من غير رتوش ولا مقدمات.. كلنا بلا استثناء من حوالي 6 سنوات، ولا يمكن أكتر ولحد دلوقتي، بنتكلم عن التغيير.. منتظرينه ليل ونهار.. كل مطالب الناس بكل فئات المجتمع عايزين تغيير.

تغيير في مستوى المعيشة.. في مستوى الخدمات اللي بتتقدم في المصالح الحكومية.. تغيير في التعليم والصحة والاعلام والمواصلات، وكل شيء بيقابله الإنسان من بداية يومه لنهايته.

مش هاقول يتم التغيير إزاي، لكن هطرح أسئلة هي مجمل مقالي.. الأسئلة لكل فرد منا.. أسئلة تمس الضمير أولًا وأخيرًا.. الضمير العبادة المنسية.. والأسئلة على كل المستويات والمناصب.

نبدأ..

منتظر تغيير إزاي.. وإنت بتقضى شغلك من غير حب، ولكن مجرد وظيفة بدون اتقان أو اخلاص؟

منتظر تغيير إزاي.. وإنت مش بتقضى ساعات شغلك كلها كاملة؟

منتظر تغيير إزاي.. و إنت بتقضي وقتك في الكلام على فلان وعلى علان؟

منتظر تغيير إزاي.. و إنت مع أقل موقف ضد رأيك بتشتم وتلعن؟

منتظر تغيير إزاي.. و إنت مش قادر تتحمل تشيل ورقة في إيدك عايز تتخلص منها لحد ما تلاقي صندوق مهملات فتقوم راميها فى الشارع؟

منتظر تغيير إزاي.. و إنت مش قادر ترفع السماعة على صاحبك وأنت منتظره في العربية فتقوم تضرب كلاكس العربية وتزعج كل الشارع؟

منتظر تغيير إزاي.. وإنت لما تقرأ خبر عن حدث عالمي أو محلى بتفتح باب الفتاوي، و إنت ماتحركتش من على القهوة أو حتى من على الموبيل في بيتك؟

منتظر تغيير إزاي.. و إنت مش عارف تتحكم في ألفاظك وأفكارك وعصبيتك؟ّ

منتظر تغيير إزاي.. وإنت بتنسى حق أقرب الناس ليك؟ّ!

منتظر تغيير إزاي.. وإنت بتنسى حق اللي أحسن إليك ومخلص استهانة به و بتكافيء الفاسد خوفا منه؟!

منتظر تغيير إزاي.. وإنت مش قادر تضحك فى وجه الناس لو حصل لك موقف بسيط جدا زي مثلًا إن حد صحاك بدري عن ميعادك؟!

منتظر تغير إزاي.. وإنت مش قادر تغير أبسط عاداتك السلبية عندك وطول الوقت بتتريأ على سلبيات غيرك ؟

منتظر تغيير إزاي.. وإنت عامل حساب للناس وكلامهم بمظاهر خداعة و مش عامل حساب لضميرك ؟ّ!

منتظر تغيير إزاي.. و إنت بتدافع عن باطل أو تقف ضد حق من غير ماتتحقق؟!

منتظر تغيير إزاي.. وسلوكياتك الاستهلاكية لا تقوم بلد ولا قادر تتحكم فيها ؟!

منتظر تغيير إزاي.. ولسه بتحب وتكره على حسب هواك مش على حسب الحق والحقيقة؟

منتظر تغيير إزاي.. وإنت مش بترضى بأى شغل وعايز تكسب من مكانك من غير تعب ؟!

منتظر تغيير إزاي.. وانت بتغش فى شغلك وضميرك على حساب الباقى المهم انت تبقى كسبان؟!

منتظر تغيير إزاي.. وإنت ساكت على النصاب والفاسد والكذاب و يمكن كمان تساعده خوفًا منك أو قلة حيلة؟

منتظر تغيير إزاي.. وإنت مش عارف تفرق بين طلب الحق والتعدى على حق الاخرين؟

منتظر تغيير إزاي.. ولسه جواك غيرة وحقد من أي حد ناجح او مميز عنك؟

منتظر تغيير إزاي.. والانسانية جواك مجرد شعار مش فعل حقيقى عايش به فى حياتك؟

اكمل ولا كفاية.. صدقوني ممكن أكتب صفحات مش هتكفي ومش هنخلص.

لكن كل واحد يقرأ المقال يجاوب بكل صراحة على الأسئلة اللي طرحتها وأنا أولكم.. إذا لاقيت سؤال إجابته مش هترضيك عن نفسك ابدأ فورًا واتغير.

عايز تتحكم وتغير الدنيا.. اتحكم في نفسك الأول. إنت بداية دايرة التغيير ونهايتها.

لما تؤمن بكده صدقني هتشوف التغيير قريب جدًا

دمتم إيجابيين