التوقيت الثلاثاء، 19 مارس 2024
التوقيت 09:44 ص , بتوقيت القاهرة

تعرف على حظك اليوم الجمعة 23-6-2017.. يا برج الميزان..جمالك الفتاك بيوقع سمك كتير ف الشباك

صورة حظك اليوم الجمعة
صورة حظك اليوم الجمعة

إعرف حظك اليوم معانا على دوت مصر كل يوم..وخد بالك الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.


الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام  هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


كلام جد: مهما إستخبيت أو إتداريت.. مسير خلايا مخك تفتن على نفسها..مسير نواياك تبان.. مهما عملت.



عشان تعرف حظك اليوم بشكل كامل .. صفي نيتك ودوس على اسم برجك بإيدك اليمين.


 


إعرف حظك اليوم لبرج الحمل الجمعة 23-6-2017 مع عبدالله أحمد..


 


حظك النهاردة يا برج الحمل عاطفياً:


النهاردة انتا محتاج تراقب الوضع العام المحيط بشكل لطيف إستعدادا لزقططة العيد..مهم ميكونش في اي منغصات او نكد.. مهم جدا


حظك النهاردة يا برج الحمل عملياً:


حاول متتحركش كتير..وفر طاقتك النهاردة على قد ماتقدر


حظك النهاردة يا برج الحمل صحياً:


انتا بتتعب عشان تخزن كالوريز طول الوقت..لو اتحركت الطاقة دي كلها هتروح ف الفراغ..خسارة طبعا..


إعرف توافق برج الحمل مع باقي الأبراج النهاردة


في هفهفة ف إتجاه برج الدلو ماشاء الله


*****************************************************************************


إعرف حظك اليوم لبرج الثور الجمعة 23-6-2017 مع عبدالله أحمد..


 


حظك النهاردة يا برج الثور عاطفياً:


المود مرح جدا وفي إستعداد للفرحة والإنبساط..مود أعياد حلو وانتا بتعرف تحتفل كويس..حاول تنبسط ..دة حقك


حظك النهاردة يا برج الثور عملياً:


متبنيش إنبساطك على نكد الاخرين ارجوك..الكوكب مش ناقص نكد خالص


حظك النهاردة يا برج الثور صحياً:


راعي صحتك وإنتا بتفرح حضرتك عشان تعرف تفرح باقي ايام العيد..راعي معدتك على وجه الخصوص حبة معلش عشان خاطري


إعرف توافق برج الثور مع باقي الأبراج النهاردة:


إحترس من برج العقرب عشان بيخطط ياكل الشيكولاتة بتاعتك


*****************************************************************************


إعرف حظك اليوم لبرج الجوزاء الجمعة 23-6-2017 مع عبدالله أحمد..


 


حظك النهاردة يا برج الجوزاء عاطفياً:


بلاش غيرة ف اي إتجاه..شيل كلمة إشمعنا من قاموسك ارجوك النهاردة خالص


حظك النهاردة يا برج الجوزاء عملياً:


انتا مش محتاج تنافس حد..خصوصا لو حد مش من قيمتك..عيب


حظك النهاردة يا برج الجوزاء صحياً:


بالراحة على نفسك عشان تعرف تفرح ف العيد بشكل بسيط.. مش لازم تعمل بارتي بس على الاقل تفرح على حس فرحة الناس..دة هيبقى إنجاز يتحسبلك


تعرف على توافق برج الجوزاء مع باقي الأبراج النهاردة:


تقدر تتعامل مع أي برج وإنتا متطمن إلا برج الدلو عشان مود النهارده في حاجة غريبة مسيرنا نعرفها الايام اللي جاية


*****************************************************************************


إعرف حظك اليوم لبرج السرطان الجمعة 23-6-2017 مع عبدالله أحمد..


 


حظك النهاردة يا برج السرطان عاطفياً:


تجنب الأذى تماما النهاردة ياريت حتى لو من باب الهزار مع اي حد..بلاش..مالوش لازمة


حظك النهاردة يا برج السرطان عملياً:


متفتنش على حاجة انتا تعرفها عن اي حد ياباشا..خليك ف حالك أحسن


حظك النهاردة يا برج السرطان صحياً:


مهم تخرج وتشم هوا نضيف بالليل..هيفرق ف جيوبك الانفية وبالتالي ف الاكسجين اللي داخل مخك وبالتالي هيفرق ف مزاجك وإنبساطك برضة


تعرف على توافق برج السرطان مع باقي الأبراج النهاردة:


حاول متبقاش سوسة وانتا بتتعامل مع برج الحمل عشان هتتكشف


*****************************************************************************


إعرف حظك اليوم لبرج الأسد الجمعة 23-6-2017 مع عبدالله أحمد..


 


حظك النهاردة يا برج الأسد عاطفياً:


خليك مع المزيكا النهاردة ف كل حاجة..خليك مع الافلام الحلوة اللطيفة اللي مش عاوزة تشغيل دماغ كتير..


حظك النهاردة يا برج الأسد عملياً:


إبعد عن متابعة اخبار العالم النهاردة ياريت وإعتبره أجازة


حظك النهاردة يا برج الأسد صحياً:


انتا محتاج تخرج بالليل تاكل ف أي حتة لطيفة..ومحتاج تاخد بالك من الصداع


تعرف على توافق برج الأسد مع باقي الأبراج النهاردة:


تقدر تتعامل مع اي برج النهاردة براحتك طالما مش هتتنك عليه او تحسسه انك احسن منه.


*****************************************************************************


إعرف حظك اليوم لبرج العذراء الجمعة 23-6-2017 مع عبدالله أحمد..


 


حظك النهاردة يا برج العذراء عاطفياً:


متستناش إنبساط يتحدف عليك صدفة من الحياة..إتحرك وخد حقك وإنبسط


حظك النهاردة يا برج العذراء عملياً:


طول مانتا بتتكسف مش هتفلح..مهم تبقى باكس حبة ف وش الحياة..دة حقك..ثم انتا عمرك شفتها إتكسفت منك؟..معتقدش


حظك النهاردة يا برج العذراء صحياً:


فرحة عارمة ف خلايا مخك مع افكار مدهشة ياريت تستغلها صح


تعرف على توافق برج العذراء مع باقي الأبراج النهاردة:


مازال برج الميزان بيحاول يدلعك وانتا عامل نفسك مش واخد بالك..تقريبا انتا زهقان او حاجة زي كدة


*****************************************************************************


إعرف حظك اليوم لبرج الميزان الجمعة 23-6-2017 مع عبدالله أحمد..


 


حظك النهاردة يا برج الميزان عاطفياً:


جمالك الفتاك بيوقع سمك كتير ف الشباك..


حظك النهاردة يا برج الميزان عملياً:


إحترس من اي لون اسود سواء ف الهدوم او ف الحيطان او ف الناس والنفسيات والحياة..خليك ف الابيض..انتا بتحب تبان مثالي..الابيض لايق عليك اكتر


حظك النهاردة يا برج الميزان صحياً:


احترس من قلة شرب المية..الاملاح هتروقك بالشكل دة..خلي بالك عشان مترجعش تشتكي


تعرف على توافق برج الميزان مع باقي الأبراج النهاردة:


مازلت محبوب من كل الابراج زي إمبارح..إستغل دة ف صالحك بشكل كويس ياريت


*****************************************************************************


إعرف حظك اليوم لبرج العقرب الجمعة 23-6-2017 مع عبدالله أحمد..


 


حظك النهاردة يا برج العقرب عاطفياً:


القعدة ف البيت مش حاجة وحشة..ف الاخر دي مملكتك ومساحتك الشخصية اللي الكل مجبر يحترمها


حظك النهاردة يا برج العقرب عملياً:


مش كل حاجة ف الحياة بتمشي بالمنطق..المنطق إختراع بشري بحت


حظك النهاردة يا برج العقرب صحياً:


إبعد عن مسببات القلق


تعرف على توافق برج العقرب مع باقي الأبراج النهاردة:


الاجواء مناسبة ف التعامل اللطيف مع الابراج الهوائية والمائية..خصوصا اول يوم العيد


*****************************************************************************


إعرف حظك اليوم لبرج القوس الجمعة 23-6-2017 مع عبدالله أحمد..


 


حظك النهاردة يا حظك لبرج القوس عاطفياً:


متاخدش كل الكلام اللي بتسمعه على صدرك..خليك لارج وطنش وكبر دماغك


حظك النهاردة يا برج القوس عملياً:


حوش الفلوس وبلاش تبذير مالوش عازة عشان متندمش بعد العيد


حظك النهاردة يا برج القوس صحياً:


انتا محتاج تريلاكس وتسترخي خالص كدة وترحرح


تعرف على توافق برج القوس مع باقي الأبراج النهاردة:


اليوم مناسب للتعامل مع اي برج تحبه خصوصا وإن في نيزك ممكن يخلص علينا كلنا بالليل ف مش فارقة


*****************************************************************************


إعرف حظك اليوم لبرج الجدي الجمعة 23-6-2017 مع عبدالله أحمد..


 


حظك النهاردة يا برج الجدي عاطفياً:


قلقان من ايه سيادتك لما كل حاجة شكلها ماشي كويس ف حياتك


حظك النهاردة يا برج الجدي عملياً:


دلع نفسك بنفسك..قولنا الكلام دة مليون مرة قبل كدة..متستناش الدلع من الحياة..الحياة مبتشتغلش عند حد


حظك النهاردة يا حظك لبرج الجدي صحياً:


طول مانتا بعيد عن القلق هتبقى بعيد عن اي اوجاع غريبة وغامضة ممكن تحسها ف جسمك النهاردة


تعرف على توافق برج الجدي مع باقي الأبراج النهاردة:


لو حصل وإتعاملت مع برج الحوت خليك نايس عشان هو مش ف المود ومحتاج طبطبة وتفهم


*****************************************************************************


إعرف حظك اليوم لبرج الدلو الجمعة 23-6-2017 مع عبدالله أحمد..


 


حظك النهاردة يا برج الدلو عاطفياً:


عينيك حلوة النهاردة ودة شيئ خطر


حظك النهاردة يا برج الدلو عملياً:


الخبرة مهمة طبعا بس مهم تبقى لئيم ف التعامل مع الحياة عشان تعرف تسلك..اللؤم دة مش معناه انك تعمل مؤامرات او تشارك ف أذى..بالعكس..اللؤم الحقيقي انك تخش المعركة وتطلع نضيف وصافي نفسياً


حظك النهاردة يا برج الدلو صحياً:


اهتم بصحتك وبلاش إهمال..راعي نفسك حبة يامعلم وإملى البانيو مية وإنقع نفسك فيها ساعة واتنين وتلاتة وبطل تفكر ف أي هموم


تعرف على توافق برج الدلو مع باقي الأبراج النهاردة:


إنتا محبوب من معظم الابراج ودة شيئ جميل بس خطر خلي بالك


*****************************************************************************


إعرف حظك اليوم لبرج الحوت الجمعة 23-6-2017 مع عبدالله أحمد..


 


حظك النهاردة يا برج الحوت عاطفياً:


في رغبة ف الإنبساط عندك ودة شيئ جميل..


حظك النهاردة يا برج الحوت عملياً:


الإصرار والعزيمة حاجات جميلة خصوصا لما تكون الدوافع والأهداف جميلة برضة وعظيمة..بس انتا محتاج تبقى ابسط من كدة وتبطل عمق عشان العيد مالوش ف العمق


حظك النهاردة يا برج الحوت صحياً:


إستعد للدايت من نفسك كدة بعد العيد ياريت


تعرف على توافق برج الحوت مع باقي الأبراج النهاردة:


تنفع صديق لأي برج..بس صعب تتحب من أي برج عشان انتا متحفظ زيادة عن اللزوم


*****************************************************************************


الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.


الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام  هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..


ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.


ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..


إفتكر الكلام دا وانت بتقرا حظك اليوم النهاردة وكل يوم ياريت .. 


وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..


الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..


 تابعنا يومياً عشان تعرف حظك اليوم وكل يوم ومتنساش.. كل دة مجرد هزار برئ ياريت متاخدوش على صدرك..


تحياتنا الدائمة.


 


حظك اليوم