تخيل معايا كدة ف يوم وإنتا رايح السوبر ماركت عشان تجيب لمامتك خمس بيضات وكيس فانيليا و كيس بيكنج بودر عشان تعملك الكيكة إللي بتحبها.. ف لاقيت كائن فضائي بيتخانق مع صاحب السوبر ماركت عشان  عايز فكة ومش راضي ياخد بالباقي لبان.. ياترى وقتها هتخاف وتجري.. ولا هتسلم عليه وتاخد سليفي.. ولا هتدورله معاك على فكة خمسين

سؤال صعب وممكن تكون شايفه مجرد تهريج وإن الكائنات الفضائية أسطورة بنقابلها بس ف أفلام الخيال العلمي.. لكن رأي العلماء كان مختلف وبيقول إنك ممكن ف أي وقت تقابل كائنات فضائية.. عشان كدة لازم تستعد وتنضف بيتك وترشه لأن الكائنات الفضائية ممكن تخشه  

إهتمام علماء الفلك بالبحث عن حياة خارج كوكب الأرض حاجة مش جديدة.. وخصوصا إنها فكرة ورادة ومنطقية علميأً ورياضياً.. عشان كدة الأكاديمية العالمية لعلوم الفضاء IAA التابعة لبرنامج SETI أسست لجنة دائمة سنة 1989 كل مهمتها إنها تبحث عن الكائنات الفضائية.. وكل فترة بيعمل مسح كامل للفضاء جايز يلاقوا إي إشارة تثبت وجود أي حاجة.. بس بالرغم من كدة هما مستمرين ف البحث وشايفين أنهم أكيد هيوصلوا لحاجة خلال العشرين السنة الجايين.. ربنا يوفقهم

لكن السؤال المهم ياترى أيه إللي هيحصل لو لاقوا كائنات فضائية 

طبعا الأكاديمية العالمية لعلوم الفضاء IAA مش هتسيب أي حاجة للظروف وحطت الإستراتيجيات اللي هتتعامل بيها مع الحدث المهم دة.. ف في البداية هيتأكدوا إن الإشارة من خارج الأرض وإنها مش مجرد مقلب أو خدعة.. بعد ما تتأكد هتأسس تنظيم عالمي خاص بالحدث..بعدها هتبلغ الأمين العام للأمم المتحدة عشان يكون ف الصورة.. أما بالنسبة للناس ف مش هيعرفوا على طول عشان ميتخضوش.. لكن هيبدأوا يمهدولهم واحدة واحدة عشان الصدمة..وبعدها نقييم الأفراح والليالي الملاح 

الخلاصة..

دلوقتي إحنا عرفنا الطريقة إللي هيستعد بيها العلماء لإستقبال الكائنات الفضائية.. الدور والباقي علينا إحنا ياترى هنعمل أيه عشان نكون قد الحدث دة.. ودي حاجة محتاجة تفكير وترتيب.. بس أتمنى إن الإستعداد دة ميقلبش ف الاخر ليوم واقفة العيد.. وتلاقي ماماتك بتصحيكي تروقي الصالون عشان جيليكم كائنات فضائية ربنا يستر.. أوريفوار