نهر ريوسيليست بكوستاريكا.. طبيعة أجمل من فلترات إنستجرام
تخيل كدة وإنتا بتتمشى على الإنترنت.. وقعت عينك على صور لنهر أو شلالات ف منتهى الجمال.. أكيد أول حاجة هتيجي ف بالك إنه أكيد معمولها editتعديل على موقع إنستجرام أو أي موقع تاني متخصص ف تعديل الصور.. لكن التوقع دة مش هينفع تطبقه على صور نهر ريو سيليست بكوستاريكا لإن صوره الطبيعة مش محتاجه لفلترات إنستجرام
أسطورة نهر ريوسيليست السماوي
خلينا نروح بعيد بعيد لحد أمريكا اللاتينية.. وتحديدا لـ كوستاريكا عشان نعرف قصة نهر من أجمل الأنهار ف العالم وهو نهر ريوسيليست إللى معناها "النهر السماوي".. والأسم دة وراه أسطورة شعبية بتقول إن الألهة وهما بيرسموا السما كانوا بيستخدموا مية نهر ريوسيليس كلون عشان يلونوها.. ودة عشان هي بتبرق ولونها ميتخلفش عن لون السما ف حاجة.. لكن الحقيقة إن السبب ورا اللون الأزرق الفظيع لمية النهر هي معادن الكبريت وكربونات الكالسيوم.. والمعادن دي وصلت لمية النهر بسبب وجود بركان تينوريو قريب منها
طريقة الوصول لنهر ريوسيليست
إنتا محتاج تتقمص دور طرزان لإنك هتلاقي نفسك مضطر تمشي حوالي ساعة وسط الغابات المطيرة الإستوائية المليانة بالقرود البيضة والفراشات الزرقا وحيوان الكسلان وعدد كبير جدا من الحيوانات الغريبةلحد ما توصل لمكان الشلالات.. عشان كدة لازم تكون طرزان ف نفسك
وبعد ما تعدي المرحلة دي هتلاقي نفسك قدام شلال النهر طوله 300 قدم.. المميز ف الشلال دة إنها جاي من ينابيع سخنة للبركان القريب من الشلال.. ودة بيخلي المية دافية جدا ودة مغري جدا لأي حد بيحب السباحة إنه ينزل ياخدله غطس
دلوقتي إنتا بقى معاك معلومات وعنوان المكان يعني ملكش حجة.. ف لو إنتا من الناس إللى بتحب رياضة المشي الطويل الـ hiking ونفسك تزور مكان فيه نهر وشلالات من أجمل الأماكن الطبيعية ف العالم.. يبقى لازم تحط نهر ريوسيليست ضمن الأماكن إللي لازم تزورها