إعرف حظك اليوم وتوقعات الأبراج اليوم معانا على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد: 

اللي هرب منك وإنتا بتموت ميستاهلش يسكن قلبك وإنتا بتعيش.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الأربعاء 19 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

عد النهاردة كدة وشوف كام عربية قديمة شكلها حلو هتقابل نظرك النهاردة..هتبقى حاجة حلوة وهتشغلك عن ان بداية الاسبوع دة كانت مملة ورزلة..نتعشم ونتفاءل يمكن النهاردة يكون حلو وبكرة احلى منه..نتمنى كدة

برج الحمل عملياً:

وفيها ايه لما تاكل شيكولاتة بتاعة حد تاني كان مخبيها ف التلاجة..ماهو اللي غلطان ومش عارف يخبي شيكولاته كويس..إنتا برئ..ملكش ذنب

برج الحمل صحياً:

راعي نظرك ومتدققش ولا تمققش عينيك ف اي حاجة عافية وغصب وإقتدار..ريحهم حبة عشان تعرف تقلب بيهم نور حب على صحراوي المشاعر للناس الحلوة اللي سايقة عكس وانتا بتحبها.

إعرف توافق برج الحمل مع باقي الأبراج النهاردة

متوافق مع الصبر والتأني والابراج الهوائية

*****************************************************************************

إعرف حظك اليوم برج الثور الأربعاء 19 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

متاكلش حاجة متسبكة بقوطة كتير النهاردة خصوصا لو كانت كلام حلو وبراق وشيك وشكله حلو من برة ومن جواه مخوخ واجوف ورنان على الفاضي زي يفط النيون بالليل كدة..خليك ف البسيط اللي تصدقه وتملى بيه دماغك وبس

برج الثور عملياً:

الشغل مش طبيخ ولا انتا بتعرف تطبخ كويس لا مؤمرات ولا دسائس ولا كلام من دة خالص..انتا ف السليم وملكش ف العوج..ودة هيبقى سبب اساسي ف نجاحك ان شاء الله

برج الثور صحياً:

متاكلش حاجة متسبكة بقوطة النهاردة عشان هتعملك حموضة بدون داعي

إعرف توافق برج الثور مع باقي الأبراج النهاردة:

متوافق مع الابراج المائية

*****************************************************************************

إعرف حظك اليوم برج الجوزاء الأربعاء 19 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

طول مانتا بتدور على الكمال مش هتستريح ولا هتتكيف.. شوية مرونة عشان العملية تمشي معاك حبة..حبة مرونة يرحمكم الله..شوية مرونة

برج الجوزاء عملياً:

حاول متتعصبش النهاردة مهما حصل وإعتبر مودك أمانة مهم تحافظ عليها

برج الجوزاء صحياً:

لو نفسك ف مانجا يبقى تاكل مانجا..لغوص براحتك ف المانجا اساسا..براحتك

تعرف على توافق برج الجوزاء مع باقي الأبراج النهاردة:

متوافق مع الابراج النارية والهوائية والمائية..واضح انك محبوب النهاردة حبتين باين

*****************************************************************************

إعرف حظك اليوم برج السرطان الأربعاء 19 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

متتكسفش من مشاعرك وصرح بيها بمنتهى الصراحة..متتكسفش تقول انك اناني ومبتحبش الا نفسك..متتكسفش تقول انك عارف انك شايف نفسك اهم من اي حد ومتداريش دة..طالما قررت تعمل الحاجة يبقى متتكسفش تتكلم عنها..دة حق الانانية عليك يا اخي والله المفروض يعني..ولا ايه

برج السرطان عملياً:

متتكسفش تطالب بحقوقك المادية والنفسية ف شغلك او دراستك..حساسيتك المفرطة مش لازم يتعمل حسابها ولا لازم الكون كله يقف دقيقة حداد ف كل مرة انتا بتزعل فيها..امال ايه..انتا مش محور كل حاجة..ولا احنا كلنا كومبارسات ف حياة حضرتك اصلا..فوق يابيه بدل الحياة ماتفوقك بالعافية

برج السرطان صحياً:

صحتك كويسة وزي الفل..انتا بس بتحب النكد مش اكتر

تعرف على توافق برج السرطان مع باقي الأبراج النهاردة:

متوافق مع نفسك ورغبات نفسك وبس..خليها تنفعك

*****************************************************************************

إعرف حظك اليوم برج الأسد الأربعاء 19 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

متاكلش حاجة فيها شطة خالص النهاردة..ابعد عن المرازية والناس اللي كيفها ترازي بالمشوار..انتا النهاردة حساس حبتين..خليك مع نفسك احسن

برج الأسد عملياً:

ركز ف اللي وراك وبس..تخلص شغلك من غير خناق وتنزل تضرب كوز درة ف اي حتة وتروح

برج الأسد صحياً:

نفسيتك محتاجة افلام عربي قديمة حبة وفشار

تعرف على توافق برج الأسد مع باقي الأبراج النهاردة:

متوافق مع الهدوء والابراج الهادية

*****************************************************************************

إعرف حظك اليوم برج العذراء الأربعاء 19 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

مشاعرك مستقرة وان كنت بتفتقر للدلع بقالك حبة..مسيرك تتدلع وتتحب متقلقش..هتنبسط قريب

برج العذراء عملياً:

مشاكلك المالية دي انتا السبب فيها مش حد تاني وانتا عارف كدة كويس..روق وخطط ف ورقة كدة مصاريفك واحسبها بالراحة من تانيو هتلاقي حل كويس على اخر النهار

برج العذراء صحياً:

راعي قولونك الفترة دي من فضلك ف الاكل..راعيه عشان ميقرفكش معاه

تعرف على توافق برج العذراء مع باقي الأبراج النهاردة:

متوافق مع الابراج الترابية اكتر من المائية

*****************************************************************************

إعرف حظك اليوم برج الميزان الأربعاء 19 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

انتا تصحى كدة وتفرفش وتستحمى وتتشيك وتلبس وتحط بارفان وتنزل تواجه العالم بقلب حنين من جواه قاسي ومقرمش من براه

برج الميزان عملياً:

راسك لفوق مهما رجلك داست ف طينة..ياما دقت على الراس طبول وانتا سيد العارفين..هتقوم وهتصمد وهتبقى زي الفل..ثق ف كدة

برج الميزان صحياً:

صحتك كويسة بس مناعتك محتاجة إهتمام حبة..ركز ف الكرنب الاحمر الصغنن دة..وف البروكلي وف التوم..وانتا تبقى فل الفل

تعرف على توافق برج الميزان مع باقي الأبراج النهاردة:

متوافق مع قيمتك الحقيقية ف الحياة وبس

*****************************************************************************

إعرف حظك اليوم برج العقرب الأربعاء 19 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

واقف متجمد ليه..مستني ايه بالظبط يحصل؟..علامة ولا اشارة ولا درس من الحياة..اتحرك وانبسط

برج العقرب عملياً:

الحياة مبتصرفش مكافأت لحد ياحبيبي..مبيحصلش..لازم تطالب بحقوقك طول الوقت وبشكل كويس ونايس مش بخناق او نزاع او تهديد..مهم تبان واثق ف نفسك

برج العقرب صحياً:

راعي شعرك حبة النهاردة ودلعه إحتياطي..محدش يعرف جايز يزورك كائنات فضائية بالليل ولا حاجة

تعرف على توافق برج العقرب مع باقي الأبراج النهاردة:

متوافق مع الكائنات الفضائية

*****************************************************************************

إعرف حظك اليوم برج القوس الأربعاء 19 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

بهجة لكل اللي يعرفوك ودمك خفيف وزي العسل..اركن جنانك النهاردة وانبسط مع الناس وآجل الحب حبة.. مش هيطير متقلقش

برج القوس عملياً:

بلا ذكاء بلا شخصية بلا عمل بلا بتاع..النهاردة تعتمد على جاذبيتك وبس

برج القوس صحياً:

صحتك كويسة بس في قلة نوم وآرق تقريبا..اكتب كل افكارك اللي بتفكر فيها قبل ماتنام وانتا تعرف تنام كويس وبسهولة..فضيها من دماغك ارميها على ورق..ولما تعمل كدة وتيجي تنام ياريت متقعدش تعصر دماغك وتفكر ف افكار غيرها ومتعرفش تنام..ياريت يعني التصرف النبيه دة ميحصلش..ياريت

تعرف على توافق برج القوس مع باقي الأبراج النهاردة:

متوافق مع القراية لسة بشكل كبير برضة زي امبارح..واضح انك بتتثقف من ورا باقي الابراج

*****************************************************************************

إعرف حظك اليوم برج الجدي الأربعاء 19 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

اللي يتلسع من شوربة خياله طبيعي ينفخ ف زبادي الواقع

برج الجدي عملياً:

مش طبيعي ابدا انك تحاسب الناس ف الواقع على حاجات عملوها او قالوها ف خيالك انتا بس..دة اسمه جنان ثلاثي الابعاد

برج الجدي صحياً:

صحتك كويسة بس محتاج تسقي رجليك اخر النهار ف مية دافية وملح..مش عشان بتوجعك ولا حاجة بس دلع برئ عادي ومن حقك

تعرف على توافق برج الجدي مع باقي الأبراج النهاردة:

متوافق مع الحنية والتفهم

*****************************************************************************

إعرف حظك اليوم برج الدلو الأربعاء 19 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

مشاعرك مشوشة الفترة دي عشان محدش حواليك من اللي بيحبوك وبتحبهم فاهمك بشكل حقيقي او مهتم اصلا..كل واحد مهتم بس باللي هو عاوزه وبس..ودة مضايقك..الانانية مضايقاك..رغم انك اناني..بس في فرق كبير..انتا مبترازيش حد بانانيتك دي خالص الا نادرا..هما بيصدروها ف وشك بقى بفجاجة متفهمش ليه..جايز عشان انتا بتستحمل الناس وبتاخدهم على قد عقلهم

برج الدلو عملياً:

متتواضعش النهاردة ولا تاخد حد على قد عقله..خلاص..زمن الطيبة راح ومات وإندفن

برج الدلو صحياً:

طول ما الجو حر لازم تشرب مية كتير جدا جدا..كمان خلي اكلك خفيف النهاردة..خصوصا بالليل

تعرف على توافق برج الدلو مع باقي الأبراج النهاردة:

متوافق مع الفن والابداع وأحلام اليقظة كالعادة

*****************************************************************************

إعرف حظك اليوم برج الحوت الأربعاء 19 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

حاجتين تاخد بالك منهم النهاردة..نمرة واحد بلاش تخترع لنفسك مشاكل ملهاش لازمة وملهاش اساس ف الواقع الملموس..نمرة اتنين هتلاقيها تحت مش هنا..

برج الحوت عملياً:

نمرة اتنين بقى بتقول انك لازم تبعد عن اي مكان فيه عياط عيال صغننة خالص..خصوصا لو ف أحلامك..خصوصا يعني

برج الحوت صحياً:

صحتك كويسة بس احلامك ممكن تقلب بكوابيس عشان الحر والرطوبة وتقلق نومك..معلش..فترة وتعدي

تعرف على توافق برج الحوت مع باقي الأبراج النهاردة:

متوافق مع المثالية الجمالية الخيالية

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.