إعرف حظك اليوم وتوقعات الأبراج اليوم معانا على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد: 

الخناقة بين الرجالة والستات ف الاساس خناقة sales مش اكتر..مفيش إختلاف على المنتج..قد مافي خلاف دايما على السعر

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الجمعة 21 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

خليك حساس وسيبك من استعراض فنك ف تثبيت المجتمع والناس

برج الحمل عملياً:

الصداع بيجيلك عشان يفكرك ان دماغك عزيزة عليك وانك مش المفروض تستخدمها ف الافكار الوحشة اللي بتفكر فيها دي خالص..بطل سوادوية وكآبة والصداع هيرمي نفسه من البلكونة

برج الحمل صحياً:

مهم النهاردة تعمل اي نشاط بخلاف المسح والكنس والطبيخ..نشاط ابداعي لطيف كدة..مش تقف تغسل المواعين وتقول على دة نشاط

إعرف توافق برج الحمل مع باقي الأبراج النهاردة

متوافق مع الابراج الهوائية خصوصا اللي بتركب الهوا

*****************************************************************************

إعرف حظك اليوم برج الثور الجمعة 21 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

شايف نظرة امل وتفاؤل للمستقبل القريب ف عينيك..اما نشوف ياخويا هتعمل ايه..انا نشوف

برج الثور عملياً:

متلبسي كاروهات خالص النهاردة..هتعمل عكوسات ممكن تتسبب ف دمار الكوكب

برج الثور صحياً:

صحتك كويسة وزي الفل..أنتا محتاج اهتمام بس ومراعية لنفسك وحبة دلع مسائي خفيف وكل حاجة تبقى فل..متاكلش بس وتنام..مش اكتر

إعرف توافق برج الثور مع باقي الأبراج النهاردة:

متوافق مع الابراج المائية

*****************************************************************************

إعرف حظك اليوم برج الجوزاء الجمعة 21 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

اصحابك اهم من احبابك النهاردة..خصوصا اصحابك التخيليين اللي انتا مخبيهم ف عقلك من الدنيا والناس..مهم تفرحوا سوا النهاردة وتنبسطوا وتحتفلوا..دة حقكم

برج الجوزاء عملياً:

حاول تكت النهاردة بدري من اي تكليف او شغل وراك وتخرج تتمشى ف اي حتة ولو معرفتش يبقى تقعد قدام التلفزيون او تنام حبة حلوين بمزاج

برج الجوزاء صحياً:

شاور لطيف ومزيكا الطف وتدلع نفسك ولا حدش له دعوة بيك ولا بمزاجك..انتا جميل النهاردة

تعرف على توافق برج الجوزاء مع باقي الأبراج النهاردة:

متوافق مع الابراج الهوائية

*****************************************************************************

إعرف حظك اليوم برج السرطان الجمعة 21 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

متشغلش بالك بالتفكير ف الامور العملية النهاردة وركز ف انك تبقى محبوب..مش نصاب ولا بتاع مصلحتك..محبوب يابيه..محبوب

برج السرطان عملياً:

مشاكل الفلوس مجننة الكوكب كله مش انتا بس..كوكب الارض اصلا محتاج يشوفله كوكب تاني يتجوزه ويصرف عليه

برج السرطان صحياً:

انتا جميل وزي الفل النهاردة..حاول بس تتجنب الحشرات على قد ما تقدر

تعرف على توافق برج السرطان مع باقي الأبراج النهاردة:

متوافق مع المزيكا بشكل كبير..خصوصا المزيكا الهادية

*****************************************************************************

إعرف حظك اليوم برج الأسد الجمعة 21 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

فرق السن مشكلة طبعا مفيش كلام..بس مش ف الحب ولا العواطف ولا المشاعر..السن ف الحاجات دي مجرد رقم مش اكتر

برج الأسد عملياً:

متشتغلش النهاردة..محدش يضحك عليك ويشغلك النهاردة..ولا عقلك الجميل حتى..بلاش ياكابتن

برج الأسد صحياً:

إبعد عن الاكل المسبك بقوطة النهاردة وخصوصا بالليل

تعرف على توافق برج الأسد مع باقي الأبراج النهاردة:

متوافق مع الكلمة الحلوة

*****************************************************************************

إعرف حظك اليوم برج العذراء الجمعة 21 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

من حقك النهاردة تتدلع وجدا..المشكلة انك متقدرش تطلب دلع من حبايبك بشكل مباشر..مهم يجي منهم من غير ماتطلبه..ودي طبعا ازمة..لأنك مش هتروح تطلب دلع من حد عشان كرامتك..ودة امر منطقي طبعا ومعاك فيه كل حق..السؤال بس اللي بيتبقى..هو ايه علاقة المنطق بالحب..وايه علاقة الكرامة بالمشاعر..ايه اللي جاب القلعة جنب البحر فعلا يعني؟

برج العذراء عملياً:

شوية ثقة مع شوية دلع وكل حاجة هتبقى زي الفل واليوم هيبقى يوم مثمر وناجح وداعم لأي نشاط ليلي خلاب تفكر تعمله من غير دوخة او عذاب

برج العذراء صحياً:

ابعد عن التوتر وابعد عن الاكل الي مش على مزاجك..متاكلش حاجة عشان ترضي حد خايف على زعله او مش على مزاجك..بلاش..اللي عاجبه الاكل ياكله وهو ساكت وخلاص

تعرف على توافق برج العذراء مع باقي الأبراج النهاردة:

متوافق مع الهدوء والتركيز ف الفراغ

*****************************************************************************

إعرف حظك اليوم برج الميزان الجمعة 21 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

روق وكل حاجة مسيرها تبقى فل..مسيرها تروق وتحلى..ثق ف كدة

برج الميزان عملياً:

عشان توصل لأهدافك لازم تحارب وتواجه ودي حاجات صعبة انا عارف بس مهم تعملها لو ناوي تنجح

برج الميزان صحياً:

الشكوى مش مفيدة ولا صحية خالص ليك النهاردة وهتضربلك المناعة.. ف خد بالك من نفسك ومن نفسيتك كويس ياريت

تعرف على توافق برج الميزان مع باقي الأبراج النهاردة:

متوافق مع الابراج الترابية

*****************************************************************************

إعرف حظك اليوم برج العقرب الجمعة 21 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

طالما بتحبهم يبقى لازم تديهم مساحة ولازم تتفهمهم زي ما بيفهموك وبيتفهموك..متخليش سوء تفاهم بسيط يفسد عليك روقانك او حبك لأي حد..انتا اكبر من كدة بمراحل يامعلم

برج العقرب عملياً:

طول مانتا بعيد عن العصبية هتبقى زي الفل..حاول بس متاخدش قرارات بتسرع النهاردة..خد وقتك وريلاكس..قدامك لسة وقت تفكر فيه براحتك بعدين

برج العقرب صحياً:

البيتزا بتنفع طبعا ف مواجهة النكد..كفاية الوانها وطيبة قلبها وتضحيتها بنفسها حتة ورا حتة عشانك

تعرف على توافق برج العقرب مع باقي الأبراج النهاردة:

متوافق مع الابراج بشكل عام النهاردة..ياريت متتخانقوش بس وإنتوا بتلعبوا سوا

*****************************************************************************

إعرف حظك اليوم برج القوس الجمعة 21 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

هتتحب قريب بشكل قوي وعنيف..إستعد بالدروع والأسلحة

برج القوس عملياً:

بتعرف تضحك على كل حاجة حتى مشاكلك الشخصية وبتقلبها فرفشة ودة سلاح قوي جدا وخطير ف مواجهة نكد الحياة ويستحق الاحترام فعلا

برج القوس صحياً:

خف من السجاير والشيشة اللي بتشربها ف الخباثة وانتا تبقى زي الفل

تعرف على توافق برج القوس مع باقي الأبراج النهاردة:

متوافق مع القمر خصوصا بالنهار

*****************************************************************************

إعرف حظك اليوم برج الجدي الجمعة 21 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

رغم كل اللي بتعمله عشان تنبسط الا انك بتخفي جواك حزن وكلام متحاش خانقك ومضايقك..الحل الوحيد انك تكتب الكلام دة كله ف ورقة وتعملها مركب وتسيبها تعوم ف النيل وتغرق قدامك وولع شمعة ف نخب النسيان والتجاوز

برج الجدي عملياً:

قريب كل حاجة هتبقى فل..إتقل بس حبة..شوية صبر وكل حاجة هتظبط معاك..خصوصا موضوع الفلوس

برج الجدي صحياً:

ابعد عن الصوت العالي ف كل حاجة النهاردة..حتى ف المزيكا.

تعرف على توافق برج الجدي مع باقي الأبراج النهاردة:

متوافق مع اللون الاسود

*****************************************************************************

إعرف حظك اليوم برج الدلو الجمعة 21 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

فكك من اي حسابات مسبقة ف دماغك النهاردة وخليك طيب وحنين وبس..التصرف دة هيفرق ف العالم كله..مش حواليك وبس

برج الدلو عملياً:

كتكوت لتاني يوم على التوالي..حاول تريح بس بعد إحتفالات إمبارح عشان تعر تحتفل بالليل من تاني

برج الدلو صحياً:

محتاج تريح وتنام كويس..ومحتاج تاكل اكل فيه دلع بشكل كبير..شوف ايه على مزاجك كدة وحاول تاكله النهاردة

تعرف على توافق برج الدلو مع باقي الأبراج النهاردة:

متوافق مع الحب

*****************************************************************************

إعرف حظك اليوم برج الحوت الجمعة 21 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

طلع مشاعرك من التلاجة النهاردة وحاول تحب وتتحب حبة..بدون تمثيل أو إدعاء لو سمحت

برج الحوت عملياً:

مفيش اجمل من التلقائية والبساطة النهاردة بالنسبالك..دة كنز كبير..حافظ عليه ارجوك

برج الحوت صحياً:

خد بالك وانتا سايق النهاردة من نفسك

تعرف على توافق برج الحوت مع باقي الأبراج النهاردة:

متوافق مع الابراج النارية

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.