الصين حلوة .. والأحلى إنك تصيف ف كهفها المتجمد طول السنة

تخيل نفسك رايح مشوار لمصلحة حكومية الساعة 2 الضهر يوم خميس  ف شهر أغسطس .. طبعا مفيش حاجة أصعب من كدة .. حر وزحمة وحاجة فظيعة .. وبعد ما تخبط المشوار دة كله .. تخيل بقى إنك خلاص رجعت البيت وإيدك بتفتح باب الشقة .. وإنتا في عز التعب والعطش تفتح تلاقي في هوا بارد خبط في وشك وكأنك فتحت باب تلاجة ..  ف تلاقيك دخلت كهف.. بس مش أي كهف بقى.. دة أجمل كهف متجمد بارد ومنعش وجميل ..

تخيل يامون بيه .. كهف بقاله تلاتة مليون سنة متجمد مساحش..

ولو ربنا كتبهالك وروحت زورت المكان دة.. هتحس إنك في قلعة إلسا بطلة فيلم فروزن اللي موجودة في ديزني - ربنا يكرمك وتزورها برض- ..بس الفرق إن الكهف ده طبيعي من عند ربنا .. عشان كدة بيعتبروه كنز من الكنوز الشعبية ف الصين.. 

وزي ما قولنا إن عمر الكهف دة 3 مليون سنة .. وخلال المدة الرهيبة دي ما دابش ولا مرة.. لا ف صيف ولا ف أي فصل ..على الرغم من وجود بركان نشط جنبه على بعد 500 متر .. لا تخرج قبل أن تقول سبحان الله.. 

كهف نينغوو موجود ف مقاطعة شانشي الصينية .. الكهف موجود داخل جبل إرتفاعه 6500 قدم  يعني 2000 متر فوق سطح البحر .. وعمق الكهف داخل الجبل حوالي  280 قدم  يعني 85 مترا.. 

الكهف بقى مزار سياحي مهم جدا ف الصين .. وبيجيله زوار يوميا بتاع حوالي 1000 شخص .. والكهف مفتوح للزوار من شهر مايو لحد شهر أكتوبر بس.. 

بعد ما عرفنا تفاصيل الكهف برضو لسه معرفناش السبب اللي يخليه متجمد السنين دي كلها 

بالرغم من إختلاف المناخ في العالم .. إلا إن كهف نينجوو متأثرش بكل دة .. ودي حاجة كانت محيرة جدا لعلماء كتير .. ودة اللي دفعهم إنهم يدوروا ورا الموضوع .. واكتشفوا إن السبب الرئيسي هو هيكل وشكل الكهف اللي شبه دبوس البولينج .. والشكل المتعرج دة كان السبب إنه يحبس الهوا البارد جوا الكهف صيف شتا.. وبالتالي بيفضل بارد تلاجة طول السنة ..عشان كدة هو أنسب مكان تهرب فيه من حر الصيف ..

لو لسه مود الشتا والجليد عجبك.. ومدام سيرة الشتا إتفتحت .. يبقى لازم نسمع المطر بتراك مزيكا يفكرنا بريحتها..إستمتعوا.