دلع ودنك معانا

ودنك هي حلقة الوصل بينك وبين العالم.. يعني لازم تهتم بيها وتقدرها اكتر من كدة على فكرة وهي مطالبها سهلة وبسيطة.. يعني مش هتطلب منك تخرجها ولا تأكلها ف مطعم غالي كل اللي هي محتاجاه إنها تتسلطن وتسمع حاجات تنعشها وتفرفشها من فترة للتانية ..وبما إن مهمتنا هي إسعاد ودان كوكب الأرض ..ف قررنا نفضي نفسنا كل يوم حبة عشان بس ننقيلك الحاجات اللي تفرفشها وتنعشها..

وكل المزيكا الجميلة دي هتلاقوها بكل الأذواق والمقاسات ف اكتر من بلاي ليست ف قسم المزيكا عندنا.. وأكيد هتلاقي اللي يناسب ودنك ومزاجك..

النهاردة هناخد ودانكم ف مشوار صغير..لعالم النمر الأسود أحمد زكي  و هنحاول نهرب معاه من الحزن والكآبة  للفرحة والفرفشة وهنفتكر معاه أفلامنا اللي بنحبها.. ف منيو الأغاني النهاردة هيكون ميكس من أغاني أفلام أحمد زكي زي كابوريا وإستاكوزا وهيستريا والبداية وغيرهم.. نتمنالكم يوم متفائل ولذيذ.. إستمتعوا