بَحِب مظاهر الاحتفال بالمناسبات ورموز الأعياد.. وعشان كده كل سنة لازم أشتري شجرة الكريسماس، وفانوس رمضان، وعروسة المولد.. ودول على سبيل المثال وليس الحَصر.. وعشان كده من متابعتي في الكام سنة اللي فاتت شايفة تطور مذهل في صناعة تلك الرموز.. لدرجة إني بقيت أتوه في محاولاتي المتكررة لفَك طلاسِم ارتباط كل رَمز بمناسبتُه.

 عَندَك مثلاً شجرة الكريسماس الخضرا الجميلة  بقت عبارة عن كومِة شَعر أبيَض (وساعات أزرَق!) بأنوار فوسفورى منها فيها..  فانوس رمضان تحول بقدرة قادر لطيور ملوِّنة وشخصيات كارتون وأبطال مسلسلات.. أما عن عروسة المولد فحدِّث ولا حَرَج.

 صحيح أن العروسة السُكَّر التقليدية كانت بتلِّم علينا كل فصائل النَمل الموجودة على كوّكب الأرض.. لكن ده مش مُبرِّر لطَمس معالمها تماماً على مَر الزمن.. حيث إنها تحولت إلى عروسة بلاستيك تِقرَب للصين أكتر ما تِقرَب لمصر.. السنة دي زي عادتي كل سنة رُحت أدور على العروسة التقليدية.. وقُلت  للبيَّاع:

- عاوزة أقدَم عروسة مولد في الدنيا.

- موجود يا فندم.. دقيقة واحدة.. (اختفى 5 دقايق بدَل دقيقة).. اتفَضلي.

- مين دي؟.. ماري أنطوانيت؟!

- مش قُلتي عايزة أقدَم عروسة؟

- لأ أنا قصدي عروسة مولد النبي.

- آه فهمت.. دقيقة واحدة.. (اختفى 5 دقايق تانية).. اتفَضلي.

- بتهزَّر صَح؟ دي عروسة البحر أصلاً.

- بيعملوها في مولد النبي بردو يا فندم والله.

- يعملوها براحِتهُم أنا مش عايزة أشتريها.

- طب تحبي علاء الدين؟

- وده إيه علاقته بعروسة المولد مش فاهمة؟

- مش حضرِتِك عايزة حاجة عرَبي؟

- أيوة... أصل ماكُنتش اعرف إن عروسة المولد هولَندي يعني وكده.

- (بزهق)... إيه الشكل اللي عايزاه؟

- عايزة العروسة التقليدية جدًا بتاعة زمان.

- طب مش تقولي من الأول أنك عايزة "التكليدية"؟ استنيني خَمسَة بس

البياع اختفى عشر دقايق المرة دي ورِجِع بعلبة كبيرة... أفتح العلبة وأنظر إلى البياع في ذهول:

- رقَّاااااصَة!!!!

- أظن بأه مافيش "تكليدى" أكتر من كِدَّه.

- (لسة مذهولة).. مش شايف الفكرة غريبة شويتين تلاتة؟

- دي مكَسَّرة الدنيا.

- (لسة مذهولة)... لا يا راجل؟!!!

-  وربِّنا زي ما بقول لك كده.. إحنا تحت أمر الزبون.

- (لسة مذهولة طبعًا)... وبكام بأه اللي مكَسَّرة الدنيا دي؟

- 250 جنيه.

- لا والله؟!.. دي بلاستيك على فكرة.

- ما أنا عارف بس التمن مش في البلاستيك.

- وأكيد مش في الهدوم لأنها مش لابسَة حاجة تقريبًا.

- التمن فى الفكرة يا فندم.

- كمان التمن في الفِكرة؟!... طيب ممكن من فضلك ناخُد فِكرة عن الفكرة؟

- مش فاهم قصد حضرتك إيه؟

- يعني إيه الفكرة اللي بـ 250 جنيه دي؟

- اممممم.. اممممم.. مادام عروسة لازم ترقص.. حَد عنده اعتراض؟!

- لأ طبعًا العروسة حُرة تِعمِل اللي هي عايزاه.. أنا أصلاً كُنت جاية أشتري علبة مَلبَن وماشية على طول!!

 رغم إنى مش معترضة خالص على تطوير رموز الاحتفال بالمناسبات وبُعدها عن التراث التقليدي.. من باب إن سُنِّة الحياة في التغيير وكده يعني.. إلا إني لسة مش فاهمة ارتباط الرموز الجديدة بمناسباتها.. ولسة مذهولة من فكرة عروسة المولد لابسَة بَدلِة رَقص.. ومتوَقِّعة في شَم النسيم الجاي أشوف فسيخ بلاستيك لابِس بَدلِة باتمان!!