لو جوزك منكد عليكي عيشتك، وكل يوم والتاني في خناق، وخلاص مش قادرة تكملي معاه.. ببساطة اطلبي منه الطلاق.

لو وصل الموضوع معاكي لطريق مسدود، وجوزك ركب دماغه، في الحالة دي هيكون أفضل حل هو "الخلع"

وإحنا هنعرفك الطريق:

1-  روحي لمحامي وتكوني محضرة معاكي ع الأقل ألف جنيه كمقدمة أتعاب، وتقوليله ببساطة إنك عايزة تخلعي جوزك لإنك بتكرهيه.

في نقطة مهمة، انتي مش مضطرة خالص تخرجي أسرار بيتك برة وإوعي تخلي المحامي يضحك عليكي وتقعدوا بقى في جلسات فضفضة وتعرفيه تاريخ جوازك الأسود.. كل إللي تقوليه "عايزة اخلعه لإني مش عايزة أكمل معاه".

وأهم حاجة لازم تنسي تماما جو الأفلام العربي، وإنك لازم تقولي سبب معين للخلع زي إنه "بيشخر" أو "مبيعرفش".

"القانون مش بيلزمك تقولي أي سبب لطلب الخلع..كفاية بس إنك تعلني عن إنك تبغضي الحياة معاه ولا تطيقي معاشرته".

2-  المحامي هيكتب الدعوى ويقدمها لحاجة اسمها مكتب التسوية بمحكمة الأسرة.. المكتب ده كل شغلته إنه بيكون زي المصلح الاجتماعي، يعني بيجيبك انتي وجوزك ويقعدكم "قعدة عرب" ويحاول يوفق ما بينكم.

3-   معلش استحملي الساعة اللي هتشوفي فيها وش جوزك في مكتب التسوية.. وافتكري إنك مش مضطرة خالص تفكريه بعمايله فيكي.. كل إللي عليكي إنك تحفظي كلمتين وكل ما يحاولوا يصلحوا بينكم تردديهم: "كارهة عيشتي معاه.. وأخشى ألا أقيم حدود الله".

الكلام ده يحصل لو انتي فعلا مش باقية عليه.. أما لو كنتي عايزة بس تقرصي ودنه وتربيه شوية فممكن تعلني عن أسبابك الحقيقية.. وفي الحالة دي ممكن يحصل صلح ما بينكم عن طريق مكتب التسوية.

4-  لو مكتب التسوية نجح في الصلح ما بينكم "يبقى خير وبركة وخلاص مفيش قضية".. ولو الزوج وافق ع الخلع "يبقى برضه خير وبركة".. إنما لو محصلش يبقى مكتب التسوية هيحيل الدعوى للمحكمة.

5-  لو معندكوش أولاد، المحكمة هتعرض عليكم الصلح قدامها مرة واحدة، أما لو عندكم فهتعرض الصلح مرتين بين المرة والتانية شهر أو شهرين بالكتير.

6-  لو مقبلتيش الصلح، المحكمة هتعين حكمين من أهلك أو أهله عشان يصلحوا بينكم، ولو مفيش هتعين حكمين من علماء الأزهر للصلح ما بينكم، في مدة لا تزيد على 3 أشهر.

7-  لو بعد كل دة محصلش صلح، حضرتك هتمضي على إقرار قدام المحكمة تعلني فيه عن رغبتك في عدم استمرار الحياة الزوجية.

8-  كده هتكون المحطة الأخيرة وتعرفي إن الفرج جالك، والمحكمة هتقرر حجز الدعوى للحكم.

9-   المحكمة لازم تصدر حكم لصالحك بالخلع.. وهنا لازم تدفعي التمن.

- أول حاجة هترديله المهر اللي مكتوب في عقد الجواز "عشان كدة خليكي ناصحة من بداية الجواز ومتكتبيش مبلغ كبير"

-  تاني حاجة هتتنازلي عن جميع حقوقك المالية اللي بتحصل عليها المطلقة من مؤخر ونفقة متعة ونفقة العدة

10 – إعرفي حقوقك "قائمة المنقولات من حقك ولو إنتي حاضنة فالشقة برضه من حقك.. وحقوق أولادك من تعليم وخلافه هو ملزم يدفعها وكله بالقانون"

معلومة تهمك

قضية الخلع بتستغرق من 6 شهور لغاية سنة، والحكم فيها نهائي لا يجوز الطعن عليه.. ولو عايزين ترجعوا لبعض بعد الخلع، لازم يكون بعقد ومهر جديد.

اقرأ أيضا