التوقيت الجمعة، 29 مارس 2024
التوقيت 12:37 ص , بتوقيت القاهرة

حظك اليوم مع عبدالله أحمد الأربعاء 21/2/2018 قمر للميزان وموتسارت للجوزاء

حظك اليوم وتوقعات الأبراج مع عبدالله أحمد الأربعاء 21/2/2018
حظك اليوم وتوقعات الأبراج مع عبدالله أحمد الأربعاء 21/2/2018

إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..


 


  : كلام جد


من كتر جمالها كانت الحيطان اللي حواليها نفسها طول الوقت تاخدها بالحضن.   


عشان تعرف حظك بشكل كامل .. صفي نيتك ودوس على اسم برجك بإيدك اليمين.


حظك اليوم برج الحمل دوت مصر


إعرف حظك اليوم برج الحمل بالتفصيل الثلاثاء 20/2/2018 مع عبدالله أحمد..


الحمل: من 21 مارس إلى 19 ابريل


برج الحمل عاطفياً


( الكراش والإكس والبوي فريند والجيرل فريند والجوز والزوجة والقرايب ):


خد بالك النهاردة حبة من معدتك ومن نوعية أكلك عشان متعانيش من حموضة سخيفة ملهاش لازمة.. بلاش عك كدة وإهدى ونام كويس.


برج الحمل عملياً


( الشغل والمذاكرة والتخطيط لبكرة ):


زين وشك بضحكتك الحلوة ف وش اي مصايب هتشوفها النهاردة او هتشارك فيها او هتعملها لوحدك اساسا من تحت لتحت..


برج الحمل صحياً


( نفسيا وجسمانيا وكل مايخص طاسة المزاج ):


صحيا النهاردة انتا زي الفل بس الصداع مضايقك عشان مبتاكلش كويس وبتنام دايما ف وسط وش ودوشة..


إعرف توافق برج الحمل مع باقي الأبراج النهاردة:


متوافق مع الابراج الحسواكية والفرفورية والحنتوسية والبرمائية والترابية والهوائية..


حظك اليوم برج الثور دوت مصر


إعرف حظك اليوم برج الثور بالتفصيل الثلاثاء 20/2/2018 مع عبدالله أحمد..


الثور : من 20 ابريل إلى 20 مايو


برج الثور عاطفياً


( الكراش والإكس والبوي فريند والجيرل فريند والجوز والزوجة والقرايب ):


هدوء علي مستويات كتير النهاردة بيحيط بيك وبيغلف مشاعرك بغلاف من الملل والزهق وإنعدام الرغبة ف أي حاجة..


برج الثور عملياً


( الشغل والمذاكرة والتخطيط لبكرة ): 


عادي يابرنس.. فترة وتعدي وترجع ترازي ف العالم بقلب جامد من تاني.. إجمد ياوحش وفرفش حبة.. مفيش حاجة مستاهلة الزعل اصلا..


برج الثور صحياً 


( نفسيا وجسمانيا وكل مايخص طاسة المزاج ):


صحيا النهاردة انتا محتاج تتفرج على فيلم كارتون ف الشغل من تحت لتحت..


إعرف توافق برج الثور مع باقي الأبراج النهاردة:


متوافق مع الابراج البسكوتية والبربوشية والكتكوتية والمائية والنارية والبرمائية..


حظك اليوم برج الجوزاء دوت مصر


إعرف حظك اليوم برج الجوزاء بالتفصيل الثلاثاء 20/2/2018 مع عبدالله أحمد..


الجوزاء: من 21 مايو إلى 20 يونيو


برج الجوزاء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتتباس ف احلامك النهاردة لو بقيت كويس ومعملتش شقاوة طول اليوم..


برج الجوزاء عملياً 


( الشغل والمذاكرة والتخطيط لبكرة ):


جواك اتنين طول الوقت بيتخانقوا.. واحد فيهم شبه موتسارت كدة ف إبداعه وتألقه وطفوليته الفنية الجميلة وحبة المفرط للحياة.. والتاني شبه ساليريي.. اللي كان بيحقد على موتسارت وبيغير منه ومن نجاحه طول الوقت وبيحاول يدمره.. حاول تاخد صف موتسارت اللي جواك وإنبسط بالحياة احسن.


برج الجوزاء صحياً 


( نفسيا وجسمانيا وكل مايخص طاسة المزاج ):


صحيا النهاردة كل شيئ تمام واجهزتك شغالة وتمام بس للإطمئنان بس اعمل تمارين ف نص اليوم وتدريبات ع الرقص..


تعرف على توافق برج الجوزاء مع باقي الأبراج النهاردة:


متوافق مع الابراج البرجماتية والحنكوشية والنباتية والنارية والهوائية والترابية والمائية ..


حظك اليوم برج السرطان دوت مصر


إعرف حظك اليوم برج السرطان بالتفصيل الثلاثاء 20/2/2018 مع عبدالله أحمد..


السرطان: من 21 يونيو إلى 22 يوليو


برج السرطان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


إسمع للناس اكتر ماتتكلم النهاردة وخليك مشغول بالبحث عن الحاجات اللي تبسطك مش الحاجات اللي بتضايقك وتنكد عليك..


برج السرطان عملياً 


( الشغل والمذاكرة والتخطيط لبكرة ):


التفاؤل اوقات تصرف ساذج مفيش كلام.. بس اوقات بيبقى هو الحاجة الوحيدة اللي ممكن تعدي بيها ايامك وعقلك سليم ونفسيتك سليمة وروحك نقية.. بعكس بقع التشاؤم اللي مبتطلعش ف الغسيل مهما كان المسحوق قوي وفعال.


برج السرطان صحياً 


(نفسيا وجسمانيا وكل مايخص طاسة المزاج ):


صحتك النهاردة كويسة وزي الفل.. قوم بس اخرج وخش سينما ولا اقعد ف اي جنينة بدل مانتا قاعد حاطط ايدك على خدك كدة..


تعرف على توافق برج السرطان مع باقي الأبراج النهاردة:


متوافق مع الابراج الحلبسية والكهربائية والبرمائية والكتكوتية والنارية والهوائية والمائية..


حظك اليوم برج الا?سد دوت مصر


إعرف حظك اليوم برج الأسد بالتفصيل الثلاثاء 20/2/2018 مع عبدالله أحمد..


الأسد: من 23 يوليو إلى 22 اغسطس


برج الأسد عاطفياً 


( الكراش والإكس والبوي فريند والجيرل فريند والجوز والزوجة والقرايب ):


رايق وعايق ف نفسك اليومين دول ماشاء الله ومكبر دماغك تماما.. اتمنى دة يكون استقرار وهدوء فعلي مش مجرد تمثيل عشان متخسرش كتير


برج الأسد عملياً 


( الشغل والمذاكرة والتخطيط لبكرة ):


المجال بيتفتحلك أكتر وأكتر ومفيش باقي أي حجة أو عذر عشان تاخد وضعك وتتحقق وتنفذ احلامك.. اما نشوف هتتصرف ازاي وهتعمل ايه.. اتمنى تتصرف صح


برج الأسد صحياً 


( نفسيا وجسمانيا وكل مايخص طاسة المزاج ):


صحتك النهاردة تمام بس خد بالك بس من جيوبك الانفية عشان في تراب بسيط ف الجو زي إمبارح بالظبط..


تعرف على توافق برج الأسد مع باقي الأبراج النهاردة:


متوافق مع الابراج الفشكولية والباراكودية والسمكمكية والهوائية والنارية والترابية والهوائية والمائية..


حظك اليوم برج العذراء دوت مصر


إعرف حظك اليوم برج العذراء بالتفصيل الثلاثاء 20/2/2018 مع عبدالله أحمد..


العذراء: من 23 اغسطس إلى 22 سبتمبر


برج العذراء عاطفياً 


( الكراش والإكس والبوي فريند والجيرل فريند والجوز والزوجة والقرايب ):


هتحتاج ساعة تأمل النهاردة ف نص اليوم تقعد فيها تحدق ف الفراغ او عناكب السقف وبس..


برج العذراء عملياً 


( الشغل والمذاكرة والتخطيط لبكرة ):


المزيكا الكلاسيك النهاردة ممكن تبقى صاحبتك سواء وانتا بتشتغل او وانتا بتذاكر او وانتا بتلعب او وانتا بتهز راسك وانتا بتمثل انك بتسمع كلام الناس اللي فاكرة انها بتقولك حاجة ممكن تكون مهمة بالنسبالك..


برج العذراء صحياً 


( نفسيا وجسمانيا وكل مايخص طاسة المزاج ):


صحتك النهاردة منك تجيب كتاب تلوين للكبار وطقم الوان خشب ولا شمع وتلون حبة براحتك ولمزاجك


تعرف على توافق برج العذراء مع باقي الأبراج النهاردة:


متوافق مع الابراج البرطمانية والكستبانية والبرمائية والنارية والهوائية والمائية..


حظك اليوم برج الميزان دوت مصر


إعرف حظك اليوم برج الميزان بالتفصيل الثلاثاء 20/2/2018 مع عبدالله أحمد..


الميزان : من 23 سبتمبر إلى 22 اكتوبر


برج الميزان عاطفياً 


( الكراش والإكس والبوي فريند والجيرل فريند والجوز والزوجة والقرايب ):


جميل النهاردة من جوة ومن برة وزي القمر ماشاء الله.. بس علي نفسك ياخويا.. على نفسك ياحبيبي..


برج الميزان عملياً 


( الشغل والمذاكرة والتخطيط لبكرة ):


واضح انك محتاج شوية تشجيع وإطراء مش أكتر عشان تعرف تنبسط..


برج الميزان صحياً 


( نفسيا وجسمانيا وكل مايخص طاسة المزاج ):


صحتك النهاردة تمام بس انتا محتاج حفلة او مزيكا كتير او عزومة اكل معتبرة متدفعش فيها حق تمن ازازة المية حتي


تعرف على توافق برج الميزان مع باقي الأبراج النهاردة:


متوافق مع الابراج الدرامية والبحرية والبرميلية والسمكمكية والنيلية والفضية والنارية والبرمائية..


حظك اليوم برج العقرب دوت مصر


إعرف حظك اليوم برج العقرب بالتفصيل الثلاثاء 20/2/2018 مع عبدالله أحمد..


العقرب: من 23اكتوبر إلى 21 نوفمبر


برج العقرب عاطفياً 


( الكراش والإكس والبوي فريند والجيرل فريند والجوز والزوجة والقرايب ):


محادثة مهمة مع حد مهم ف حياتك هتقولوا فيها ف الاغلب كلام مهم هتعمل عكسه بمجرد ماتقوم تروح..


برج العقرب عملياً 


( الشغل والمذاكرة والتخطيط لبكرة ):


مبتحبش حد يقولك تعمل ايه او يمشي كلمته او افكاره عليك يا برج العقرب.. مش أكتر.. قشطة عليك.. إنبسط يابرنس..


برج العقرب صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة حب بشكل عاجل..


تعرف على توافق برج العقرب مع باقي الأبراج النهاردة:


متوافق مع الابراج الحنكوشية والكهربائية والبرطمانية والكهرمانية والبرمائية والترابية والنارية..


حظك اليوم برج القوس دوت مصر


إعرف حظك اليوم برج القوس بالتفصيل الثلاثاء 20/2/2018 مع عبدالله أحمد..


القوس: من 22 نوفمبر إلى 21 ديسمبر


برج القوس عاطفياً 


( الكراش والإكس والبوي فريند والجيرل فريند والجوز والزوجة والقرايب ):


متضايقش نفسك.. اوقات لازم تصبر حبة عشان تنول كل اللي ف بالك.. اتقل وهتنبسط ان شاء الله..


برج القوس عملياً 


( الشغل والمذاكرة والتخطيط لبكرة ):


اوقات الحاجات مبتجيش ف التوقيتات اللي احنا عاوزينها بالظبط.. بس ممكن يكون ف التأخير دة كل الخير.. محدش يعرف.. تفاءل خير يامعلم تفاءل خير..


برج القوس صحياً 


( نفسيا وجسمانيا وكل مايخص طاسة المزاج ):


صحتك النهاردة محتاجة شوية استرخاء مابين اي مجهود بتعمله والتاني.. بلاش يبقى كله بيورر كدة ورا بعضه انتا مش روبوت يابيه.. كدة هتتعب بجد


تعرف على توافق برج القوس مع باقي الأبراج النهاردة:


متوافق مع الابراج الفركتوزية والحبشتكانية والحنجورية والهوائية والمائية والنارية..


حظك اليوم برج الجدي دوت مصر


إعرف حظك اليوم برج الجدي بالتفصيل الثلاثاء 20/2/2018 مع عبدالله أحمد..


الجدى: من 22 ديسمبر إلى 19 يناير


برج الجدي عاطفياً 


( الكراش والإكس والبوي فريند والجيرل فريند والجوز والزوجة والقرايب ):


حد هيلفت نظرك لحاجة انتا كنت ناسيها وراكنها ف حياتك وممكن تكون سبب لسعادة طويلة جدا..


برج الجدي عملياً 


( الشغل والمذاكرة والتخطيط لبكرة ):


ركز النهاردة جدا وخليك منتبه كدة ومصحصح وإكتشف الحاجات الحلوة ف حياتك بدل مانتا قاعد كدة ياجدع..


برج الجدي صحياً 


( نفسيا وجسمانيا وكل مايخص طاسة المزاج ):


صحتك النهاردة ماشي حالها بس ياريت تاخد بالك ان كتر التمقيق ف شاشة الموبايل هيتعب رقبتك وفقرات ضهرك بجد.. اهتم حبة..


تعرف على توافق برج الجدي مع باقي الأبراج النهاردة:


متوافق مع الابراج البربئية والمونوكرومية والحنتوسية والحلبسية والكشرية والبرمائية والترابية والنارية..


حظك اليوم برج الدلو دوت مصر


إعرف حظك اليوم برج الدلو بالتفصيل الثلاثاء 20/2/2018 مع عبدالله أحمد..


الدلو: من 20 يناير إلى 18 فبراير


برج الدلو عاطفياً 


( الكراش والإكس والبوي فريند والجيرل فريند والجوز والزوجة والقرايب ):


كلام كتير ووش كتير برضة بيدور جوة دماغك النهاردة مع تداخلات منطقية وغير منطقية مع عكوسات كهربائية مستحية ومستخبية ف الاغلب..


برج الدلو عملياً 


( الشغل والمذاكرة والتخطيط لبكرة ):


إعمل أكتر حاجة انتا شاطر فيها النهاردة وطنش وكبر دماغك ودع العالم والواقع للإخوة اللي مهتمين بالعيشة ف الواقع وحب العمق والقواقع..


برج الدلو صحياً 


( نفسيا وجسمانيا وكل مايخص طاسة المزاج ):


صحتك اليوم بتتحسن عشان انتا مهتم وف مود كويس وعشان بتفكر تعمل ابداعات فنية حلوة على مزاجك وبايديك.. قشطة عليك وعلى اللي حواليك يامعلم..


تعرف على توافق برج الدلو مع باقي الأبراج النهاردة:


متوافق مع الابراج الكستبانية والدخانية والمونوكرومية والكتكوتية والبرمائية والنارية والمائية والترابية والهوائية..


حظك اليوم برج الحوت دوت مصر


إعرف حظك اليوم برج الحوت بالتفصيل الثلاثاء 20/2/2018 مع عبدالله أحمد..


الحوت: من 19 فبراير إلى 20 مارس


برج الحوت عاطفياً 


( الكراش والإكس والبوي فريند والجيرل فريند والجوز والزوجة والقرايب ):


مود مبهج النهاردة مع حظ لطيف هيخليك تدرك ان في ناس كتير بتحبك وبتحب تبقى موجودة حواليك وانتا مش واخد بالك


برج الحوت عملياً 


( الشغل والمذاكرة والتخطيط لبكرة ):


مشغول بالنكد وبالتآمر على العالم ف حين انك ف الاخر هتكتشف انك كنت بتضيع وقتك ف التآمر على نفسك وبس..


برج الحوت صحياً 


( نفسيا وجسمانيا وكل مايخص طاسة المزاج ):


صحيا كل حاجة ماشية كويسة وف حالها وتمام التمام بس ياريت تزقطط حبة ف نص النهار وتدي نفسك بريك من التفكير الكتير ف مخاوفك ومشاكلك..


تعرف على توافق برج الحوت مع باقي الأبراج النهاردة:


متوافق مع الابراج البسبوسية واللولبية والفهلوية والكتكوتية والمستحية والنارية والترابية والمائية والهوائية.



اعلان حظك اليوم دوت مصر