زادت الأسعار تاني.. والكل بيشتكى.. غنى وفقير.. التفاصيل الاقتصادية كتيرة وشائكة.

وما بين مؤيد ومعارض، حصل كتير من الجذب والشد والتحليل والتبرير.. و النتيجة واحدة على الجميع أعباء إضافية وضغط اقتصادي.

الحقيقة أنا هنا في المقال مش هتناول الموضوع من الجانب الاقتصادي ومدى صحة هذه القرارات لإني غير متخصصة.. ده غير إن المواطن البسيط العادي حتى لو اقتنع بالتحليل الاقتصادي أو هو في الأساس مقتنع برده هو محتاج حل يساعده في توفير نفقاته ويخفف من عليه الضغط المادي.

وجدت إن فيه حلول بإيدينا احنا كمواطنين، من منطلق ابدأ بنفسك ، وهي حلول تعديل سلوكنا الاستهلاكي.. اللى ماشية عليه كل الشعوب المتقدمة الغنية منها قبل الفقيرة.

هستعرضها لكم فى نقاط محددة موجزة تساعدنا على تذكرها بسهولة ..

مفيدة لتعليم الجيل الناشىء على حسن السلوك والترشيد.. و مناسبة لكل المستويات الاجتماعية والمادية

خطوات سهلة لكن محتاجة من كل واحد إنه يكون عنده الارادة و الصدق فى التنفيذ ..

علشان توفر :

بعض البيوت فيها أكتر من عربية.. وعليه عربية واحدة في البيت اللي تتحرك ووصلوا بعض.
قطع الخبز أجزاء... خد اللي يكفيك واحفظ الباقي في التلاجة
مش لازم كل يوم قاعدة علي القهوه.. قلل أيامها... اختار يومين مناسبين..لا تحرم نفسك ولا تكلف فوق طاقتك.
استعمل الموبيل فى الضرورة فقط.. مش لازم نحكى تفاصيل اليوم ولا نتصل على الأمور البسيطة.
اطبخ على أدك وقلل العزومات .
اطفى أنوار البيت أو الغرف الغير متواجد بها  .. انزع فيش الاجهزة الغير مستخدمة
شغل التكييف فى المكان اللى إنت قاعد فيه فقط و خليه على درجة حرارة 24 .. هتكون مناسبة جدا
حدد لنفسك أو الاولاد مرتين خروج فى الشهر للفسح ... كل أسبوعين .. والاسبوع اللى مافيش فيه خروج فرصة تستغل الوقت فى البيت بممارسة هواية أو ترتيب أو الاستمتاع بالوقت مع أفراد الأسرة .
المشوار اللى ممكن تمشيه .. اركن العربية واتحرك .. امشى .. منها رياضة وتوفير.
فرصة النوم مبكرا .. تقلل استخدام أجهزة البيت وتوفير الكهرباء ..
قلل عدد ساعات استخدام السخانات الكهربائية وتشغيله فى وقت الحاجة إليه فقط وإمكانية استبدالها بالسخانات الشمسية.
علم اولادك ركوب العجل يتحركوا بها .. توفير لتمن التاكسي و رياضة وتوفير للوقت  .
الباقى من أكلك احفظه فى الفريزر وتقدر تاكله فى وقت تانى بعد تسخينه بدل ما تطبخ كل يوم .
عود نفسك وأسرتك على شراء مستلزمات البيت كلها مرة واحدة فى الشهر من مكان واحد معروفة بأسعاره المعقولة .
طبعا الأفكار كتيرة وياريت لو تقدروا كمان تضيفوا أفكار من عندكم علي اللى ذكرته.. تحت عنوان أو فكرة #علشان_توفر.. إحنا كده بنساعد نفسنا و بنساعد غيرنا على منع الاستهلاك الغير محسوب ونشر سلوك الترشيد.