لو إنتا من الناس إللي بتحب تربية القطط.. ف إسمحلي النهاردة أصدمك فيهم وأكشفلك الجانب المظلم من حياتهم وخصوصا الذكور منهم.. في الحقيقة هما أنانيين جدا حتى مع أولادهم.. وعشان نأكدلكم المعلومة دي وميبانش إننا بنقول كلام وخلاص هنحكيلكم حكاية صغيرة عن القط "كرة اللحم" و مراته "موشي"

دافني وكون واه إتنين متجوزين عايشين في مدينة هونج كونج ف الصين وعندهم قط أسمه "كرة اللحم"  -طبعا الأسم كناية عن طفاسته وحبه للأكل- المهم إنهم جوزوه لقطة أسمها موشي وخلف منها 4 قطط جمال وكيوت جدا لكن للأسف من هنا بدأت المشكلة

لما أطفال كرة اللحم خلصوا مرحلة الرضاعة وبدأ دافني وكون واه يقدمولهم أكل بزيادة عشان يكفي العيلة كلها.. "كرة اللحم" مفهمش كدة وإفتكر إن كل الأكل دة بتاعه لوحدة وبدأ ياكل وجبته ووجبات ولاده من غير حساب لحد ما وزنه زاد جدا..

كون واه لاحظ سلوك "كرة اللحم" الأناني وقرر هو ومراته إنهم لازم يغيروا حياته ويعلموه إزاي يبقى أب كويس عنده أخلاق مش أناني وعايش لنفسه بس.. دة غير إن سلوكه دة بدأ يتنقل لأولاده ويتعلموا منه الطفاسة.. ومن هنا بدأوا مرحلة التغيير 

صمم كون واه أوضة سفرة مخصوص للقطط بس بطريقة ذكية تحمي نصيب كل قط من غير ما حد ياكل أكل التاني.. ف جاب خشب وقسمه خانات وحط ف كل خانة ميزان للأكل عشان يحسب الكمية المناسبة اللي محتاجها كل قط..  وبيدخل كل قط ياكل لحد ما الأكل يخلص وبعدين يخرج

الطريقة دي كانت فعالة وناجحة جدا إنها تسيطر على وزن "كرة اللحم"وبالرغم إنه لسه موصلش للوزن المثالي لكن على الأقل هو بقى على الطريق الصحيح وقدر يتحكم ف رغباته وشهيته ناحية الأكل 

الخلاصة ..

الأب ف كل المخلوقات ديما هو أول قدوة لأولاده.. وزي ما بيتصرف هيتصرفوا.. عشان كدة متفضلش تدي أوامر لولادك وتطلب منهم يعملوا وميعملوش وإنتا قاعد مكانك.. هما لازم يشوفوا دة لايف قدام عينهم ودي أحسن طريقة للتربية.. أوريفوار 

منقول عن boredpanda بتصرف..