في ناس بتعتبره دموي بزيادة وفي ناس تانية شايفة انه احسن اختراع بعد الكهربا.. طبعا دة فيلم لوجان. واللي يعتبر اول فيلم سوبر هيرو في سنة 2017  وتاني فيلم يتصنف R يعني للكبار فقط.

 

رغم ان شكله مايبانش عليه لكن الفيلم كان وراه جيش خاص عشان يعمل المؤثرات الخاصة بتاعته ودة فيديو يخليك تشوف الفيلم تم ازاي قبل وبعد اضافة المؤثرات.

 

 

المؤثرات من صنع شركة Rising sun pictures وهي الشركة اللي عملت مؤثرات فيلم the wolverine والشركة المرة دي اشتغلت على 230 لقطة من الفيلم وشغل المؤثرات كان متنوع بين حركة مخالب ولفرين لحد توزيع شكل الدم على الشاشة ساعات كانت بتضيف شوية اضافات وتفاصيل في الخلفية.

 

وبحسب ما قال خبير المؤثرات دينيس جونز لموقع "سينما بليند" فالناس دلوقتي بتزهق وتتضايق بسرعة من كتر المؤثرات بس السبب الحقيقي لدة ان الناس بتاخد بالها من المؤثرات الوحشة اللي مش معمولة بنضافة.. عشان كدة كان بيحاول يستخدمها بشكل مبتكر وتبان حقيقية.

 

وقال كمان ان اكتر مشهد كان فيه مؤثرات في الفيلم مكانش عشان هيو جاكمان ولكن كان عشان باتريك ستيوارت اللي كان المفروض انه بيستخدم قوته بشكل عشوائي في مشهد الفندق عشان كدة المشهد بتاعه خد اكتر من محاولة عشان يوصلوا للنتيجة الصح اللي ترضيهم.

 

 

وقال انه في كل الاحوال لو عايز تشوف مؤثرات كويسة فدة صعب لأن الصح في المؤثرات انها متبقاش واضحة في الفيلم..

 

والمعروف عن فيلم لوجان انه اخر فيلم لهيو جاكمان في دور ولفرين وهو اللي اصر ان الفيلم يبقى تصنيفه R يعني للكبار فقط واللي شجعه على كدة ان فيلم ديدبول السنة اللي فاتت نجح جدا رغم التصنيف دة واللي كانت الشركة المنتجة خايفة انه يطفش عدد كبير من الجمهور..

 

ولحد دلوقتي مش معروف مين هيعمل الدور بعد كدة لكن الجمهور بيرشح اسماء كتير للدور منها توم هاردي لدرجة ان في فانز عملو صورة بيتخيلو فيها شكله في الدور.