ليه الطفل الحيلة أذكى من الطفل اللي عنده أخوات؟

إذا كنت إبن وحيد .. او بتفكر تخاوي إبنك ف إليك هذا الموضوع ...

كلنا بنغلط .. وكلنا لازم نعترف .. إن أكبر غلطة عملناها وإحنا صغيرين .. هي لما عيطنا لأمهاتنا وقولنالها .. إحنا عايزين أخ أو أخت ..

بس معلش انت برضة لما عملت كدة وإنتا صغير كنت صغير ومتعرفش حاجة .. دلوقتي ماشاء الله انتا كبرت وعرفت كل حاجة .. عرفت مين اللي بياخد هدومك الجديدة ويخرج بيها .. وبيقّلب برفانك الأورچينال .. والأخطر من كده انه هو نفس الشخص دة.. اللي كان سبب إن إبداعك وذكائك يقل ..

طبعا انتا مخضوض دلوقتي ومش فاهم او مش مستوعب.. معقولة أخوك أو أختك هما السبب..

في حتة شريرة جواك فرحانة وهتخليك تجري على ماماتك وباباك وتقولهم إن مجموعك وتقديراتك ( الآي كلام ) دي.. انت ملكش ذنب فيها .. وإن اخواتك هما السبب .. عامة لو ناوي على كده ربنا معاك .. وإحنا للأسف هنديك الشماعة اللي هتعلق عليها فشلك .. أما بقى لو انت أولريدي الحيلة ..ف أنت برنس .. وبنهديلك الموضوع دة يمكن يعجبك..

في سنة 2016 .. نشرت جريدة اسمها Brain Imaging and Behavior دراسة بتقول إنه ف الوقت اللي أغلب الناس فاكرين إن الطفل الوحيد ده متدلع وقاعد ليل نهار لوحده زي قرد قطع .. اكتشف العلماء إنه مبدع وذكي أكتر من الأطفال اللي عندهم أخوات .. بس في نفس الوقت أقل منهم من الناحية الإجتماعية .. يعني تقدر تقول عليه واخد جنب و موزي كدة لوحده

الناس الطيبة اللي قاموا بالدراسة دي اختاروا 303 طفل مابين أطفال وحيدين وأطفال ليهم أخوات وعملولهم كذا إختبار نفسي عشان يشوفوا هل في فرق بين دماغ الطفل والوحيد وغيره من الاطفال ولا لأ ..

الإختبارات دي شملت :

- اختبار لقياس أهم خمس صفات في شخصية الفرد وهما (العصابية والانبساط والتفتح والطيبة ويقظة الضمير)..

- واختبار تاني اسمه تورانس بيقيس التفكير الإبداعي عند الأطفال في سن الحضانة..

- ده غير إنهم عملولهم كمان آشعة رنين مغناطيسي..

بعد كل المجهود دة مع الأطفال - واللي يزن واللي عايز مامته - بيّنت الإختبارات إنه في فرق بسيط ما بين دماغ الطفل الوحيد ومابين غيره من الأطفال .. أولا عنده مرونه في التفكير وده مؤشر رئيسي للإبداع ..

ده غير كمان إنهم لاقوا -لامؤاخذه- إختلاف في حجم المادة الرمادية مابين الطفل الوحيد والطفل اللي عنده إخوات .. طبعا إنت بتقول دلوقتي إيه ياخويا المادة الرمادية دي .. انا أقولك يا سيدي..

دي مادة بتبقى موجودة في الفص الجداري من الدماغ ف حتة كده اسمها التلفيق فوق الهامشي .. يعني من الآخر وبعيدا عن المصطلحات العلمية المكلكة المنطقة دي في الأنفوخ .. ف التلفليف ده بقى مسئول عن اللغة ومعالجتها .. ولما تبقى المادية الرمادية فيه كتير .. يبقى إبنك مبدع ياحاج..

لكن في نفس الوقت .. حجم قشرة الفص الجبهي في الدماغ قليل ف العيال اللي عندهم أخوات .. والجزء ده من الدماغ هو اللي بيتحكم في الشخصية السلوكيات الإجتماعية .. يعني ممكن متبقاش شخصيته لذيذة مع الناس للسبب دة..

والموضوع ملوش علاقة بتركيب الدماغ .. لإن كل الناس تركيب مخها زي بعضه .. اللي بيفرق بس ما بين طفل وطفل هي طريقة التربية .. فمثلا الابن الوحيد أبوه وأمه موارهومش غيره ف بيدوله كل الإهتمام والرعاية .. ف دة بيزود فرصه في النجاح والتفوق أكتر من الابن اللي بيربيه أب وأم عندهم أورطة عيال .. وهنا بيحضرني جملة أحمد ماهر الخالدة .. "الراجل مش بس بكلمته الراجل برعايته لبيته واسرته"..

الشنب اللي خوف الناس من الخلفة وكرههم في العيال من اساسه
الشنب اللي خوف الناس من الخلفة وكرههم في العيال من اساسه

بس من الناحية التانية إهتمام الأسرة الزايد بالأبن الوحيد .. ده بيخلي إحتكاكه أقل مع العالم الخارجي .. ف لو حصل توازن مابين الإهتمام بالتربية مع شوية إنطلاق .. هتلاقي إبنك بيفوت في الحديد .. ولو مفاتش خليه يعدي علينا في العيادة .. ولحد ماتيجوا أبقوا اسمعوا شوية أغاني سبيس تون وانتوا جايين في الطريق