رحلتي المرة دي كانت الهند "بيقولوا عليها بلد العجائب" دي تاني مرة أسافرها، أول مرة كانت من ٣ سنين، و قررت أسافرها تاني لانها البلد الوحيدة اللي أرخص من مصر، عملة و شوبنج و فسح و خصوصاً عملتها اللي كنت باخد سعر أي حاجة واقسم على عشرة واحسبها بالجنيه واتبسط ان فيه عملة بقسم مش بضرب عشان اعرف السعر، و ده طبعاً قبل التعويم، بعد التعويم بقي بقيت اقسم على تلاتة.

بلد جميلة مش كلها طبعاً، مناطق تحس ان انت في أوروبا من الغني الفاحش، لكن فيها مناطق تحس انك في الصومال من الفقر الشديد. مفيش تقريباً طبقة متوسطة. كل حاجة و عكسها، قصور و مناطق تحفة و على ناصيتها عشوائيات لا تتخيلها.
نيودلهي العاصمة كبيرة و ازحم من مصر في المواصلات، البلد اللي لازم يكون معاك عربية بسواق هندي طول الوقت، متاخدش مخاطرة انك تكتشف أماكن لوحدك أحسن لك.

آلاف الالهة بتتباع في كل حته هناك وقرابين من الورد، ديانات كتيرة و الوان رهيبة، ثقافة جديدة، توابل كتيرة، علاجات طبيعية.. مع كل ده التعايش مع بعض حاجة غريبة.

تاج محل من عجائب الدنيا مكان كله طاقة ايجابية، ممنوع دخول أي مأكولات أو سجائر او أي شئ ممكن يلوث الجو، مبنى معماري تحفة فنية بتفاصيله الرخام ولما رحت قبل كده كان كله أجانب، المرة دي زحمة و كله بيبص لنا و يتصور معانا ما إحنا الأجانب، سألت السواق فين السياحة، فين الأجانب؟ قال: ناس كتير كانت بتيجي الهند عشان هي بلد رخيصة بس للأسف "التعليم اتطور و ناس اشتغلت في اماكن جيدة فالاسعار زادت" فالسياحة قلت وده شئ مزعلهم.. علاقة عجيبة شويتين ان التطور يقلل السياحة.

العجائب كلها موجودة قدام البيوت في القرى تلاقي اصنام و أصنام بتتباع في المول كمان.. بلد كفار صحيح.. عارفين بلد الكفار دي عملت ايه عشان تحافظ شوية على عملتها؟

سعر الدولار الرسمي ٦٨ روبية و العملة نازلة و طبيعي يبقى فيه سوق سوداء و بخبرتي بقى في السوق الموازية في مصر قلت اني هحول الدولار بسعر حلو بقى، و الصدمة الكبرى في بلد الكفار: الصرافات، البنوك، الاوتيلات مع احتياجهم الشديد للدولار محدش بيشتري الدولار بأكتر من ٦٥ روبية.. لا سوق سودا ولا صرافة تحت الكوبري كلهم متفقين.. سألت ازاي اقدر اخد سعر رسمي قالوا مستحيل و ان اقصى سعر هيكون ٦٦ فقط و بحد اقصى ٧٠ دولار وعالباسبور كمان.

طب هما معندهمش تجار عملة مثلاً !؟ طلعوا بقى بيعبدوا اصنام بس بيخافوا جداً على مصلحة بلدهم.

حاجة لطيفة جداً: الشحاتين يشوفوني محجبة يرطموا بالهندي وفي النص كلمة الله عشان أديهم فلوس.. يشوفوا بنتي مش محجبة يرطموا و في النص كلمة كريشنا اللي هي اشهر صنم هناك.

ملحوظة : الأكل الهندي شهي جداً في مصر و دول عربية كتير، ما عدا في الهند .. ده بجد على فكرة و في الصين كمان لان المطاعم هنا بتكيف الأكل على حسب المزاج المصري.

رحلة جميلة بعيداً عن المطبات و المراجيح فوق المحيط.