‏فيه حبيب بيطبطب عليك لو وقعت، و فيه حبيب بيوقفك تاني لو وقعت.. و فيه بقي الحبيب اللي يسندك قبل ما تقع.

فيه انواع كتير بس لما جيت افندهم ملقيتهمش حبيب لقيتهم أي علاقة تانية و لو فندت دول كمان هيطلع اخر نوع بس .. لكن قلت اضمهم مع الحبيب اهو ذنب أخف من ذنب.

أول نوع اللي هو بيطبطب، بيحب بس بأنانية شوية ، بيحب نفسه أكتر و بيأدي واجب عليه و هو الطبطبة ، بيكون مشغول بنفسه أكتر من حبيبه فمش بياخد باله انه بيقع و بالتالي بيطبطب و يمشي و اهو عمل اللي عليه.

تاني نوع شهم بطبعه بس بردو اناني شويتين، بينشغل بنفسه و لما يشوف حبيبه واقع، الشهامة بتاخده و يوقفه تاني على رجليه.

أما النوع النادر.. قصدي التالت هو نوع من كتر احتوائه لحبيبه بيعمل درع يحمي حبيبه من الوقوع.. مش هنسمي النوع ده فارس الاحلام لإنه موجود في الواقع ، الاعجب من كدة انه مش بيكون بالمثالية دي الا اذا الطرف التاني كان متفاعل و مقدر، بمعني اصح هي تروس لازم تشتغل مع بعض.

اتكلمنا عن انواع الحبيب نتكلم بقي عن الحب نفسه شوية، ونشوف ظالمينه فعلاً زي ما قالت الست أم كلثوم ولا لأ.

- أحلي صفة في الحب هي التقدير، طبعاً لازم المودة و الاحترام و كل ده، لكن التقدير بعتبره هو المحفز لانه بينقل للطرف التاني طاقة تفعله.

صعب أوي طرف يفضل يدي، ويحب، ويسامح، ومفيش طرف تاني يتفاعل. مش هقول تعمل حسابك في العطاء للطرف التاني ولا هقول اتقل على حبيبك، لكن هعطي مثل بسيط: لو حبيبك بيحب التفاح و انت خليت حياته جنينة تفاح و هو عارف انه مهما سابها و رجع هيلاقي التفاح، احسن ليكم ولا لما يلاقي شجرة كبيرة بتطرح واحدة واحدة و ممكن في أي وقت لو ملقيتش اهتمام تدبل؟ الطرفين مهمين لحماية الحب، بلاش طرف يميل عالتاني و ياخده حق مكتسب.. اسقوا الوردة مع بعض لأن الوردة لو ماتت مفيش نهر ممكن يحييها تاني.

- أرقى نوع حب هو الحب اللي بتمتلكه و ممكن يبقي في قلبك و محدش يعرفه.

أكيد مش بقصد الحب في السر . أنا أقصد الحب العزيز اللي انت مش محتاج تتمنظر بيه بصور عالفيس بوك او كلمات جميلة في بوست، أو ضحكة مرسومة لصورة فيها شكل رومانسي، أو دبدوب في الفالانتين. لان الحب ده بيكون كافي انه حتي مش محتاج اني اظهره او اني اثبته. ممكن نسميه حب راسي ثابت واثق.


- أجمل جملة اتقالت في الحب بالنسبة لي "أنا كنت عبدك في عز ضعفك و كنت يوم التجلي سيدك".

منتهى الرقي و الخضوع و الاحتواء و الضعف القوي.

ساعات كتير بنخسر حاجات في حياتنا عشان خايفين نخسرها، متخافش من الحب ولا من الخسارة و خلي قلبك جامد.

عكس الحب عمره ما كان كره، عكس الحب هو اللامبالاة، إنك ميفرقش معاك الشخص اللي كنت بتحبه.

..الحق المكتسب مش حب
.. الشك مش حب
.. الأنانية مش حب
.. النكد مش حب
.. الخيانة ، الألم ، حب التملك ، الطمع كله مش حب.

إفهموا الحب.
..الضعف حب
..القوة حب
.. الغيرة حب
..العذاب حب
..الشوق ، الحنين ، الشغف ، الحزن كله حب.

مش لازم يكون فيه يوم (عيد الحب) ، الحب موجود كل وقت بس يمكن محتاجين يوم ينشط الحب ده ويحسسنا بيه بشكل أحلى. بدل ما تتريقوا على عيد الحب حاولوا تحبوا.

مهما طال الزمن ومهما انتظرت الحب، الحب مسيره ييجي ده نصيب بس على شرط عشان تعيشه صح، لازم تحب نفسك الأول.

ببساطة هتعرف انك بتحب لما تسهر الليل لإن واقعك بقى احلى من احلامك.