دولة عربية بتمنع فيلم wonder woman وصدمة للفانز

على ما يبدو في دولة عربية مش هتتفرج على فيلم wonder woman دة بعد ما قالت صحيفة "نيويورك بوست" ان لبنان هتمنع الفيلم اللي مفروض يبقى في السينما الأسبوع دة

سبب منع الفليم ان البطلة "جال جادوت" اسرائيلية وممنوع التعامل مع اسرائيليين قانونا في لبنان ولحد دلوقتي مفيش دول عربية تانية اتكلمت عن حذف الفيلم او منعه ولكن في كلام عن تأخير عرضه بس علشان موسم شهر رمضان والعيد اللي هتنزل فيه الافلام العربي اكتر.

لكن السبب اللي قدمته وزارة الاقتصاد اللبنانية هو البوست اللي كتبته جال جادوت في 2014 على فيسبوك وقالت فيه مدح للجنود الاسرائليين لأنهم بيحاربو حركة حماس.

المعروف ان جادوت كانت ملكة جمال اسرائيل وكانت برضه في الجيش الاسرائيلي وكان تدريبها العسكري هو السبب انها تاخد ادوار اكشن زي ادوارها في Fast & Furious و Batman v Superman واللي بالمناسبة مكنش ممنوع في اي دولة عربية.

قرار منع الفيلم عمل دوشة وصدمة عند عدد كبير من الفانز، منهم مكنش عارف اصلا ان جال جادوت اسرائيلية وفي ناس تانية كانت عايزة تتفرج على الفيلم من غير سياسة ووجع دماغ وفي تعليقات تانية كانت بتقول انهم من نفسهم كدة كدة كانو هيقاطعو الفليم عشان جنسية البطلة.

وعموما مش دة هيبقى الظهور الاخير لجال جادوت في دور وندر وومن  wonder woman خصوصا انها هتظهر تاني في فيلم جاستس ليج وممكن تظهر تاني في فيلم "جاستس ليج دارك" اللي بيتم التحضير له دلوقتي لكن مفيش تفاصيل كتير عنه غير الاسم وهو مستوحى من قصص الكومكس، وممكن يبقى في جزء تاني ليها.

وفي رأي النقاد اهم ميزة لفيلم wonder woman انه اول فيلم سوبر هيرو نسائي وببطولة منفردة غير الافلام التاينة اللي كانت الستات فيها "سايد كيك" او دور ثانوي .. وعشان الميزة دي اتنظمت حفل عرض خاص للفيلم في امريكا الجمهور فيها من البنات بس وممنوع تماما الولاد او الرجالة والموضوع دة كان عمل مشاكل وجدل واتهامات بالعنصرية لكن في نفس الوقت ناس كتير كانت مرحبة به.