لو بتحب المزيكا والأنتخة والصرمحة والفصلان..انت مش فاشل انت مبدع

لو بتصحى كل يوم الصبح مخضوض على صوت المنبه .. ف تجري تلبس وتنزل من غير فطار  ..وبعدين تركب المواصلات وتقضيها في زحمة وخنقة لحد ما توصل الشغل  .. وتجري تُبصم بسرعة قبل ما يتحسبلك تأخير .. وتفضل طول اليوم هالك نفسك لحد بليل .. بعدها تروح تنام مش شايف قدامك من التعب .. لو انت ف الطحونة دي كل يوم .. يبقى البقاء لله في مخك النضيف وف إبداعك .. 

ممكن الناس تفتكر إن الإبداع ده مش لكل ناس ..

وإنه موجود بس عند أصحاب المواهب زي الفنانين مثلا .. بس ده مش حقيقي .. الإبداع موجود عند كل واحد فينا .. طالما عندك عقل يبقى عندك إبداع .. بس في ناس بتستغله ف بينقلها نقلة تانية خالص .. وناس تانية بتضيعه وسط زحمة وضغوط الحياة .. دول غالبا بيعيشوا

ويموتوا في نفس طاحونة الضغوط اليومية اللي مبتخلصش ومبيحصلش في حياتهم أي تغيير..

انتا من مصلحتك تنقذ إبداعك عشان تفرق وتختلف عن كل الناس اللي موجودة في الدنيا ..

الموضوع بسيط .. كل اللي عليك .. إنك تهدى وبالراحة على نفسك .. إفصل .. آنتخ .. الدنيا مش هتطير يابرنس..خد وقتك..

أما لو كنت أصلا شخص مبدع أو مبتكر .. ف بيقولوا إن أصعب لحظة بتواجه أي مبدع هي لما بيضطر يواجه الصفحات البيضا .. عشان كده انت كمان محتاج تفصل وتأنتخ .. ف تعرف ساعتها تبدع ..

 والإبداع دة هتلاقيه مرتبط بكلمة هتلاقيها منتشرة أوي بين المبدعين اسمها "الإلهام" .. اللي بيسموها بالإنجليزي " Aha moment" او ال"muse".. وهي لحظة "وجدتُها"  و إن الماكنة طلعت قماش اخيرا ..

علماء وباحثين كتير إنشغلوا بموضوع الإلهام ده وبدأوا يبحثوا .. هي لحظة الإلهام دي بتيجي إمتى وإزاي ؟ 

وإكتشفوا  إن الإلهام  دايما بينزل على المبدعين  وهما نايمين أو هما بيسمعوا موسيقى أو بيتمشوا .. أو بيخدوا شاور .. أو وهما داخلين يناموا .. بس الأكيد إن عمرها ما جت لواحد وهو  قاعد متكدّر على المكتب  بيحاول بيعصر دماغه عشان يطلّع فكرة جديدة ... زيك كدة

وعشان الكلام ميبقاش كلام في الهوا وخلاص .. في علماء محترمين و مشهورين أكدوا الموضوع ده زي مثلا.. 

نيكولا تسلا المخترع والفيزيائي والمهندس الكهربائي والمهندس الميكانيكي الأمريكي .. تلميذ إيديسون اللي حقق تطور كبير في المجال الكهربي .. كان بيقول إنه لما كانت حاجة بتقف قدامه كان بيسيب الشغل .. ويروح يتمشى شوية مع واحد صاحبه من أيام الكلية .. وفعلا بالطريقة دي توصل لطريقة تدوير الحقول المغناطيسية وكمان قدر يطوّر التيار المتردد الحالي ماشاء الله عليه. 

لو لسه مش مقتنع خليني أديك مثال تاني ..

طبعا محدش ميعرفش ألبرت أينشتاين .. اللي كان كل ما بيحتاج لإلهام بيسمع موتسارت .. وأكد المعلومة دي حوار في صحيفة نيويورك تايمز مع ابنه الكبير "هانز" .. اللي قال إن والده كل ما كان بيحس إنه خلاص وصل للنهاية ومفيش أفكار جديدة في راسه .. بيلجأ للموسيقى .. وفعلا كانت الموسيقى بتنجح ف كل مرة في إلهام أينشتاين .. و ساعدته يلاقي حلول لكل الصعوبات اللي كانت بتواجهه. 

الموضوع مخلصش هنا ..

دة كمان في كتاب اسمه The Happiness Track  للكتابة "إيما سيبالا" Emma Seppälä .. قدمت فيه بحوث من جامعة كاليفورنيا سانتا باربرا .. بتقول إن الواحد اللي ماشي في نور الله ماشي .. وبيحب الصرمحة والتمشية الكتير .. دة شخص مبدع لإنه بينفّس عن عقله وبيديله وقت للراحة و البعد عن الضغوط .. دة بالإضافة لبحث صدر سنة 2012 في مجلة رابطة العلوم النفسية .. بيقول إن الإنخراط أو الإنشغال في نشاط غير مقصود بيشجع العقل على العمل .. لأن العقل بيحس بحريته ساعتها وبالتالي بيطلّع أفكار أوت أوف زا بوكس وف الجون وش..

السلوك ده خلي بالك بيعتبر من إختبارات التفكير الإبداعي ..

ف حاول تسمع لأحلام اليقظة  والخواطر اللي بتجيلك في الوقت ده .. لأن أغلبها بتبقى أفكار مختلفة ومفيدة..

الخلاصة ..

حاول تاخدلك غُطس تريح فيه دماغك .. حتى لو ساعة أو ساعتين وسط زحمة يومك .. وكل فترة سافر مكان جديد أو جرب حاجة مختلفة .. وبكده تجدد عقلك  ..

ولما تجدد عقلك .. هـ تجدد حياتك .. وممكن تطلعلنا بفكرة تغير العالم .. مين عارف .. انت يعني مش أقل من مارك زوكربيرج اللي سيطر على العالم بمجرد فكرة بدأت بحتة سوفت وير كان عامله ف الاساس عشان يتعرف على بنات.

ولو فعلا بتيجي على بالك افكار عايز تسيطر بيها على العالم .. ممكن تفكر فيها وانتا بتسمع بلاي ليست .. موتسارت بالبلدي .. وربنا يوفقك.