إبقى قابلني لو خسيت وإنتا في دماغك الأفكار دي 

تلاقي الواحد من دول عامل دايت ويقولك أنا بخس... وفي شوية حاجات بيعملها تضرب بيها كف على كف وكلها ما بتقللش الوزن ولا ليها أي تأثير على الدهون أساساً.. بحثنا ودورنا في بعض الدراسات والأبحاث وجبنالكم الخلاصة عشان تخس صح..

الدهون مش بلاستك عشان يسيح ..

الشاي الأخضر حلو وله فوايد كتير أكيد منها إنه بيساعد خلايا جسمك تبقى شباب على طول عشان فية مضادات أكسدة بس مش بيسيح الدهون..

هو بيساعد على حرق الأكل بس لو زودتها وكلت أو?ر مش أكتر..ف إعرف انه ولا جردلين شاي أخضر كل يوم هايخلوك تخس..

الشوربة فيها دهن قاتل ..

أنت متخيل أما بتشرب شوربة فراخ ولا لحمة أنت كده هاتخس؟.. أبدا..عزيزى متبع الحمية الغذائية الشوربة دي خلاصة دهن وجلد وعروق في صورة سايلة وانتا عمال تشرب وتقول دايت..طب إزاي ياجدع..

فاكهة كتير كتير ..

الفواكه مفيدة وأليافها بتساعد على عملية هضم سليمة والبرتقال والليمون خصوصاً بيساعدوا في حرق الدهون .. بس لو فضلت تاكل فاكهة عمال على بطال وتقول مافيش دهون فيها ولا سعرات ف إعرف ان انتا غلطان..

لإنها بتحتوي على سكر الفركتوز اللي برضو ممكن يتخنك من كتر أكله يامعلم..

8 أكواب مية في اليوم ..

 شرب السوائل حاجة مفيدة بس على الماشي كدة إعرف أن حكاية 8 كوبيات مية دى فاااكسة لأنه ببساطة خبراء التخسيس لما بيقولوا 8 كوبيات مية فهو هنا يقصد ان نسبة السوائل فى جسمك مهم تعادل 8 أكواب مية..يعنى ممكن تشرب عصير بيور.. تاكل خيار وخس كتير مثلاً وتعادل نسبة المية ف جسمك بالمقدار دة .. مش إنك تفضل عمال على بطال تعّب ف مية رايح جاي.. وصلت المعلومة كدة..

الحاجة الساقعة الملونة ..

حاجة تغيظ بجد ان في بعض الناس تقولك الحاجة الساقعة السودة بتخن عشان ملونة ألوان صناعية لكن الحاجة الساقعة اللي مش سودة مبتخش عشان مافيش لون طب خلي بالك كل أنواع المياة الغازية مليانة سكر كتير جدا جدا ملون وغير ملون  ماعدا الدايت والزيرو إشرب وأنت متطمن..رغم ان ملهومش أي فايدة ف الدايت برضة وطعمهم غريب بصراحة..

المية وسط الأكل بتعمل كرش ..

مش صح ومش صح خالص..المية بتسهل عملية الهضم ولو ما شربتش ممكن تزور وتروح فيها..

كل مشاكل المية وسط الأكل أنها ممكن تعيد ترتيب الوجبة جوا معدتك وتسبب بعض التقلبات.. مش أكتر..

ثم عاوز تخس ليه اصلا..

طالما روحك مستريحة ف جسمك على حاله كدة..تخنقها وتضايقها ليه وتخس..

كُل وبالهنا والشفا على قلبك بلا وجع دماغ.