محبي السفر مشكلتها الكبرى دائماً هي المال فلا يوجد  سفر بدون نفقات ولكن هناك طرق تجعل نفقة السفر أقل، وهذا ما يحاول الرحاله حسام مختار دائماً ان يقوله في منشوراته على الفيس بوك من خلال هاشتاج #السفر_رخيص، ويقدم دائماً نصائح ومعلومات وأرخص تذاكر لتسافر حول العالم، ولأن السفر لدول كثيرة يتطلب الحصول على فيزا، قدم مختار نصائح لتحصل على أي فيزا حول العالم.

1. إنك تغير فكرتك إن الفيزا دى حاجه مستحيلة.
2.إنك تفهم إن الفيزا دي عبارة عن طلبات وورق لو كملته بطريقة صحيحة هاتتقبل. 
3. انك عمرك ما هاتسافر لو مكسل تدخل على موقع السفارة أو تتواصل معاهم أو تزور السفارة عشان تتعرف على الورق المطلوب. 
4. انك تقتنع إن العالم كله مش أوروبا وأمريكا الشمالية بس.

ندخل بقى فى المهم ونفهم ليه ناس كتير بتترفض فى الفيزا:
5. اوعى تقدم حجز فندق وهمى.
6. اوعى تقدم حجز طيران وهمى.
7. حسابك البنكي يكون فيه سحب وايداع بمبالغ مختلفة فى أخر 6 شهور قبل استخراج الكشف.
8. كل سفارة فى طلباتها شوف فى بند كشف الحساب البنكى هل طالبين مبلغ معين ولا مش محددين.
9. في حالة تقدمك للسفر إلى أوروبا أو أمريكا (يفضل) يكون في حسابك أكتر من 30 ألف جنيه ويكون السحب والايداع فى أخر 6 شهور فوق المبلغ ده، يعني متخليش حسابك يقل عن المبلغ ده طوال الفتره.
10. فى حاله تقدمك للسفر إلى أوروبا و امريكا (بالذات امريكا) يفضل تكون سافرت قبل كده بلاد تانيه قبلها، لأن ببساطه حيقولولك مش يوم ما تشطه تنطح.
11. خلى بالك وانت بتسافر حول العالم متقربش من دول اللى تخليك black listed فى سفارات اوروبا. ابحث عن الدول دى واعرفها كويس.
12. فى حاجه اسمها (شهاده تحركات) انت سافرت فين بالظبط من ساعة ما اتولدت لحد دلوقتى، مهما غيرت الباسبور. بتتجاب من الدول الارضى من مجمع التحرير.
13. لو دخلت أى مقابله عشان الفيزا، أبوس ايديك اوعى تحفظ كلمتين، عايزك تجاوب من قلبك و تقول الحقيقه. (ده من اهم اسباب رفض الفيزا عند ناس كتير)
14. اوعى تتاخر عن ميعاد أى مقابلة والتزم بكل كلمه حتطلبك منك، بلاش فهلوة المصريين ماتنفعش معاهم.
15. فى دول كتير ملهاش فيزا وفى دول كانت بتتحايل عليا تدينى الفيزا انا وكل اصحابى مجرد بزيارة السفارة.
16. طول ما انت مقتنع إن الموضوع صعب وعمره ما حيحصل ريح نفسك يا معلم عمرها ما حطلعلك، أصل اللى بيخاف من العفريت بيطلعله.Law of Attraction