حظك اليوم الاثنين 19-6-2017 مع عبدالله أحمد

صباح الجمال..

كلام جد: الطبيعي ان الانسان يركب الهوا بشكل تخيلي لما حد يعمله poke


عشان تعرف حظك اليوم بشكل كامل .. صفي نيتك ودوس على اسم برجك بإيدك اليمين.

برج الحمل

النهاردة يا برج الحمل انتا ممكن تحس انك زهقان ودماغك مفصولة ومستهلك ومودك بيقلب كتير جدا بدون تفسير واضح.. عادي..متقلقش ولا تخافش.. هتخرج من كل دة فجأة على بالليل وهتبقى زي الفل لما بيطلع ف آوان آوانه.. أبيض وناصع وبيفرق مع أي حد عارف قيمته وقيمة وجوده ف الحياة..أهم حاجة متخافش..ميهزكش حد..ميهزكش.. إحساسك صح.

برج الثور

يا برج الثور..النهاردة كيرف طاقتك ف العلالي يامعلم..عندك باور يهد جبال..أتمنى متضيعوش ف الكسل أو ف العند مع الحياة.. إخرج برة قوقعة خوفك وإنبسط..دة حقك ف الحياة.

برج الجوزاء

النهاردة يا برج الجوزاء انتا حاسس بهفهفة ورقة ورومانسية جميلة جدا وممكن جدا تكون حاسس انك عندك رغبة تلون كل رمادي حواليك ف الحياة..بس خلي بالك..اللي حواليك مش هيفهموا الإحساس دة وممكن للأسف يتريقوا عليه.. اقولك.. فكك منهم.. إعمل اللي تحسه النهاردة وبس وبراحتك ومزاج مزاجك.

برج السرطان

يا برج السرطان النهاردة رغم كل شيئ يوم عظيم.. من حقك ترفع راسك وتعرف إنك على المسار الصح حتى وإن كانت الحياة جاية عليك اليومين دول.. روق وعافر وإصبر وكل القرف والخنقة مسيرهم يعدوا.. غصب عن عين أي حد هيعدوا..ثق ف دة.

برج الأسد

النهاردة يا برج الأسد جايز يتهيألك ان كل حاجة بتعاندك او قاصدة تقريفك بس الحقيقة انه هو مجرد سوء حظ عابر .. عكوسات من الحياة مش أكتر..انما ثق ان الحياة مبتستقصدش حد بعينه..هي حاطة علينا كلنا مش انتا لوحدك.. اتنفس بعمق وإرمي ورا ضهرك..يوم تملك تخليه يوم حلو لو قررت دة من جواك بصدق وإصرار..وانتا ملك الإصرار بلا منازع..ف بص للحياة وإضحك وطنش وإنبسط وبس.

برج العذراء

النهاردة يا برج العذراء انتا قوي عاطفيا جدا تجاه الناس وتجاه الحياة..جايز تحس امواج جواك بتلطش ف شط مشاعرك.. بس الأكيد انك قوي وهتعدي من اي عقبة ممكن تلوح ف افق المستقبل القريب..كونك حساس مش معناه انك ضعيف.. بالعكس والله..اللي يقدر يلمس بقلبه الحياة اليومين دول ويقدر كمان يعترف ب دة ويثمنه ويقدره هو أكيد شخص قوي..الضعيف هو اللي بيتظاهر بالقوة والصلابة.. مش العكس يابرنس..مش العكس ابدا.

برج الميزان

يا برج الميزان..رغم انه انتا محتاج تريح وتكسل ومتعملش أي حاجة.. إلا انه جواك صوت بيهمس بخفة وتكرار بلا زهق وبيقول.. “إشتغل يا حبيبي إشتغل”.. تسمعله او متسمعلوش دي حاجة راجعة لقرارك انتا لوحدك وبس.

برج العقرب

النهاردة يوم جميل يا برج العقرب.. يوم هتحس إنه متفصل عشانك.. أتمنى متستغلش دة غلط وتركز إزاي تنجح.. مش إزاي ترازي.

برج القوس

يا برج القوس..النهاردة جايز تحس انه اليوم مزحوم وكله دوشة ووراك مليون حاجة تعملها ودة طبيعي يحسسك انك مشتت وتايه حبة..ف مهم ف بداية اليوم تمسك ورقة صغننة وترص فيها كل الاولويات وكل الثانويات والفرعيات..المهم واللي مش مهم..وهتتفاجئ بعد ماتعمل كدة انك إستريحت ودماغك اتنظمت وظبطت بقي في رضا كدة حلو عن نفسك.. وتقدر تقعد بثقة ومتعملش أي أي حاجة.

برج الجدي

النهاردة يا برج الجدي كل كلمة هتطلع منك هتطلع محسوبة.. كل تصرف هيبقى بالمقاس..هتستخبى وتداري مشاعرك ورا الوش الفورمال الرسمي الجد عشان خايف تتهم بالضعف لو إتعاطفت مع اللي المفروض تتعاطف معاهم خوفا من انك تحس انك مُستغل منهم..انتا حر..انتا كبير كفاية عشان تميز اذا كان التصرف دة صح ولا غلط..انا شخصيا مش هقولك.. إعرف بنفسك لنفسك.

برج الدلو

معلش..معلش.. متزعلش نفسك.. مسير الحياة تربيهم وتفهمهم.. أو تمسح رمادياتهم المصطنعة البلاستك فجأة.

برج الحوت

النهاردة يا برج الحوت مهم تاخد بالك انك مش دايما صح.. مهم تاخد بالك انك مش ملاك..مهم تاخد بالك ان نبرة التعالي والمثالية مخلية شكلك وحش قدام نفسك قبل ما يكون وحش قدام العالم..حاول متخدعش نفسك وإتعامل بواقعية حقيقية مع الحياة ومع عيوبك وغلطاتك..يمكن تفلح..او متفلحش.. انتا حر.

****************************************************************************

الحظ هزار من الحياة.. مش أكتر.. ومحدش يملك معلومات كافية ولا بصيرة كافية ولا علم كافي عشان يقولك هتبقى النهاردة كويس أو لأ.. دا دايما متوقف على اختيارك وعلى مزاجك ومودك وظروفك لوحدك.

الحظ ممكن يكون موجود ممكن ميكونش موجود..القرار قرارك لوحدك ف حياتك وبس..بس لو اخترنا نشوفه وندور عليه كويس وبإهتمام هنشوف تأثيره في حياتنا طول الوقت ومنقدرش ننكره.. بنشوف ناس مبسوطة وناس لأ.. بنقول على المبسوط حظه حلو وبنتمنى نبقى حظنا من حظه ونبقى مبسوطين زيه وبنتمنى نملك الانبساط دا ونتحكم فيه .. ونستدعيه كمان وقت اللزوم زي جني المصباح..زي الأحلام.. وزي الأماني والخيالات الحلوة.. وقت الضيقة والخنقة والمشاكل والاحتياج اليومي للأمل ف بكرة أفضل وأروق وأجمل وألوانه أحلى..بنتمنى يكون في منطق واسباب للسعادة ممكن تتحط وتتكثف ف كلام بسيط وقريب..

ومن هنا بقى في توقعات الحظ اليومية بالاعتماد على حركة الكواكب ومواقع النجوم وعلم الفلك.. محدش ينكر إن كوكب الأرض كله واقع تحت تأثير حركة الكواكب المحيطة وخصوصاً القمر.

ولولا تأثيره مكانش بقى في حركة مد وجزر ومكانش الإنسان عرف يسافر بمراكب في البحر.. ولا كان الإنسان اتحرك من بلد لبلد برضه ف البر لو مكانش في مواقع للنجوم مميزة ف السما يقدر يعتمد عليها..

إفتكر الكلام دا وانت بتقرا حظك اليوم النهاردة وكل يوم ياريت ..

وتأكد إنك سواء عجبك الكلام المكتوب هنا في برجك أو لأ فانت تقدر تصنع حظك بإيديك سواء اليوم أو كل يوم..

الكلام المكتوب هنا دايما الغرض منه الفرفشة والدلع والمزاج الرايق بعلامات حلوة من الحياة محطوطة ف كلام وحبة مزيكا على مزاجك..

تابعنا يومياً عشان تعرف حظك اليوم وكل يوم ومتنساش.. كل دة مجرد هزار برئ ياريت متاخدوش على صدرك..او تتضايق بدون داعي..هدفنا كله مجرد حبة فرفشة وهزار برئ..ياريت متاخدوش على صدرك.

تحياتنا الدائمة.

حظك اليوم
حظك اليوم