التوقيت الجمعة، 29 مارس 2024
التوقيت 02:50 م , بتوقيت القاهرة

حظك اليوم مع عبدالله أحمد الأحد 11/3/2018 الحوت هيغني النهاردة ياجماعة

حظك اليوم وتوقعات الأبراج مع عبدالله أحمد الأحد 11/3/2018
حظك اليوم وتوقعات الأبراج مع عبدالله أحمد الأحد 11/3/2018

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


بعد الجواز هتصحي كل يوم تفطري العيال وتقعدي تتفرجي معاهم على الكارتون بالعافية لحد مايجيلك تخلف.


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الأحد 11/3/2018 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


إحترس من غول الانانية الفظيع وحاول تهتم بالناس اللي بتحبك حبة.. مش كل يوم هنقول الكلام دة انا زهقت بصراحة.. مش كدة يا اخي انتا دماغك ناشفة كدة ليه وبتعاند ف مين غير نفسك


برج الحمل عملياً


( الشغل والمذاكرة والتخطيط لبكرة ):


عرفنا ان شخصيتك قوية وان محدش يقدر يذلك ولا حد يقدر يلغي شخصيتك القوية.. قشطة وبعدين يعني؟.. مش في مليون حاجة تتعمل ف الحياة بعد الموضوع دة ولا انتا شايف ايه بالظبط؟.. هتعيش حياتك كلها بتعمل اعلانات لشخصيتك القوية مثلا ولا ايه


برج الحمل صحياً


( نفسيا وجسمانيا وكل مايخص طاسة المزاج ):


صحيا النهاردة انتا محتاج تبطل عند وتقول حاضر ولو تمثيل يا أخي من باب التغيير وقلة الفرهدة مش اكتر.. مش اكتر والله


إعرف توافق برج الحمل مع باقي الأبراج النهاردة:


متوافق مع الابراج الحسواكية والفرفورية والحنتوسية والنارية والترابية


حظك اليوم برج الثور دوت مصر


إعرف حظك اليوم برج الثور بالتفصيل الأحد 11/3/2018 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


فش غلك ف المشي أحسن من أي حاجة.. ولا تتكلم ولا تناقش ولا تحكي.. انتا عارف كويس ان الحل ف دماغك انتا وبس.. مش مع حد تاني ابدا


برج الثور عملياً


( الشغل والمذاكرة والتخطيط لبكرة ): 


حبة التمشية ف الشمس النهاردة وقت الغروب هتظبط مزاجك وهتخليك تعرف تاخد القرار اللي محيرك وواكل دماغك بقاله كام يوم


برج الثور صحياً 


( نفسيا وجسمانيا وكل مايخص طاسة المزاج ):


صحيا النهاردة انتا محتاج تدرك ان حالة الصراع اللي انتا عايش فيها طول الوقت دة اكبر خطر على صحتك وعلى اعصابك.. واضح انك محدش بيقولك الكلام دة عشان بيخافوا منك بس صدقني.. انا مبخافش منك ولا هاخاف.. إهدى على روحك حبة.. إهدى لمصلحتك والله مش لمصلحة حد تاني


إعرف توافق برج الثور مع باقي الأبراج النهاردة:


متوافق مع الابراج البسكوتية والبربوشية والكتكوتية والبرمائية والهوائية والترابية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الأحد 11/3/2018 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ف حالة حدوث اي قلق نفسي النهاردة شغل اغاني عدوية فورا وبس


برج الجوزاء عملياً 


( الشغل والمذاكرة والتخطيط لبكرة ):


متركزش مع اللي مركز معاك ببساطة ووفر طاقتك لإنك تخلص الشغل اللي وراك وبس.. النهاردة انتا لازم تنجح وتبان وتروح حاسس انك برنس ف نفسك لحد ماتنام مبسوط بإذن الله


برج الجوزاء صحياً 


( نفسيا وجسمانيا وكل مايخص طاسة المزاج ):


صحيا النهاردة محتاجة شوية مساج او تدليك خصوصا لرقبتك ولودانك ولمناخيرك


تعرف على توافق برج الجوزاء مع باقي الأبراج النهاردة:


متوافق مع الابراج البرجماتية والحنكوشية والنباتية والسمكمكية والبرمائية والترابية والنارية والهوائية..


حظك اليوم برج السرطان دوت مصر


إعرف حظك اليوم برج السرطان بالتفصيل الأحد 11/3/2018 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


غالبا مشاعرك النهاردة محتاجة طرمخة كتير جدا النهاردة.. ف شوف خروجة حلوة وحد عارفك كويس بس بيحب يجاملك ويقولك كلام كويس عن نفسك.. إسمعه النهاردة حبة.. او فكك من كل الكلام دة وخش سينما وأهي تبقى برضة فرصة مناسبة تنقي فيلم مخالف لكل الاذواق او متخصص ومتميز وبيحسسك انك احسن من اللي حواليك او اذكى


برج السرطان عملياً 


( الشغل والمذاكرة والتخطيط لبكرة ):


فلوس جايالك ف الاغلب النهاردة او هدية او حاجة قيمة.. ماشية معاك حلاوة ماشاء الله.. ع الله متطلعش باكو شيكولاتة ف الاخر ويطلع نئبك على شونة ياصغنونة


برج السرطان صحياً 


(نفسيا وجسمانيا وكل مايخص طاسة المزاج ):


صحتك النهاردة محتاجة شوية اهتمام خصوصا ببشرتك وبنفسيتك بشكل عام وبودانك


تعرف على توافق برج السرطان مع باقي الأبراج النهاردة:


متوافق مع الابراج الحلبسية والكهربائية والبرمائية والكتكوتية والمائية والنارية والبهوائية ( اخت الهوائية بس مبهوئة حبة).


حظك اليوم برج الا?سد دوت مصر


إعرف حظك اليوم برج الأسد بالتفصيل الأحد 11/3/2018 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


مش كل حاجة تشوفها وتعجبك تسعى لامتلاكها او السيطرة عليها.. كدة هتتعب ياحبيبي جدا ف الحياة وهتفضل تجري وتجري وبس ورا حاجة بتلمع ف الافق وخلاص


برج الأسد عملياً 


( الشغل والمذاكرة والتخطيط لبكرة ):


ليه حاسس انك من حقك تتنك علي الناس.. مغرور على ايه بالظبط؟..عندك حاجة زيادة مش عندنا مثلا ولا ايه سيادتك.. ولا جايب نتيجة الحياة من الكنترول واحنا منعرفش مثلا ولا ايه حكايتك بالظبط فهمنا؟


برج الأسد صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة حبة الوان وحيطة فاضية تلحوسها براحتك ف خيالك او ف الحقيقة.. الاتنين واحد بالنسبالك اساسا اليومين دول ف مش هتفرق


تعرف على توافق برج الأسد مع باقي الأبراج النهاردة:


متوافق مع الابراج الفشكولية والباراكودية والسمكمكية والكرِيبّية والإستحواذية..


حظك اليوم برج العذراء دوت مصر


إعرف حظك اليوم برج العذراء بالتفصيل الأحد 11/3/2018 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حاول تخفي امتعاضك من كل حاجة على الاقل ف وش اللي بتحبه لأنه مالوش ذنب.. إلا طبعا لو هو اساسا اساسا سبب إمتعاضك الأساسي.. ساعتها إمتعض وإشمئنط كمان براحتك ولا يهمك منه


برج العذراء عملياً 


( الشغل والمذاكرة والتخطيط لبكرة ):


آجل الشر لوقت الشر ياكابتن.. ميبقاش كدة عمال على بطال عيب كدة مش حلو


برج العذراء صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة بجيوبك الانفية والمادية زي إمبارح بالظبط


تعرف على توافق برج العذراء مع باقي الأبراج النهاردة:


متوافق مع الابراج البرطمانية والكستبانية والبرمائية والكتكوتية والكهربائية والهوائية والبرمائية..


حظك اليوم برج الميزان دوت مصر


إعرف حظك اليوم برج الميزان بالتفصيل الأحد 11/3/2018 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


محتاج تسمع الليلة اغنية شريفة فاضل " لما راح الصبر منه" وهتفهم كل حاجة انتا محتاج تفهمها بالنسبة لطريقتك ف إدارة مشاعرك وهتعرف منها برضة قد ايه انتا فكرتك عن نفسك دايما مختلفة عن الحقيقة وكله بإختيارك للأسف بس انتا إتعودت تضحك على نفسك وبس


برج الميزان عملياً 


( الشغل والمذاكرة والتخطيط لبكرة ):


قدامك فرصة النهاردة تتغير للأحسن ودة صعب بس دايما الصح صعب.. او ببساطة تستسلم لأفكارك السيئة وتتضايق ودة هيبقى إستسهال خلي بالك


برج الميزان صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة منك تنقع رجليك ف طبق بلاستك مليان مية سخنة وشاور چيل ريحته حلوة ومنعشة.. متستغربش ياخويا.. معروف علميا بالنسبة للعلم الحديث ان صحة الانسان تبدأ من صوابع رجليه والحتت اللي مابينهم اللي لما بتفعض بيها ف المية السخنة ام شاور چيل أكيد بتعمل فقاقيع.. دي حاجة معروفة انتا ازاي مش عارفها


تعرف على توافق برج الميزان مع باقي الأبراج النهاردة:


متوافق مع الابراج الدرامية والبحرية والبرميلية والسمكمكية والنيلية والفضية والبربئية والفرفورية والمائية والنارية والهوائية..


حظك اليوم برج العقرب دوت مصر


إعرف حظك اليوم برج العقرب بالتفصيل الأحد 11/3/2018 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


قلل عدوانيتك حبة ورغبتك طول الوقت ف إظهار قوتك وتهديد النهاس وانتا اساسا بق على الفاضي النهاردة عشان مصلحتك.. كمان مهما كان الموضوع مغري او نايس.. متركنش افكارك ف جراچ خيال حد النهاردة.. بلاش


برج العقرب عملياً 


( الشغل والمذاكرة والتخطيط لبكرة ):


مهم تنزل تتمشى النهاردة بالليل نص ساعة او ساعة كاملة لوحدك تاخد فيها قرار صح ف الحاجة اللي محيراك


برج العقرب صحياً 


( نفسيا وجسمانيا وكل مايخص طاسة المزاج ):


صحتك بالدنيا ياقمر.. مالك بس؟.. رازيت نفسك بنفسك ولا ايه ياكتكتوت.. معلش


تعرف على توافق برج العقرب مع باقي الأبراج النهاردة:


متوافق مع الابراج الحنكوشية والكهربائية والبرطمانية والكهرمانية والترابية والنارية والهوائية..


حظك اليوم برج القوس دوت مصر


إعرف حظك اليوم برج القوس بالتفصيل الأحد 11/3/2018 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


ركز ف حالك النهاردة ومتخشش ف اي معارك او جدال تافه مع اي حد.. انتا محتاج كل تركيزك وكل طاقتك عشان تعرف تشوف اللي وراك اليومين دول.. ركز.. ركز وجدا


برج القوس عملياً 


( الشغل والمذاكرة والتخطيط لبكرة ):


عمليا انتا ماشي ف تراك ناجح جدا وواثق من نفسك وكل حاجة ماشية زي الفل ماشاء الله.. ناقصك بس تاخد بريك تريح فيها دماغك حبة.. مش اكتر.. مجرد يوم تفضاه بس وتسافر تتفرج على بحر او صحرا ومتشوفش ناس خالص فيه.. حط الموضوع ف دماغك وخططله.. دة ف حد ذاته حافز حلو جديد ليك.. إنطلق وخليك زي القطر متقفش لحد الا ف محطة من قيمتك وبس


برج القوس صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة فاكهة وتقلل حبة من التدخين سواء السري او العلني وانتا فاهم وانا فاهم أقصد ايه كويس


تعرف على توافق برج القوس مع باقي الأبراج النهاردة:


متوافق مع الابراج الفركتوزية والحبشتكانية والحنجورية والبرمائية والنارية والترابية


حظك اليوم برج الجدي دوت مصر


إعرف حظك اليوم برج الجدي بالتفصيل الأحد 11/3/2018 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


اللي ميحبكش يشرب من البحر النهاردة.. عموما كبر دماغك انتا بس ومتزعلش.. مسير الايام تجيبلك حقك لو ليك حق.. دلع انتا بس حبايبك وناسك وراعي إحساسك وملكش دعوة بأي حاجة تانية الليلة


برج الجدي عملياً 


( الشغل والمذاكرة والتخطيط لبكرة ):


خلصنا لعب ولهو وتفخيد.. نشوف اللي ورانا بقى ولا ايه الكلام حضرتك


برج الجدي صحياً 


( نفسيا وجسمانيا وكل مايخص طاسة المزاج ):


الصحة فل وجاهز للإنطلاق وكيرف الطاقة بيدعم الموضوع لأنه الليلة ف العلالي ان شاء الله.. انبسط


تعرف على توافق برج الجدي مع باقي الأبراج النهاردة:


متوافق مع الابراج البربئية والمونوكرومية والحنتوسية والحلبسية والكشرية والمائية والهوائية والنارية..


حظك اليوم برج الدلو دوت مصر


إعرف حظك اليوم برج الدلو بالتفصيل الأحد 11/3/2018 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


اختار كويس النهاردة مين يستاهل وقتك ومين يستاهل اهتمامك ومين يستاهل فعلا تقعد معاه


برج الدلو عملياً 


( الشغل والمذاكرة والتخطيط لبكرة ):


متستسهلش.. قدامك فرصة.. متضيعهاش وتنام وتحلم بقرد بيسقف ودمتم.. من فضلك بليز لو سمحت متعملش كدة..


برج الدلو صحياً 


( نفسيا وجسمانيا وكل مايخص طاسة المزاج ):


صحتك اليوم تمام وبتتحسن.. ابعد بس عن قلة الشغل اليومين دول.. ولو فاضي او اجازة برضة اشغل وقتك بأي حاجة.. متقعدش كدة.. خيالك هيبهدلك


تعرف على توافق برج الدلو مع باقي الأبراج النهاردة:


متوافق مع الابراج الكستبانية والدخانية والمونوكرومية والكتكوتية والبرمائية والكبريتية والجنية والخيالية والتركوازية..


حظك اليوم برج الحوت دوت مصر


إعرف حظك اليوم برج الحوت بالتفصيل الأحد 11/3/2018 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


فكك من العواطف والمشاعر والشغل اللي ممنوش اكل عيش وبتدور عليه بس عشان تحسس نفسك انك مهم ف الكوكب زيك زي اي حد وركز ف انك تغني النهاردة وبس.. صوتك لازم يطلع النهاردة ومش بالزعيق ولا الأوامر ولا الشكل والخناق.. صوتك لازم يطلع الليلة بالغنا.. بالغنا وبس


برج الحوت عملياً 


( الشغل والمذاكرة والتخطيط لبكرة ):


شغل كاسيت عربيتك وغني معاه ولو معندكش عربية غني ف اوضتك او ف الهوا او ف اي مكان يعجبك.. المهم صوتك يتسمع بقول حاجة حلوة ومهمة وجميلة ف المطلق.. ومتنساش ان صوتك ممكن ترازي بيه العصافير اللكل كلنا عارفين انها طول الوقت بترغي بس هنموت كلنا ونعرف.. ثم اشمعنا هي اللي بتغني طول الوقت.. العصافير مش احسن منك


برج الحوت صحياً 


( نفسيا وجسمانيا وكل مايخص طاسة المزاج ):


صحيا انتا محتاج تبطل تحضن ف المخدة بالليل ف الضلمة قبل ماتنام وتحلم بحد يفهمك.. فكك.. كفاية انتا تبقى فاهم نفسك وبس


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والفهلوية والكتكوتية والمستحية والمائية والهوائية



اعلان حظك اليوم دوت مصر