التوقيت الجمعة، 29 مارس 2024
التوقيت 01:28 م , بتوقيت القاهرة

حوار| محمد خميس صاحب ألبوم "باتمان": أنا بتاع جاز

انتشر ألبوم صور يحمل مجموعة من التعليقات المنتشرة على موقع "فيس بوك"، ويرد عليها "باتمان" بجملة "اخرس". محمد خميس، صاحب الألبوم يتحدث لأول مرة بشكل خاص لـ"دوت مصر"، عن نفسه والألبوم.


عرفنا على نفسك؟


أنا خريج هندسة دفعة 2006، وشغال في مجال البترول، وبكتب قصص وسيناريوهات من ساعة ما اتخرجت، وبنشر بعض الحاجات على "فيس بوك"، ومش واخد أي حاجة بشكل احترافي غير الجاز، فأنا أصلا بتاع جاز.



إحكيلنا قصة ألبوم face book style


أنا على "فيس بوك" من ساعة ما بدأ، وسبته في أول 2010 لمدة 3 سنين، ولغاية ما سبت "فيس بوك" كان مجرد منبر اجتماعي لطيف عليه شوية كويزات واختبارات نفسية على شوية تهاني بأفراح ومواليد وكان الله بالسر عليم.


لما رجعت "فيس بوك" في 2013، فوجئت إنه بقى منصة لإبداء الآراء بشكل رهيب والاجتماعيات اللي فيه قلت جدا، بجانب كم البوستات السياسية والاجتماعية وكده، بس لاحظت إكمني جاي من بعد انقطاع إن معظم الأراء اللي بتنتشر وبتلف "فيس بوك" مالهاش خالص وزن في الشارع وفي الواقع، صحيح بعضها مهم ولازم الناس تاخد بالها منه، بس معظم البوستات المنتشرة بتتكلم بلغة مايفهمهاش الناس العادية، ومع ذلك بتشكل وعي الناس اللي على الفيس اللي تقريبا مبقوش متصلين بالعالم الحقيقي بشكل أو بآخر.



ده اللي أوحالك بفكرة الألبوم؟


عارف الفيديو بتاع الراجل العجوز اللي كانوا مستضيفينه ع التليفزيون، وكانت المذيعة بتقوله إحنا عايزين نناقشك في قضية المرأة فقالها: بلا مرأة بلا ... أنا عايز أتكلم عن الأوتوبيس.



قصدك إننا بقينا في عالم افتراضي؟


أيوه أنا بقيت حاسس إن الناس ع "فيس بوك" حاجة، والناس في الشارع حاجة، يعني في الحقيقة لو واحدة نزلت الشارع، وقالت إن لبس البنت مالوش أثر في انتشار التحرش هتتعكش ضرب، ولو واحدة شالت في الشارع صورة برادلي كوبر، وقالت "هيييح" أخوها هيسحبها من شعرها للبيت وهتبات مشوهة. إحنا بقينا عايشين شخصيتين للأسف، وفي أجيال كاملة مبقتش معانا وعايزين قلم "باتماني" يفوقهم.



وليه بات مان؟


حسيت إنه مناسب خصوصا إن باتمان بيضرب روبين اللي هو تلميذ باتمان في الحقيقة، يعني قلم تعليمي مش قلم مخبرين.



قصدك إيه بكلمة أخرس اللي قالها باتمان؟


إخرس يعني شوف الواقع.



ليه ذكرت عصير بيتي؟


عصير بيتي كل شوية تطلع عليه إشاعة، وكل إشاعة واحد يقولك أنا لسه جايالي المعلومة من المصنع، وكأن مصر كلها بتبث من المصنع.



توقعت انتشار الألبوم بالشكل الكبير ده على السوشيال ميديا؟


الصراحة لأ، لأن الناس عادة مبتحبش اللي يتريأ عليها، بس طلع في ناس كتير مخنوقة زي.



هتعمل ألبومات تاني؟


أكيد لو جاتلي أفكار تانية، وفي ناس بعتتلي عايزة تزود حاجات ع الألبوم.