التوقيت الجمعة، 29 مارس 2024
التوقيت 05:05 م , بتوقيت القاهرة

تعرف على حظك اليوم الأربعاء 28-6-2017..برج السرطان..ابعد عن الشكوى والشكائين ومدمني النكد وشمامي كُلة الأحزان قدر الإمكان

صورة حظك اليوم الثلاثاء
صورة حظك اليوم الثلاثاء

إعرف حظك اليوم معانا على دوت مصر كل يوم..وخد بالك الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.


الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى يبقى حظنا من حظه ونبقى مبسوطين زيه وبنتمنى نملك الانبساط دة ونتحكم فيه .. ونستدعيه كمان وقت اللزوم زي جني المصباح وزي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


*******************


كلام جد:


تحس ان الناس اللي بتاكل ومبتتخنش دي ناس مدسوسة علينا من كوكب تاني مبيحبناش وغاوي يحرق دمنا تقريبا ويكيدنا.



عشان تعرف حظك اليوم بشكل كامل .. صفي نيتك ودوس على اسم برجك بإيدك اليمين.


 


إعرف حظك اليوم لبرج الحمل  الأربعاء 28-6-2017 مع عبدالله أحمد..


 


حظك النهاردة يا برج الحمل عاطفياً:


متركزش النهاردة مع اي نكد او اي حد متنكد من اي نوع مهما كان عزيز عليك


حظك النهاردة يا برج الحمل عملياً:


ركز ف الاسترخاء..انتا لسة خارج من اجازة وتعبت ومحتاج تريح


حظك النهاردة يا برج الحمل صحياً:


كل ما تريلاكس كل ماهتحس بالنشاط


إعرف توافق برج الحمل مع باقي الأبراج النهاردة


متوافق مع التلفزيون أكتر من اي حد وأي حاجة


*****************************************************************************


إعرف حظك اليوم لبرج الثور  الأربعاء 28-6-2017 مع عبدالله أحمد..


 


حظك النهاردة يا برج الثور عاطفياً:


بلاش تسرع ف اطلاق الأحكام على الناس..بلاش


حظك النهاردة يا برج الثور عملياً:


بالهداوة على عقلك عشان لسة خارج من صيام وفطار وتعبان ومرهق لسة..ليّن الأول وإعمل آمبليهات وبعد كدة إطلع بالمكنة..غير كدة هترقد زيت وهتحتاج بعدين تغير طقم صباب وشمبر


حظك النهاردة يا برج الثور صحياً:


بالهداوة ف الفطار محدش بيجري وراك..رمضان خلص خلاص ومن حقك تاكل براحتك بس بالراحة وبالهداوة..متخضش معدتك كدة ع الصبح..مش اصول والله


إعرف توافق برج الثور مع باقي الأبراج النهاردة:


متوافق مع البراح والابراج اللي بتقدر وتحب البراح والحرية


*****************************************************************************


إعرف حظك اليوم لبرج الجوزاء  الأربعاء 28-6-2017 مع عبدالله أحمد..


 


حظك النهاردة يا برج الجوزاء عاطفياً:


متضايقش نفسك.. اللي مش عاوز يتحب عنه ما إتحب..هو الخسران


حظك النهاردة يا برج الجوزاء عملياً:


اللي هيشوش تفكيرك النهاردة متتخانقش معاه..الحياة كفيلة بيه وبأفكاره والقدر هيلعب ف ودانه بشنيور


حظك النهاردة يا برج الجوزاء صحياً:


بقالك كتير معملتش رياضة ليه ياكابتن


تعرف على توافق برج الجوزاء مع باقي الأبراج النهاردة:


متوافق مع الابراج اللي بتقدر جمال الحياة 


*****************************************************************************


إعرف حظك اليوم لبرج السرطان  الأربعاء 28-6-2017 مع عبدالله أحمد..


 


حظك النهاردة يا برج السرطان عاطفياً:


ابعد عن الدراما والشكوى والشكائين ومدمني النكد وشمامي كُلة الأحزان قدر الإمكان


حظك النهاردة يا برج السرطان عملياً:


محتاج تتفائل حبة..محتاج تآمن ان بكرة افضل وأحلى..محتاج تصدق ان بكرة مش بتاع حد..محتاج علامة حلوة وبوسة أحلى..اتمنهالك جدا


حظك النهاردة يا برج السرطان صحياً:


إبعد عن الزحمة


تعرف على توافق برج السرطان مع باقي الأبراج النهاردة:


متوافق مع الابراج اللي بتعرف تتكلم بذوق وبتعرف تنقي وترص أجمل الكلام ف جمل بسيطة مفهومة معبرة


*****************************************************************************


إعرف حظك اليوم لبرج الأسد  الأربعاء 28-6-2017 مع عبدالله أحمد..


 


حظك النهاردة يا برج الأسد عاطفياً:


النهاردة انتا محتاج تخرج تتفسح مع حد بتحبه وتعزمه على حاجة حلوة وتقوله كلام حلو


حظك النهاردة يا برج الأسد عملياً:


النهاردة أجازة من اي مشاكل تخص الكون او خطة السيطرة عليه..لسة في وقت مستقبلا متقلقش


حظك النهاردة يا برج الأسد صحياً:


هاف فان ومتاخدش كل حاجة على اعصابك..الحياة مش مستقصداك والله.. دي مستقصدانا كلنا مش انتا بس


تعرف على توافق برج الأسد مع باقي الأبراج النهاردة:


إبعد عن الناس اللي بتحب تبرق ف وش اللي تعرفه واللي متعرفوش


*****************************************************************************


إعرف حظك اليوم لبرج العذراء  الأربعاء 28-6-2017 مع عبدالله أحمد..


 


حظك النهاردة يا برج العذراء عاطفياً:


متتسرعش وتزعل وتتقمص من احبابك عشان دة مجرد سوء تفاهم وهيعدي..متكبرش المسائل ياسيد..بلاش تلاكيك


حظك النهاردة يا برج العذراء عملياً:


زعلان عشان العيد خلص والاجازة بتخلص وهترجع تاني للشغل والمذاكرة.. كل دة مفهوم..بس إفتكر انك كدة بتنكد على نفسك مش على الحياة يابرنس


حظك النهاردة يا برج العذراء صحياً:


إعقل وفكر صح قبل ما تاكل أي حاجة دسمة النهاردة ياريت


تعرف على توافق برج العذراء مع باقي الأبراج النهاردة:


متوافق مع الابراج اللي بتعرف تعمل أكل


*****************************************************************************


إعرف حظك اليوم لبرج الميزان  الأربعاء 28-6-2017 مع عبدالله أحمد..


 


حظك النهاردة يا برج الميزان عاطفياً:


الميول العدوانية اللي عندك النهاردة دي حلها انك تسمع كلما حلو من حد بتحبه..دي الحاجة الوحيدة اللي هتخليك تنبط النهاردة..انتا محتاج تسمع كلام عن قد ايه انتا جميل ومقطقط وكدة..طب إتصرف وإخلص طيب


حظك النهاردة يا برج الميزان عملياً:


متبقاش عدواني النهاردة ياريت عشان متبوظش اليوم على نفسك


حظك النهاردة يا برج الميزان صحياً:


العصبية مش حلوة عشانك النهاردة..روق وكبر دماغك أحسن


تعرف على توافق برج الميزان مع باقي الأبراج النهاردة:


متوافق مع الابراج اللي مبتحدفش طوب وزلط وهي بتتكلم


*****************************************************************************


إعرف حظك اليوم لبرج العقرب  الأربعاء 28-6-2017 مع عبدالله أحمد..


 


حظك النهاردة يا برج العقرب عاطفياً:


دافع عن خيالك..دة من حقك علي فكرة


حظك النهاردة يا برج العقرب عملياً:


خيالك هو درعك الواقي ضد جنان وإنعدام منطقية الحياة وضد الواقع المؤلم واللي أحيانا بيبانلك خنيق ومش مفهوم..عشان انتا مبتفهمش كلمة "لأ"..لما بتشبط ف حاجة بتبقى زي العيل الصغير اللي بيعيط عشان لعبة محدش عارف ليه..إكبر حبة ياحبيبي..إكبر


حظك النهاردة يا برج العقرب صحياً:


الدراما مش حاجة تعزم الناس عليها على فكرة..إحتفظ بيها لنفسك


تعرف على توافق برج العقرب مع باقي الأبراج النهاردة:


متوافق مع الابراج اللي بتقدر الدلع والناس اللي بتحب الدلع


*****************************************************************************


إعرف حظك اليوم لبرج القوس  الأربعاء 28-6-2017 مع عبدالله أحمد..


 


حظك النهاردة يا حظك لبرج القوس عاطفياً:


متضايقش من كونك طيب..دة كنز مسيرك تعرف قيمته ومسيرك برضة تعرف ناس تعرف تقدر الكنز دة فيك


حظك النهاردة يا برج القوس عملياً:


متزعلش نفسك.. طيبة القلب برقبة فلوس الدنيا كلها اساسا


حظك النهاردة يا برج القوس صحياً:


راعي ضهرك حبة ومتشيلش حاجة تقيلة النهاردة لحد عشان عاوز تبان جدع قدامه.. ضهرك اهم من الكلام دة


تعرف على توافق برج القوس مع باقي الأبراج النهاردة:


متوافق مع الابراج المائية والابراج الهوائية ماشاء الله


*****************************************************************************


إعرف حظك اليوم لبرج الجدي  الأربعاء 28-6-2017 مع عبدالله أحمد..


 


حظك النهاردة يا برج الجدي عاطفياً:


أهم حاجة انك جميل..غير كدة اي مصيبة هتعملها هتعدي طالما مش كبيرة وطالما ملعوبة بذكاء وحرفنة كالعادة


حظك النهاردة يا برج الجدي عملياً:


حتى وإنتا مبوز وبتمثل انك زعلان برضة شكلك حلو


حظك النهاردة يا حظك لبرج الجدي صحياً:


متعليش السماعات على الاخر ف ودانك..غلط كدة.. غلط


تعرف على توافق برج الجدي مع باقي الأبراج النهاردة:


متوافق مع الابراج المحبة للمرازية من تحت لتحت


*****************************************************************************


إعرف حظك اليوم لبرج الدلو  الأربعاء 28-6-2017 مع عبدالله أحمد..


 


حظك النهاردة يا برج الدلو عاطفياً:


بلا وجع دماغ..حب نفسك احسن 


حظك النهاردة يا برج الدلو عملياً:


متلعبش البخت ف خيال حد النهاردة..عيب


حظك النهاردة يا برج الدلو صحياً:


محتاج نشاط رياضي بسيط عشان ترضي ضميرك مش أكتر.. لو معرفتش إرشيه بأي حاجة حلوة وهو هيسكت عادي خالص


تعرف على توافق برج الدلو مع باقي الأبراج النهاردة:


متوافق مع اللي يهتم يفهمك مش يهتم بس إزاي يسيطر عليك


*****************************************************************************


إعرف حظك اليوم لبرج الحوت  الأربعاء 28-6-2017 مع عبدالله أحمد..


 


حظك النهاردة يا برج الحوت عاطفياً:


اعتبر النهاردة اجازة من المثالية حبة..ريح عشان قدامك حاجات مهمة بكرة وبعده


حظك النهاردة يا برج الحوت عملياً:


ركز ف الانبساط مش ف النكد والخناق ياريت


حظك النهاردة يا برج الحوت صحياً:


إفطر الصبح شوربة يمكن تروق مزاجك او تقدر تسقي فيها أحزانك وتبتدي اليوم بشكل لطيف


تعرف على توافق برج الحوت مع باقي الأبراج النهاردة:


متوافق مع الابراج كلها


*****************************************************************************


الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.


الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام  هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.


ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..


إفتكر الكلام دا وانت بتقرا حظك اليوم النهاردة وكل يوم ياريت .. 


وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..


الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..


 تابعنا يومياً عشان تعرف حظك اليوم وكل يوم ومتنساش.. كل دة مجرد هزار برئ ياريت متاخدوش على صدرك..


تحياتنا الدائمة.


 


حظك اليوم