رمضان هو الشهر الوحيد في السنة اللي بطبُخ فيه كُل يوم... كل سنة في الوقت ده بشتري كتاب لوصفات طَبخ تكون سهلة وسريعة وبنت حلال... وكل سنة بتتجمَّع عندي خبرات طبيخية معينة... الخبرات دي هي اللي بتخليني أكمِّل باقي السنة مقاطعة المطبخ حِفاظا على جهازي العصبي وأرواح سُكان العمارة... السنة دي بقى قررت أنشُر يومياتي في مطبخ رمضان... لعل وعَسى يكون فشَل قوّم في الطبيخ عند قوّم فوائدُ.

يومياتي في مطبخ رمضان (9) اللازانيا

النهاردة طبخت لازانيا... عجينة جاهزة من السوبرماركت... وارمي فيها شوية لحمة مفرومة... وعليها شوية موتزاريلا... وحُطيها فى الفرن... طلَّعيها من الفُرن واغرِفيها فى طَبق التقديم... تلاقيها اتفرطت منك والعجينة وقعت في الطبق واللحمة المفرومة على الأرض... ولا تنرفز نفسك ولا أي حاجة... خد نفَس عميق... افتح التلاجة... طلّع خماشر بيضة + عدد 2 علبة تونة + سلطة خضرا... واقنِع اللي في البيت إن رمضان خِلِص والطباخة اللي بالكهربا باظِت!