الجواز والفرح وفستان سندريلا حلم عند بنات كتير خصوصا لما بيشوفو أخبار وصور افراح المشاهير زي كيت ميدلتون واختها بيبا.. وتلاقي نفسك عملتي سكان للمكياج والفستان والطرحة، لكن ازاي تلاقي الجوازة التمام.

المسألة حرفة مش حظ ولا قصص رومانسية.. ودي بيشرحها خبير الاتيكيت ويليام هانسون اللي عمل شوية نصايح لأي واحدة نفسها توقع العريس الكامل من مجاميعه.. لكن من الاول الكلام دة مش هينفعك لو كنتي وحشة أصلا.

1 إعرفي مميزاتك..

أي حد في الدنيا له مميزات وعيوب .. إعرفي الحاجة الحلوة فيكي وركزي عليها بلاش تواضع.. لو عينيكي حلوة خلي المكياج يبقى هاي لايت عليها.. لو بتعرفي لغات إتمنظري بيها.. لو كنتي شيك إتشيكي اكتر.. خليكي نجمة.

2 الندالة..

إبعدي عن صحابك القدام.. هي حركة ندالة لكن من طلب العلا بقى.. وطبعا لأنه مش حاجة ظريفة تلاقي صحابك القدام اللي عارفين عيوبك يطلعوها قدام العريس ولا ان واحدة تقول قدام الناس انك كنتي أتخن واحدة في الفصل مثلا زمان ولا حاجة.

3 إتفسحي صح..

مطعم عم عبده بتاع الكفتة مفيهوش عرسان.. اختاري النوادي والكافيهات الصح.. افتكري المنظرة.. الناس بتحب الشكل الاجتماعي الكويس.. وكدة منه تنبسطي في حتة نضيفة ومنه برضه تعملي سيرش حلو ف الحياة على عريس مناسب.

4 ظبطي كلامِك..

الناس بتاخد بالها من الكلام اوي..ابعدي عن الكلمات والإفيه اللي يطلعك مش قد المقام.. وياريت برضه مايكونش الكلام متكلف.. خليكي راقية من غير تمثيل..خليكي على طبيعتك بس ياريت تخلي طبيعتك دي حلوة من الأساس.

5 الاتيكيت ثم الاتيكيت..

كل مكان وله نظامه يعني لازم تاخدي بالك كويس من المكان والناس حواليكي..وخلي عندك اتيكيت صح.. ولو كنتي في مطعم بلاش تهبري ف الأكل انتي مش في مسابقة.. وبلاش الهبل في السيلفي.. صورك هتلف على الناس ومحدش شاف كيت ميدلتون وهي بتعمل بوز البطة إياه ولا بتطلع لسانها لحد لا سمح الله ف صورة عشان مبتتصورش كتير.

6 اوعي من البخل..

من اكتر الحاجات اللي ناس بتحكم بيها على بعض هي ازاي بتتعامل مع الفلوس.. فلان بخيل وفلان ايده فرطة .. الاتنين غلط .. لازم تتصرفي بعقل مش تبيني انك مهتمة بالفلوس اوي عشان محدش يقول عليكي بخيلة او داخلة على طمع.

وفي الاخر ربنا يوفق الجميع وخدي التراك دة هدية.