السوبيا ف رمضان مش مجرد وصفة حلوة ..دي لغة وشعب و ثقافة 

السوبيا اللي مكناش نعرف عنها غير إنها مشروب رمضاني ابيض شبيه باللبن ولذيذ ومغذي .. طلع وراها حكاية وقصة لطيفة أوي..

سوبيا هي اللغة الرسمية لجنوب غرب زامبيزيا .. وتحديدا المنطقة اللي بتقع على طول نهر زامبيزي جنوب باروتسلاندا .. المناطق و الأسماء الغريبة دي موجودة في جنوب وسط أفريقيا .. سوبيا مش بس من أهم اللغات بل كمان من أقدم لغات "البانتو" وهي مجموعة من اللغات الدارجة في منطقة جنوب ووسط أفريقيا .. 

وليها اسم تاني وهو "تشيكوهان"..

أهل السوبيا ميفرقوش كتير عن باقي سكان قارتنا الجميلة .. وبالبحث عنهم شوية لاقينا إنهم كانوا عايشين في البداية ورا شلالات فيكتوريا الشهيرة في أفريقيا وتحديدا على الحدود بين زامبيا وزيمبابوي وسط الطبيعة .. بعيد عن الدوشة ووجع الدماغ.

في أواخر القرن ال19 بدأ الإهتمام باللغة "السوبيا" ولا مؤاخذة .. و طبعا دة مش عشان سواد عيونها ده عشان تتفهم و تتدرس وتبقى مفهومة بالنسبة للمحتل الفرنسي وقتها .. دة بجانب رحلات التبشير للدين المسيحي اللي كانت منتشرة في الوقت ده في أكثر من بلد أفريقي .. ف مثلا دانيال ماتنغو  ألف  كتاب عن القواعد النحوية للغة السوبيا في الستينات .. وقبله بكتير في الفترة مابين 1896 و1899 ألف التبشيري الفرنسي إدوارد جاكوتيت كتاب عن القصص والأساطير المشهورة المتداولة مابين أهل البلد.

 اسم "سوبيا"  ده أصلاً جه منين

بصوا بقى في 3 نظريات حاولت أنها تفسر اسم "سوبيا" ده ..

النظرية الأولى للسياسي أندريس بريتوريوس .. اللي  بيقول إن كلمة سوبيا مستمدة من كلمة "سوبالالا" اللي معناها "دفع المملكة"..

أما النظرية التانية  فهي للسياسي الأفريقي شاموكوني .. وبتقول إن كلمة سوبيا مشتقة من كلمة "سوييرا"ومعناها "بُشرة النبي" .. وإن القبائل المجاورة هي اللي أطلقته عليهم كاللقب ..  

والنظرية التالتة مبتختلفش كتير مع النظرية رقم 2 في إرجاع أصل كلمة سوبيا لـ "سوبالالا" .. لكن بتزوَد عليها إن الرجالة في قبيلة لوزي في غرب زامبيا كانوا بيحبوا السيدات في سوبيا عشان حلوين كده ولون بشرتهم فاتحة .. ودة بسبب استخدامهم لخلطة كده  تشبه الحنة الحمرا وبيدهنوها على جلدهم عشان تحميهم من آشعة الشمس وتفتح الجلد .. فيفضلوا منورين على طول .. الخلطة دي اسمها "أو يو موسوبيلا" اللي اتطورت مع الوقت إلى "سوبيا"..

لو عجبك الموضوع يبقى كمله ببلاي ليست هتاخدك على أفريقيا .. أما لو ريقك جري على شوب سوبيا ساقع .. يبقى  طرّي على قلبك و متحرمش نفسك من حاجة و اتعلم طريقة تحضيرها في البيت من اللينك ده