إعرف حظك اليوم وتوقعات الأبراج اليوم معانا على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد: 

الخناقة بين الرجالة والستات ف الاساس خناقة sales مش اكتر..مفيش إختلاف على المنتج..قد مافي خلاف دايما على السعر

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الخميس 20 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

حب ف الطريق اليك واحتمال يكون في دلع كتير معاه..إستعد وجهز نفسك

برج الحمل عملياً:

في عدو ليك هيقع النهاردة ف بلاعة مفتوحة..متفرحش ومتشمتش..على الاقل ف العلن..وطلع اي حاجة على روحه انشالله باكو بسكوت

برج الحمل صحياً:

صحتك ف الاكل..من الاخر بس عشان تريح دماغك وتفكك من حكاية الدايت دي خالص يعني

إعرف توافق برج الحمل مع باقي الأبراج النهاردة

متوافق مع الابراج المائية والهوائية

*****************************************************************************

إعرف حظك اليوم برج الثور الخميس 20 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

بلا مشاعر بلا بتاع ياجدع..دلع نفسك ف طبق بسبوسة ابرك واحسن بلا وجع دماغ فاضي

برج الثور عملياً:

مفيش حاجة اسمها سلفني ضحتك..مفيش حد بيسلف حد ضحكة..دي حاجة بتيجي بالجهود الذاتية وبس

برج الثور صحياً:

متاكلش حاجة من الشارع ولا شكلها مش عاجبك ومريحك نفسها تماما النهاردة

إعرف توافق برج الثور مع باقي الأبراج النهاردة:

متوافق مع الابراج الترابية من حيث المبدأ فقط

*****************************************************************************

إعرف حظك اليوم برج الجوزاء الخميس 20 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

هتنبسط النهاردة بشكل كبير وانتا غالبا عارف دة كويس..يابختك

برج الجوزاء عملياً:

تحت اي بند متغنيش النهاردة قدام حد خالص..خالص

برج الجوزاء صحياً:

من حقك تقعد ف البانيو النهاردة الوقت اللي تحبه ومتطلعش الا لما تحس انك خلاص..مش عاوز تشوف مية وصابون تاني لمدة اسبوع

تعرف على توافق برج الجوزاء مع باقي الأبراج النهاردة:

متوافق مع الابراج الهوائية والمائية

*****************************************************************************

إعرف حظك اليوم برج السرطان الخميس 20 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

انانيتك ف الحياة مكشوفة وواضحة وهي سبب كل مشاكلك العاطفية تقريبا..متحاولش تتخلص منها لأنك مش هتصدق اصلا انك اناني وهتدور ف الحياة كلها تشتكتي وتتشحتف..ف ريح نفسك احسن واسكت..اسكت خالص النهاردة

برج السرطان عملياً:

انتا انسان عادي مش سوبر هيرو صغنتت زي مانتا متوهم ف نفسك او فاكر..انتا بني ادم عادي وزيك زي غيرك

برج السرطان صحياً:

حساسيتك تجاه النقد والتراب والكلام اللي مش على مزاجك هي اللي قالبة معدتك عليك مش اي حاجة تانية

تعرف على توافق برج السرطان مع باقي الأبراج النهاردة:

متوافق مع القمر..بس مش هتلاقيه ف السما

*****************************************************************************

إعرف حظك اليوم برج الأسد الخميس 20 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

مشاعرك محتاجة تتكهرب عشان ترجع تحس من تاني

برج الأسد عملياً:

كالعادة بتفكر ف مصيبة جديدة ترازي بيها نفسك..على وضعك..على وضعك يامعلم

برج الأسد صحياً:

متاكلش ملوخية النهاردة خالص.. إوعي

تعرف على توافق برج الأسد مع باقي الأبراج النهاردة:

متوافق مع الابراج الهوائية حبة بدافع المصلحة مش اكتر

*****************************************************************************

إعرف حظك اليوم برج العذراء الخميس 20 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

فكر بإيجابية وخليك ف النور..بلاش الضلمة والسكوت..اتكلم وافرح وانبسط..كفاية سكوت وخنقة من فضلك وفرفش حبة

برج العذراء عملياً:

إلبس الوش الخشب لأي حد يضايقك النهاردة..من غير مايستفزك تكسره على دماغه ياريت..ياريت يعني ميبقاش في عنف لفظي او جسماني من اي نوع

برج العذراء صحياً:

مشاكلك الصحية كلها نابعة من التوتر مش أكتر..ابعد عنه وانتا تبقى فل

تعرف على توافق برج العذراء مع باقي الأبراج النهاردة:

متوافق مع الابراج المائية والنارية.. يعني ممكن تحطهم علي بعض وتعمل "تششش" وانتا مستريح

*****************************************************************************

إعرف حظك اليوم برج الميزان الخميس 20 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

الخوف اللي انتا حاسه مرجعيته كلها ف انك بتفكر كتير ف بكرة ف حين ان بكرة اكيد احسن من دلوقتي ف كل حاجة..ثم ان بكرة اللي انتا خايف منه دة مش ملك حد..إحفظ الجملة دي..بكرة مش ملك حد

برج الميزان عملياً:

متخافش من حد النهاردة..كل اللي انتا خايف منهم دول مجرد ناس حواليك وتايهين زي مانتا تايه ف الحياة برضة بالظبط

برج الميزان صحياً:

ابعد عن النكد عشان النكد يبعد عنك وعن نفسيتك وبالتالي صحتك تبقي كويسة..اشرب مية كتير بس النهاردة ومتقفش ف الشمس خالص

تعرف على توافق برج الميزان مع باقي الأبراج النهاردة:

متوافق مع الابراج المائية

*****************************************************************************

إعرف حظك اليوم برج العقرب الخميس 20 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

المشاعر هادية ورايقة النهاردة وفي احتمال تكون مدندشة كمان مع استمرار جهوزية النفسية لإستقبال أمطار الدلع صباحا ومساء..طب ماكدة فل اوي..عاوز ايه تاني

برج العقرب عملياً:

حاول متبقاش غلاوي النهاردة بزيادة تجاه الناس وخصوصا اللي فيهم مختلف معاك ف الرأي..حسيت نفسك هتتعصب انسحب ومتخشش ف جدال وكبر دماغك وخلاص..مش لازم تطلع صح ف كل حاجة بالعافية

برج العقرب صحياً:

متكشرش ف وش الحياة وانبسط ورحرح وإعزم نفسك علي غدا دسم النهاردة واعتبره تحدي للدايت..مش هيجرى حاجة متقلقش

تعرف على توافق برج العقرب مع باقي الأبراج النهاردة:

متوافق مع الابراج الهوائية

*****************************************************************************

إعرف حظك اليوم برج القوس الخميس 20 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

مشاعرك مهمة ومتهملش فيها ومهم تقول انك محتاج إهتمام وتطلبه بصراحة مش عيب ابدا على فكرة..دة حقك..ثم ان تفاصيل الحياة ومشاغلها ممكن تلهي اي حد ومياخدش باله انه مطنشك.. فكرهم عادي ولو بتلميح..دة حقك

برج القوس عملياً:

ايام بايخة وهتعدي زي اي ايام بايخة عدت قبل كدة وفاتت..وهتفتكرها وهتضحك عليها ف المستقبل..اتقل بس واصبر..اتقل

برج القوس صحياً:

صحتك محتاج إهتمام ومتقولش كلمة"مش فارقة" دي خالص..لا فارقة وجدا وإهتم بدل ما أقول على كل حاجة..إهتم من فضلك

تعرف على توافق برج القوس مع باقي الأبراج النهاردة:

متوافق مع المزاج العالي النهاردة..اهرب من الزحمة بس مش أكتر

*****************************************************************************

إعرف حظك اليوم برج الجدي الخميس 20 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

كتوم النهاردة وبتميل للغموض بدون سبب واضح..واضح انك يامخبي حاجة ياعامل مصيبة ومش عاوز حد ياخد باله وفاكر ان سكوتك دة ميكانيزم دفاعي سليم..ماشي..مسيرنا نشوف ونعرف كل حاجة

برج الجدي عملياً:

محدش يقدر يطلع منك كلام انتا مش عاوز تقوله النهاردة..ثق ف الموضوع دة كويس النهاردة يامعلم

برج الجدي صحياً:

مهم تلعب إيروبيكس ولو نص ساعة اول ما تصحى من النوم وقبل ماتنام..مهم تعرق وجدا كمان..جايز دة يشتتك عن الافكار السلبية اللي انتا بتطبخها ف دماغك بقالك فترة

تعرف على توافق برج الجدي مع باقي الأبراج النهاردة:

متوافق مع الغموض والألوان الغامقة

*****************************************************************************

إعرف حظك اليوم برج الدلو الخميس 20 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

انتا صح..إحساسك صح وف محله..متشغلش بالك بأكتر من كدة النهاردة وريح دماغك

برج الدلو عملياً:

كتكتوت الابراج النهاردة ماشاء الله..إحتفل وإنبسط وكبر دماغك من اي حاجة من اي نوع..تجنب الرغي والرغايين وتجنب الناس اللي هوايتها النكد..انبسط وبس من فضلك النهاردة

برج الدلو صحياً:

صحتك كويسة بس محتاج حبة إهتمام خصوصا بالمسالك النفسية والجسمانية

تعرف على توافق برج الدلو مع باقي الأبراج النهاردة:

متوافق مع الابراج النارية النهاردة جدا..خير ان شاء الله

*****************************************************************************

إعرف حظك اليوم برج الحوت الخميس 20 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

مهم تراعي مشاعرك وتراعي معاها مشاعر غيرك من البشر.. زي مانتا مهم هما برضة مهمين زيك..إفتكر دة كويس النهاردة وإنتا بتتخانق معاهم

برج الحوت عملياً:

حاول تفتكر إمتى كانت أخر مرة صحيت فيها بتضحك على الولا حاجة..حاول تفتكر امتى كانت اخر مرة قومت من النوم مبسوط..مش متضايق ومخنوق..ياترى من فترة كبيرة ولا من قريب..ولو دة معادش بيحصلك..تعرف ايه هو السبب ولا لأ؟..مهم تجاوب نفسك على الاسئلة دي بنفسك..ولنفسك برضة

برج الحوت صحياً:

خد بالك وانتا بتتحرك عشان متتخبطش برجلك ف اي حاجة النهاردة وترجع تزعل وتجيب ناس تزعل

تعرف على توافق برج الحوت مع باقي الأبراج النهاردة:

متوافق مع الابراج اللي شايفة نفسها مثالية ومبتغلطش

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.