مفاجأة جديدة لفانز هاري بوتر .. واضح اننا مش هنستنى أفلام جديدة من Fantastic Beasts.. احنا كمان جايلنا روايتين طازة من العالم السحري بعد كام شهر.

الحكاية بدأت بإعلان من دار نشر بلوبيري إن احتفالا بمرور 20 سنة على بداية سلسلة هاري بوتر هيبقى في روايتين جداد من نفس العالم لكن مش عن نفس الأحداث.. يعني مش هنلاقي تكملة لأحداث السلسلة الأصلية سواء كانت من الأفلام أو من الروايات.. يعني مفيش فلاش باك هيتحول لقصة.

الأجمل بالنسبة لفانز كتير إن الكتب الجديدة من هاري بوتر هتتكلم أكتر عن المواضيع اللي كانت مواد دراسية في هوجورتس.. كأنك بتدرس السحر بالظبط لكن في شكل رواية

الكتاب الأول بعنوان Harry Potter: A Journey Through a History of Magic .. وزي ما العنوان بيقول هيبقى بيتكلم عن تاريخ العالم السحري وبدايته وكمان القصص ورا كل تعويذة ظهرت في السلسلة الأصلية.

والكتاب التاني بعنوان Harry Potter: a History of Magic.. ودة برغم انه العنوانين شبه بعض إلا انه بيتكلم عن الكائنات السحرية اللي ظهر جزء منها في الأفلام.

والكتابين هينزلو في شهر أكتوبر الجاي.. وكدة يبقى معانا 3 كتب جديدة لهاري بوتر بعد ما نزل كتاب Harry Potter and the Cursed Child السنة اللي فاتت ويبقى رسميا الجزء التامن من السلسلة الأصلية.

لكن دة مش معناه إن كل الفانز مرحبين بالحكاية عشان الخبر دة معناه إننا هيبقى عندنا توسيعة جامدة في عالم هاري بوتر.. بعد صدر فعلا فيلم Fantastic Beasts  وبدأ تصوير الجزء التاني منه والتوتال5 أجزاء كمان.. وطبعا زي ما قلنا كتاب Harry Potter and the Cursed Child واللي بدأ أصلا كمسرحية واتحولت لكتاب.

ودة بيخوف ناس كتير إن القصص تبقى متكررة أو متعادة أو الأسوأ إنها عالم السحر يتحول لمكنة فلوس مهمتها الوحيدة إنها تشفط فلوس من الفانز من غير أي اهتمام للقصة اللي هتتهلك.. ويمكن في الاخر يحصل تشبع عند الجمهور.

من ناحية تانية في ناس شايفة إنه من الاحسن إن أي جديد أو توسيعة تكون في الكتب الأول.. وكدة تبقى بالونة اختبار إذا نجحت يمكن تتحول لفيلم وإذا فشلت تبقى بعيدة عن ملايين اتربوا على السلسلة في الأفلام والكتب.