لما كنا صغيرين كان خيالنا مالوش حدود .. وأي حاجة نفسنا فيها كانت ممكن تتحقق .. كل اللي علينا بس إننا نسرح ونحلم مع السما والنجوم .. لكن لما كبرنا كل أحلامنا راحت مع النجوم وبدأ بريقها يتطفي يوم ورا يوم .. لحد ما غطاها الهوا المتلوث والدوشة اللي مبتخلصش .. واللي اتبقى جوانا مجرد حلم .. إننا في يوم الأيام هنقدر نسيب كل اللي خانقنا ونمشي .. هنستخبى مع أكتر حد بنحبه في مكان بعيد .. من غير هموم ولا مسؤليات .. هنهرب من حياة الكبار اللي خنقتنا .. ومن العالم دة كله..

لما هتوصل لمرحلة الهروب الأكيد .. نحب نقولك إنه ف أماكن كتير لسه بيور وطازة وتقدر تعتبرها بِكر لسه أيد الإنسان مبوظتهاش .. منها إللى جنبك ومنها اللي بعيد .. ودي أفضل أماكن للهروب .. الأماكن دي تقدر تقول عليها شباك على عالم تاني هادي ومريح.. مفيهوش غير صوت الطيور والشجر.. تشوفه تحسه مش ناقصه إلا انتا وتبقى البرنس والوحيد اللي قادر يستمتع بكل دة

ف معلومة يمكن تكون غايبة عن كتير .. خصوصا الناس اللي رافعين شعار السفر للمريخ .. إن كوكب الأرض أجمل الكواكب .. وأكيد الصور دي أحسن إثبات .. وأعتقد برضة إنه مفيش كوكب هتلاقي عليه كمية التنوع والجمال دة .. 

تخيل مثلا إن الصورة اللي تحت دي في مصر فعلاً .. وتحديدا في الصحراء البيضا .. حاجة ف منتهى الجمال..

الخلاصة ..

كلنا عايزين الإنبساط .. بس ف ناس بعد ما هتخلص قراية الموضوع دة .. هتجري تدور على طريقة تسافر بيها للأماكن دي .. وناس هتكتفي إنها تتفرج على صورها وخلاص .. والفرق بين الأتنين زي الفرق ما بين واحد ساب نفسه يموت من العطش عشان مفيش مايه في الصحرا .. وحد تاني حفر بير وطلع الماية بإيديه .. فلازم تعافر عشان توصل للي انت عايزه .. السعادة مبتجيش على طبق من دهب .. أوريفوار