إعرف حظك اليوم وتوقعات الأبراج اليوم معانا على دوت مصر كل يوم..وخد بالك حظك اليوم هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دة دايما متوقف على اختيارك وعلى مزاجك ومودك وظروفك لوحدك.

*******************

كلام جد:

اهم حاجة ممكن الانسان يعملها ف حياته على الكوكب دة هو انه يحب ويتحب..مش اكتر

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل الاثنين 17 يوليو 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً:

قلبك اهم من عقلك النهاردة بمراحل..بس مش معنى كدة انك متستخدمش عقلك ف تحديد مشاعرك..مهم تعرف كويس انتا حاسس ايه وليه وهل انتا مبسوط ولا لأ..مهم تحدد مشاعرك

برج الحمل عملياً:

واضح انك قلبت شيكولاتة بتاعة حد من التلاجة امبارح بالليل..عموما لو دة محصلش وانتا مظلوم ف تقدر تقلبها النهاردة مش ازمة خالص..اهم حاجة متتقفش وميكونش دة كمين معمولك على غفلة

برج الحمل صحياً:

طبطب على روحك بالمزيكا النهاردة وحاول تعمل شوية تمرينات اي كلام كدة قال يعني بتلعب رياضة عشان تخس وتظبط جسمك..مهم تفش غلك ف حاجة النهاردة حبة

إعرف توافق برج الحمل مع باقي الأبراج النهاردة

متوافق مع طيبة القلب ف العموم

*****************************************************************************

إعرف حظك اليوم برج الثور الاثنين 17 يوليو 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً:

عدم اكتراثك لمشاعر الاخرين هيلبسك ف حيطة الوحدة قريب ف خد بالك وجدا وبلاش عند ف الموضوع دة خالص لو سمحت

برج الثور عملياً:

راعي ف التعامل ان كلمة واحدة غلط ممكن تبوظ حاجات كتير بدون داعي..متحدفش طوب وانتا بتتكلم مع حد النهاردة..خليك لطيف وظريف وف حالك احسن

برج الثور صحياً:

صحتك مهمة زي مشاعرك بالظبط ومهم تصدق وتآمن انك من حقك الافضل ف كل حاجة وخصوصا ف الايس كريم

إعرف توافق برج الثور مع باقي الأبراج النهاردة:

متوافق مع الابراج النارية بس حاسب تتلسع

*****************************************************************************

إعرف حظك اليوم برج الجوزاء الاثنين 17 يوليو 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً:

قلبك مش مبسوط عشان انتا مبتديش لنفسك فرصة تنبسط حضرتك..طول الوقت وف كل فرصة عاوز تجادل وتتناقش وتثبت وجهة نظرك وخلاص..قصاد حبيبك مش مهم تكسب..دة مش جيم ولا سباق مهم فيه مين صح ولا مين غلط..ابدا يعني..مهم فيه بس انك تكون بتحبه وعاوز تبسطه وخلاص

برج الجوزاء عملياً:

واضح ان في باور جامد اوي عندك النهاردة..مهم تستخدمه وتوظفه ف حاجة مفيدة ياريت..آجر عجل مثلا ولا انزل اخرج ولا اعمل اي حاجة بدل قعدتك دة ياجدع قوم

برج الجوزاء صحياً:

الرطوبة والفرهدة مبهدلة مزاجك طبعا زينا كلنا ..حاول تفرفش نفسك وتفرفش جسمك بدش طويل ساقع وبعده مسرحية ظريفة كدة مقاولات قبل النوم

تعرف على توافق برج الجوزاء مع باقي الأبراج النهاردة:

متوافق مع الجمال ف كل حاجة وخصوصا ف الأكل

*****************************************************************************

إعرف حظك اليوم برج السرطان الاثنين 17 يوليو 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً:

مشاعرك كويسة والنفسية تمام وانتا كويس وزي الفل..ولوحدك

برج السرطان عملياً:

اللي بتخططله هينجح..اهم حاجة تداري على شمعتك نورها يزيد..وتنورلك لوحدك..خد بالك بس من الزحمة النهاردة وابعد عنها ياريت وتجنب الشمس الصبح برضة عشان ممكن تبقى بايخة وتصدعك بدون داعي

برج السرطان صحياً:

صحتك زي الفل بلاش وهم

تعرف على توافق برج السرطان مع باقي الأبراج النهاردة:

متوافق مع رغباتك ومع اللي انتا عاوزه وبس

*****************************************************************************

إعرف حظك اليوم برج الأسد الاثنين 17 يوليو 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً:

متبالغش ف ردود افعالك النهاردة خصوصا مع الناس اللي بتحبهم او بتكراش عليهم من تحت لتحت عشان متتكشفش..بلاش..مش وقته خالص يابرنس

برج الأسد عملياً:

في مفاجأة ملبسة وحلوة وكويسة هتحصلك النهاردة..إبقى اعمل نفسك متفاجئ بيها بقى لما تحصل وإنبسط

برج الأسد صحياً:

نقص المية ف الجسم بيوهم وبيجيب هلاوس خلي بالك..شيل معاك ازازة احتياطي..واهو لو مشربتهاش تنفع برضة تحدف بيها اي حد مضايقك

تعرف على توافق برج الأسد مع باقي الأبراج النهاردة:

متوافق مع اللون الاصفر الكناريا..بس مش ف الهدوم طبعا..استحالة

*****************************************************************************

إعرف حظك اليوم برج العذراء الاثنين 17 يوليو 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً:

الشحتفة مش اكتر من افساد لوقت كان ممكن يكون كويس..على حس وقت تاني فات مكانش كويس..يعني انتا زعلان انه عدى عليك وقت مش كويس ف بتقوم مبوظ بالشحتفة والحزن اي وقت كان ممكن يكون كويس ومميز..لا فالح والله

برج العذراء عملياً:

خليك مع النور ف كل حاجة النهاردة..خليك مع التفاؤل والايجابية..خليك مع اللون الاخضر وابعد عن الالوان الغامقة..خليك مع نفسك مش مع حد مش فاهمك او مش مقدرك او مش مقدر مجهودك وشغلك

برج العذراء صحياً:

المزاج كويس بس بلاش تجتر ف احزانك ف وقتك الفاضي النهاردة ياريت..وبلاش حلويات برضة ولا مخلل

تعرف على توافق برج العذراء مع باقي الأبراج النهاردة:

متوافق مع الابراج الهوائية نص نص

*****************************************************************************

إعرف حظك اليوم برج الميزان الاثنين 17 يوليو 2017 مع عبدالله أحمد..

الميزان : من 21 سبتمبر إلى 20 اكتوبر

برج الميزان عاطفياً:

فكك من اي حاجة إنتا جميل.. سيبك من عيوبك وركز ف مميزاتك..يعني مثلا..انتا حد لما بيحط اي حاجة ف دماغه بيجريلها فُريرة وبيحققها..ودي حاجة جميلة جدا وتحترم بصراحة حتى لو ف المصايب اللي بتعملها ف مشاعرك كل فترة

برج الميزان عملياً:

مهما كانت العوائق والاوبستكيلز بتحقق اهدافك مع الوقت..بمثابرتك وبمجهودك وبطاقتك المهولة التي لا تنضب..صح ولا مش صح يادلعدي الكلام دة..بطل إكتئاب بقى وفرفش..انتا كتكوت ف نفسك النهاردة رغم كل شيء

برج الميزان صحياً:

مهم تفرفش قبل بالليل..فال مش كويس النفسية تبقى سودة والليل بيهجم..لون نفسيتك بألوان حلوة

تعرف على توافق برج الميزان مع باقي الأبراج النهاردة:

متوافق مع المزاج العالي ف الناس وف المزيكا وف الافلام

*****************************************************************************

إعرف حظك اليوم برج العقرب الاثنين 17 يوليو 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً:

انتا مش محور الكون..ف متاخدش كل حاجة بتحصل حواليك علي انها موجهة ليك لوحدك وانتا المقصود بيها..انتا مش مهم اوي كدة بالنسبة للحياة

برج العقرب عملياً:

متاخدش حياتك بشكل شخصي على اعصابك..دي مجرد حياة وانتا احد اشكال الحياة دي علي الكوكب وف الكون..في غيرك نبات وحيوان وميكروبات واكيد اشكال حياة كتير جدا مختلفة ومنعرفهاش ولا نهتم بيها ولو كل كائن ظن انه عشان عاقل وواعي وموجود يبقى الحياة ملزمة تجاهه بأي شيئ..اعتقد يبقى غلطان غلط السنين من الجيزة للتبين

برج العقرب صحياً:

انتا مش كامل ولا برفكت ولا هتكون..عادي زيك زي غيرك فيك ديفوهات..بس المهم تبقى متصالح معاها..مش مركز معاها وشايفها ف المراية طول الوقت وبس

تعرف على توافق برج العقرب مع باقي الأبراج النهاردة:

متوافق مع الابراج كلها وربنا يوفقك انتا وهما وتجيبوا ضلفها قريب

*****************************************************************************

إعرف حظك اليوم برج القوس الاثنين 17 يوليو 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً:

مشاعرك جميلة رغم انها احيانا بتبقى استحواذية وبيغلبها التملك والرغبة ف السيطرة..بس بتعرف تحب ودة المهم وبس

برج القوس عملياً:

هتخرج من مشكلة كبيرة النهاردة..بقترح تحتفل بالليل بالموضوع دة سواء حصل او لأ..إعتبره إحتفال بجمالك وجمال اخلاقك وطيبة قلبك

برج القوس صحياً:

متغسلش شعرك وتقف قدام المروحة..بلاش جنان

تعرف على توافق برج القوس مع باقي الأبراج النهاردة:

متوافق مع الافكار الحلوة القيمة..متوافق مع الدلع..ومتوافق مع المساچ العقلي بشكل كبير جدا برضة..واضح انك هتقرا كتب ثرية وعميقة النهاردة باين

*****************************************************************************

إعرف حظك اليوم برج الجدي الاثنين 17 يوليو 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً:

متزعلش نفسك من حاجة او حد ميستاهلش..كبر دماغك وهتشوفهم متكهربين ف مشاعرهم قريب..قريب جدا كمان..الحياة مبتسيبش حد ف حاله..متقلقش

برج الجدي عملياً:

اللي يقول عليك يقول..هو الكلام بفلوس تفتكر..اي حد ممكن يقول اي حاجة علي اي حد..مسيرهم كلهم يتقال عليهم زي ماقالوا عليك بالظبط..الفكرة بس..هما قالوا عليك ايه بالظبط ضايقك كدة؟..وهل ضايقك الكلام ولا ضايقك انهم صح؟..دة السؤال المهم بصراحة

برج الجدي صحياً:

صحيا انتا زي الفل ومفكش حاجة بس محتاج تبطل تتسحب بالليل وتروح ف اتجاه التلاجة..ارحم نفسك وارحم التلاجة حبة

تعرف على توافق برج الجدي مع باقي الأبراج النهاردة:

متوافق مع السواقة النهاردة ومع القيادة..ف كل حاجة

*****************************************************************************

إعرف حظك اليوم برج الدلو الاثنين 17 يوليو 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً:

مميز ف مشاعرك وناجح ف اي حب بشكل كبير جدا ورائع واحيان اوريجنال جدا..بس محدش هيفهمك ابدا للأسف

برج الدلو عملياً:

هتخربها وهتقعد على تلها النهاردة.. هيبقى مشهد فيري لافلي بصراحة كالعادة يعني

برج الدلو صحياً:

متضربش حد لا بإيدك ولا بكلامك..بلاش..دي ناس مش قدك ولا قد كلامك ولا قد غضبك ولا شرك..خليك نايس او تجنب الناس النهاردة خالص

تعرف على توافق برج الدلو مع باقي الأبراج النهاردة:

متوافق مع الاحترام وبس وهتفرضه وهتشوف

*****************************************************************************

إعرف حظك اليوم برج الحوت الاثنين 17 يوليو 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً:

الشر مش رياضة..انتا فهمت غلط غالبا باين

برج الحوت عملياً:

إفرد جناحاتك وطير لو تعرف..لو معرفتش يبقى انتا بني ادم معانا علي الارض هنا..اخرك تمشي علي رجليك او تسوق عربية او تركب مواصلات..انتا مش طيور عشان تحس انك محبوس علي الارض كدة..بس سيبك..انتا على وضعك..على وضعك

برج الحوت صحياً:

اهتم ببشرتك حبة ومتقعدش عرقان او عطشان خالص النهاردة

تعرف على توافق برج الحوت مع باقي الأبراج النهاردة:

متوافق مع احساسك بالاخرين وتعاطفك معاهم

*****************************************************************************

حظك اليوم ممكن يكون موجود وممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات حظك اليوم بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وبكرة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك اليوم بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم كل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.

اعلان حظك اليوم
اعلان حظك اليوم