجة تستحق التشجيع..بس راعي انه ميكونش عقاب لجسمك عشان ميقلبش عليك ويزعلك..دلع نفسك ف ايس كريم ولا درة ولا اي حاجة مفرحة..دة حقك

تعرف على توافق برج الحوت مع باقي الأبراج النهاردة:

متوافق مع الابراج اللي بتعرف تساومك

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.