نفسنة، منفسن، نفسية.. ايه بقي أصل الكلمة دي؟ وجهة نظري المتواضعة انها جاية من النفس او المريض النفسي، المريض النفسي اللي ممكن يكون حاسس انه مضطهد مثلاً او عنده وسواس و شايف اللي حواليه كلهم بيتمنوا له الشر و بيكرهوا نجاحه.

مفيش شخص منفسن الا وبيشوف كل الناس بتحقد عليه و منفسنة عليه و ده بيكون نوع من الاسقاط ، انه رافض حقيقته المنفسنة فبيسقط الصفة عنه و يرميها علي كل واحد في حياته . فيتحول الشخص ده لشخص بيعلق كل فشله علي شماعة ان الناس بتحاربه و كارهة الخير ليه .

مواصفات الشخص المنفسن

- حاقد و بالتالي ممكن يتحول لحاسد لإنه كاره الخير لغيره.

- عينه دايما علي حاجة غيره ، غير قنوع ولا راضي بحاله .

- مكتئب و محبط لان كل نجاح بيشوفه في حد و هو مش قادر يكون زيه بيسبب له احباط.

- طاقته سلبية و كلها موجهة للإضرار بغيره او التلسين عليه لانه كاره و معدم الثقة في نفسه ، بالتالي بيحاول التقليل من شأن غيره يمكن يعلي هو.

- خمول و غير نشيط لانه بيستسهل شماعة ان السبب في الفشل هو الآخرين فمش بيعمل مجهود الا لو هيضر حد .

- لا يشعر انه منفسن و بالتالي ممكن يكون موهوم انه شخص وسيم او انها فتاة جميلة و ان ده سبب نفسنة الناس عليه/عليها.

- القيل و القال و اللوكلوك الكتير من طباعه

- في مجال السوشيال ميديا ممكن تلاقيه عامل شير لحاجات خير كتير لإعطاء نفسه برواز الفضيلة و دايما بيقوم بالنصح و الارشاد.

- صياد ماهر للأخطاء و بعد ما يصطادها و ينشرها يحاول جاهداً اثبات انه مش عنده الاخطاء دي و انه مثالي ( نظام انا شاطر يا ميس)

- غلاوي و يكره نجاح الأخرين و ساعات اللايك او الشير بتكون تقيلة عليه لنجاح شخص ، و هيعملها في حالة واحدة هي المنظرة بمعرفة الشخص ده او ادعاء انه صديق

- دايماً شايف نفسه صاحب فضل عالناس و يتقن دور المتواضع بطريقة اوفر

- منافق ببساطة لإنه بيخفي نفسنته بضحكة او نظرة

- يكره المواجهة و دايما مش بيحب يكون في وش المدفع بس عنده القدرة يشحن اللي حواليه لعمل المواجهات .

- حالة إنكار للواقع و تصديق كذبه علي نفسه

- ممكن ينفسن علي نفسه شخصياً يعني لو صباعه اتعور ممكن يقوله :"أحسن تستاهل".

تعرف منين انك منفسن لو انت مش شايف في نفسك اي صفة من دول؟

تأمل كدة في نظرتك للناس اللي حواليك ، هل بيضايقك نجاحهم و تقول مش لو كنت انا مكانهم كنت عملت و عملت؟ بس !!Stop دي أول خطوة في النفسنة ، مكانهم ليه مانت ليك مكان ، اشتغل اجتهد ، ركز و إنجح فيه.

بتشوففي شخص جميل، ناس كتير متفقين علي جماله انه مش جميل ؟ حط قطرة و طهر عينيك من الحقد و جمل نفسك بروحك الصافية اللي هتنعكس علي شكلك الخارجي.

خللي دعوتك للناس بالخير من قلبك و بايمان تام و نية صافية

راقب نفسك و شوف تصرفاتك و شوف اللي الناس شايفاه فيك هل هي بتبعد عنك ولا بتحب دايماً تكون معاك وفي صحبتك؟

أخيراً العب شوية بحروف كلمة نفسنة و اعمل شوية مجهود و حولها لكلمة تنافس شريف ..

حب نفسك عشان تعرف تحب الناس.