إعرف حظك اليوم معانا على دوت مصر كل يوم..وخد بالك الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام  هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

كلام جد: متوريش إكتئابك لحد..عيب.

عشان تعرف حظك اليوم بشكل كامل .. صفي نيتك ودوس على اسم برجك بإيدك اليمين.

إعرف حظك اليوم لبرج الحمل الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

في بواخة ف الأجواء من الحياة.. خلي بالك.

حظك النهاردة يا برج الحمل عاطفياً:

النهاردة يا برج الحمل حاول متضايقش نفسك من بواخة الحياة..خصوصا ان في زحمة وفي خنقة..بس في حاجة حلوة جاية ف طريقك من حد حلو..خد بالك وصحصح للموضوع دة خصوصاً بالليل

حظك النهاردة يا برج الحمل عملياً:

ثق تماما ان اي حاجة هتحصل النهاردة ايا كانت بايخة او لأ ف انتا هتعرف تواجه وهتاخد حقك وبشياكة وثبات وهدوء ومن غير قلة مزاج كمان يامعلم

حظك النهاردة يا برج الحمل صحياً:

إهتم بضهرك وبكمية المية اللي بتشربها طول الوقت.. متقعدش عطشان وريقك ناشف بعد الفطار خاالص ياريت

إعرف توافق برج الحمل مع باقي الأبراج النهاردة

بلاش كراش على حد من برج العقرب أو برج الأسد النهاردة عشان في عكوسات هتمنع الموضوع دة خصوصا بالنهار..بالليل قشطة ماشي

*****************************************************************************

إعرف حظك اليوم لبرج الثور الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

شوية تعب وهيعدوا متقلقش

حظك النهاردة يا برج الثور عاطفياً:

النهاردة يا برج الثور مهم تاخد بالك من مزاجك عشان هينعكس على شكلك وشياكتك وصحتك

حظك النهاردة يا برج الثور عملياً:

مهم تفكر بشكل فيه قليل من الأنانية النهاردة بس من غير ماتيجي على حد بيحبك او بيقدرك..مهم توازن بين أهميتك وبين أهمية الناس ف حياتك

حظك النهاردة يا برج الثور صحياً:

النهاردة يا برج الحمل حاول متضربش حد..متستعملش إيدك ف الهزار مع حد..انتا كبرت ع الكلام دة يابيه..إدي الناس أحضان مجانية أحسن وعرفهم انك بتحبهم ومبسوط بيهم وهما لازم هيبقوا مبسوطين بيك..ثم هما هيلاقوا زيك فين ف اوقات المرح والفرح والشخلعة والبعد عن اي كلكعة..معتقدش في.

إعرف توافق برج الثور مع باقي الأبراج النهاردة:

حبة تعب جسماني مؤقتين وهيعدوا..جايز إرهاق وإحتياج ضروري للراحة خد بالك ..نشط انتا بس الجهاز المناعي بتاعك وكله هيبقى فل متقلقش

*****************************************************************************

إعرف حظك اليوم لبرج الجوزاء الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

يوم جامد وحلو..ياريت تستغله صح

حظك النهاردة يا برج الجوزاء عاطفياً:

النهاردة يا برج الجوزاء يوم جامد وناجح على كل المستويات

حظك النهاردة يا برج الجوزاء عملياً:

مهم تنبسط وتفرفش وتفرح الايام دي من قلبك وبمزاجك..مش تقعد مستني الفرحة ترن عليك الجرس..ومتحطش اي إعتبارات تانية ف بالك من اي نوع..فرفش نفسك ياريت..دة حقك

حظك النهاردة يا برج الجوزاء صحياً:

حاول متتحداش نفسك صحياً ياريت..مش عشان ربنا مديك شوية صحة تقوم تفتري على نفسك كدة..بتختبر نفسك مثلا ولا بتتحدى قوة إرادتك؟

تعرف على توافق برج الجوزاء مع باقي الأبراج النهاردة:

لو تعرف حد من برج الدلو حاول تدلعه مش تنكد عليه..على الاقل الايام دي..أهم حاجة يكون مستحق لهذا الدلع..غير كدة متدلعش حد بلاش كلام فاضي

*****************************************************************************

إعرف حظك اليوم لبرج السرطان الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

مفيش حاجة صعبة النهاردة عليك

حظك النهاردة يا برج السرطان عاطفياً:

النهاردة يا برج السرطان ممكن تخش ف أي حاجة صعبة بقلب جامد..إقهر خوفك وسيطر عليه ومتقلقش..موفق يامعلم

حظك النهاردة يا برج السرطان عملياً:

السعادة مجرد قرار.. لو فكرت فيها هتلاقي مفيش حاجة ممكن تنكد عليك ف حياتك إلا بإختيارك وقرارك بالنكد.. مش أكتر..ف ياريت تختار تنبسط مش تتنكد النهاردة

حظك النهاردة يا برج السرطان صحياً:

دلع ودانك ف مزيكا يامعلم الليلة.. مهم لمزاجك وبالتالي مهم لصحتك..وإبعد عن الطرشي والحاجات اللي فيها ملح كتير..ملهاش لازمة

تعرف على توافق برج السرطان مع باقي الأبراج النهاردة:

متتجادلش مع حد من برج الحوت..هتتعب نفسك على الفاضي خصوصا وانه ف مود مثالي اليومين دول معرفش على ايه

*****************************************************************************

إعرف حظك اليوم لبرج الأسد الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

في عنف وحساسية ف الأجواء خلي بالك

حظك النهاردة يا برج الأسد عاطفياً:

فيه عنف وحساسية ف الأجواء جايين غالبا من حد عزيز عليك انتا مش عاوز تزعله ومستني يحس من نفسه انه ظالمك ويعتذر او على الاقل يبطل ظلم

حظك النهاردة يا برج الأسد عملياً:

مهم تتحلى بالصبر النهاردة حبة معلش..انتا كبير ف نفسك وهيبقى الموضوع سهل عليك ان شاء الله

حظك النهاردة يا برج الأسد صحياً:

متحرقش دمك بالتفكير ف المستقبل..بكرة مش ملك حد..كمان حاول تهتم بنوعية أكلك اليومين دول وبلاش تاكل كحك بشكل إستباقي قبل العيد..فال وحش

تعرف على توافق برج الأسد مع باقي الأبراج النهاردة:

خد بالك من اي حد من اي برج يحاول يفرض عليك طبيعته..انتا ملكش ف الموضوع دة خالص وغير قابل للسيطرة تماما..مهم توضح دة

*****************************************************************************

إعرف حظك اليوم لبرج العذراء الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

إعتمد على نفسك وبس

حظك النهاردة يا برج العذراء عاطفياً:

مهم تبقى هادي ومتطلبش إهتمام من حد النهاردة..على الاقل بالنهار

حظك النهاردة يا برج العذراء عملياً:

إعتمد على نفسك ف تحقيق رغباتك وطموحاتك وبلاش تتكل على أي شخص.. محدش هيشوف أحلامك بنفس الوضوح اللي انتا بتشوفه بيها

حظك النهاردة يا برج العذراء صحياً:

إسترخاء عام وإستعداد وتخطيط للراحة والإستجمام ف العيد ياريت

تعرف على توافق برج العذراء مع باقي الأبراج النهاردة:

في فرص دلع قوية من حد برج الميزان النهاردة..وخد بالك ان الدلع لو جه من أي برج تاني النهاردة برضة ميضرش وهيبقى قشطة..المهم تعرف ترد الدلع دة بدلع أكبر منه

*****************************************************************************

إعرف حظك اليوم لبرج الميزان الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

بلاش غموض يامعلم..بلاش

حظك النهاردة يا برج الميزان عاطفياً:

حاول متبقاش غامض النهاردة ف التعبير عن مشاعرك عشان دة بيلبخ اي حد بيحبك وحابب يدلعك..خليك بسيط

حظك النهاردة يا برج الميزان عملياً:

البساطة أحسن وأجمل من العمق ف كل حاجة النهاردة..كل ماتكون بسيط وسلس كل ماهتلاقي كل حاجة نفسك فيها بسيطة وسلسة تماما يابرنس

حظك النهاردة يا برج الميزان صحياً:

إهتم بالفواكه عشان معدتك إستوت عك ف الايام اللي فاتت..كام يوم كدة تركز ف الفاكهة لحد العيد وإبقى ارجع عُك براحتك من تاني مش أزمة

تعرف على توافق برج الميزان مع باقي الأبراج النهاردة:

انتا محبوب من كل الابراج النهاردة ..إستغل دة ف صالحك بشكل كويس ياريت

*****************************************************************************

إعرف حظك اليوم لبرج العقرب الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

رومانسية قديمة تعاود الظهور ف حياتك

حظك النهاردة يا برج العقرب عاطفياً:

حب قديم هيرجع يعاود الظهور ف حياتك غالبا النهاردة.. او انتا ببساطة بتحن لحد كنت بتحبه وطنشته وإحلو بعد ماسبته..عموما الحالتين كويسين وزي الفل..المهم تحب وتتحب

حظك النهاردة يا برج العقرب عملياً:

إبتدي إستعد للأجازة وخلص كل اللي وراك عشان تعرف تعيد زي الناس وتنبسط ومتبقاش قاعد شايل هم الشغل بدون داعي

حظك النهاردة يا برج العقرب صحياً:

طالما قلبك كويس يبقى متقلقش من اي حاجة يامعلم

تعرف على توافق برج العقرب مع باقي الأبراج النهاردة:

حاول متحدفش حد من برج الدلو بالكلام النهاردة عشان هتزعل وهتجيب ناس تزعل وياريت متتأمرش على اي برج بتاتاً..نصيبك من الدلع ف الحياة هيجيلك لحد عندك..شوية صبر بس يابرنس..شوية صبر

*****************************************************************************

إعرف حظك اليوم لبرج القوس الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

ركز ف الإيجابيات وبلاش نكد

حظك النهاردة يا حظك لبرج القوس عاطفياً:

ركز ف مميزات اللي بتحبه وبس..الحب بيتطلب اوقات نطنش عن عيوب ف اللي بنحبهم عشان الحياة محتاجة تسامح وتقبل للطرف الآخر وإلا هتحصل مشاكل خصوصا لما كل طرف يحاول يغير الطرف التاني عشان يشكله على مزاجه..محدش بيتشكل ومحدش بيتغير..على الاقل مش بالسهولة المفرطة دي..الحاجات دي بتاخد وقت وصبر ومهم تتعمل بحب وبقبول وتسامح وبشكل إختياري مش إجباري

حظك النهاردة يا برج القوس عملياً:

هتقفش فلوس قريب والنفسية هترجع تدفى من تاني..مبروك على جيوبك

حظك النهاردة يا برج القوس صحياً:

خف حبة ف السجاير لو بتشرب سجاير ياريت

تعرف على توافق برج القوس مع باقي الأبراج النهاردة:

طول مانتا مسلح بإبتسامتك وثقتك ف نفسك يبقى متقلقش من أي برج..ماعدا البرج بتاعك..هيكشفك من نظرة عينيك

*****************************************************************************

إعرف حظك اليوم لبرج الجدي الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

حب وإتحب من سكات..بلاش إعلانات

حظك النهاردة يا برج الجدي عاطفياً:

داري على إنبساطك يزيد..وحاول متعكش ف الكلام مع اللي بتحبه..بالهداوة كدة وبالراحة وبالسهوكة والدهلكة هتاخد كل اللي انتا عاوزه..انما بالخناق مش هيحصل

حظك النهاردة يا برج الجدي عملياً:

الحياة نفسها تدلعك بس عمرها ماهتعمل كدة طول مانتا مشغول بندب حظك طول الوقت..قشطة انتا تستاهل تنجح مفيش كلام ودي حاجة معروفة..كل المقومات عندك تقريبا..ناقصك بس تتفاءل وتحلم بشكل واضح..مش أكتر

حظك النهاردة يا حظك لبرج الجدي صحياً:

متفتريش على روحك وإنتا بتنبسط..جسمك ف الأخر لازم يريح روحك اللي مستخبية جواه ولو هو مش مستريح روحك مش هتستريح

تعرف على توافق برج الجدي مع باقي الأبراج النهاردة:

حاول متاكلش الشيكولاتة بتاعة اي برج تاني لو عرفت هو مخبيها فين ف التلاجة..بلاش

*****************************************************************************

إعرف حظك اليوم لبرج الدلو الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

خليك مع نفسك وبس يابرنس..مع نفسك وبس

حظك النهاردة يا برج الدلو عاطفياً:

هتتحب بشدة قريب..إستعد

حظك النهاردة يا برج الدلو عملياً:

قفشت فلوس ولا لسة ياعفريت D::

حظك النهاردة يا برج الدلو صحياً:

إبعد عن الزحمة تماما النهاردة ياكابتن..وخد بالك ان الزحمة مش مجرد بس خنقة نفس بالنسبالك وروايح مش لطيفة..لا.. دي خنقة لأفكارك..

ركز ف الحاجات اللي تعرف تعملها لوحدك عشان الشغل الجماعي ممنوش فايدة..إلا لو انتا شايف عكس كدة..ساعتها ثق ف إحساسك وطنش كلامي

تعرف على توافق برج الدلو مع باقي الأبراج النهاردة:

في حد من برج الحمل بيحبك وفي حد من برج العقرب بيحبك برضة وفي حد من برج الجوزاء بيحبك برضة دة بجانب انك محبوب من اتنين من برج الدلو..جرى ياعم الحاج.. في إيه؟..إنتا عامل جمعية أبراج ولا إيه؟

*****************************************************************************

إعرف حظك اليوم لبرج الحوت الخميس 22-6-2017 مع عبدالله أحمد..متضربش حد..متستعملش إيدك ف الهزار مع حد..

روحك مش مستريحة ف جسمك النهاردة خد بالك

حظك النهاردة يا برج الحوت عاطفياً:

روحك متنشنة وقافشة بس متقلقش..دة مجرد شعور عابر وهياخد وقته ويعدي

حظك النهاردة يا برج الحوت عملياً:

محتاج تفك وتفرفش بشكل حر..ومهم تاخد بالك ان المعارك الكلامية غير مجدية بالمرة الليلة وممكن تخسرك ناس كتير

حظك النهاردة يا برج الحوت صحياً:

راعي كعوب رجليك شوية وإنقعهم ف مية سخنة وخل تفاح

تعرف على توافق برج الحوت مع باقي الأبراج النهاردة:

تنفع صديق لأي برج..بس صعب تتحب من أي برج عشان انتا متحفظ زيادة عن اللزوم

*****************************************************************************

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام  هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وكل يوم ياريت .. 

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

 تابعنا يومياً عشان تعرف حظك اليوم وكل يوم ومتنساش.. كل دة مجرد هزار برئ ياريت متاخدوش على صدرك..

تحياتنا الدائمة.