إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

يعني آدم اللي ساب الجنة ومشي.. فاكراه مش هيسيبك إنتي؟.. ياضنايا.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الجمعة 19/1/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

الهروب مينفعش رياضة بس اوقات بيبقى مسلي جدا بالنسبة للإنسان انه يوهم نفسه انه يقدر يهرب من كل حاجة ومن كل حد

برج الحمل عملياً

( الشغل والمذاكرة والتخطيط لبكرة ):

قشطة.. طالما دة هيخليك مبسوط يبقى تهرب براحتك النهاردة.. المهم تبقى كويس.. بس خليك عارف انك خايف تواجه نفسك لتطلع غلط.. مش اكتر

برج الحمل صحياً

( نفسيا وجسمانيا وكل مايخص طاسة المزاج ):

الهروب مينفعش رياضة خلي بالك.. عند وقت ما الحياة هتجبرك تواجه.. الافضل تختار انتا توقيت ومكان المعركة دي ومتتفاجئش بيها بعدين وانتا مش مستعد..

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والبلاستيكية والترابية والهوائية والنارية..

إعرف حظك اليوم برج الثور بالتفصيل الجمعة 19/1/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

النهاردة هتحط ف اختيار صعب مابين حاجتين اتنين وهتتحير جدا تختار انهي فيهم خصوصا وان كل اختيار ليه مميزات انتا عاوزها وعيوب انتا مش عاوزها.. الحل بسيط.. خد اجازة وفكر براحتك.. او متفكرش.. براحتك برضة..

برج الثور عملياً

( الشغل والمذاكرة والتخطيط لبكرة ): 

مينفعش للأسف تصدر للناس انانيتك طول الوقت وتستغرب انك ف الاخر قاعد لوحدك..

برج الثور صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية تواضع وإهتمام بالاخرين حبة..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والترابية والنارية..

إعرف حظك اليوم برج الجوزاء بالتفصيل الجمعة 19/1/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج براح ووقت عشان تصالح نفسك على العالم من تاني.. خد وقتك ومتستعجلش ومتقلقش.. مسيرك هتعدي وتنبسط

برج الجوزاء عملياً 

( الشغل والمذاكرة والتخطيط لبكرة ):

متحاولش تثبت لنفسك طول الوقت انك جميل ومحصلتش.. بلاش تقع ف الحفرة الضلمة دي.. انتا اذكى من كدة

برج الجوزاء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة خروج وشوبينج وضحك كتير جدا

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والهوائية..

إعرف حظك اليوم برج السرطان بالتفصيل الجمعة 19/1/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج تفكير كتير النهاردة مع تركيز كبير.. خد وقتك ومتهتمش غير انك تتصرف صح وبشكل يرضي ضميرك وإحتياجاتك ف الحياة وبس.. دة طبعا لو لسة عندك ضمير جواك

برج السرطان عملياً 

( الشغل والمذاكرة والتخطيط لبكرة ):

حاول تعبر عن نفسك بشكل فيه مجاملة ولو بشكل قليل لمشاعر الناس حواليك..

برج السرطان صحياً 

(نفسيا وجسمانيا وكل مايخص طاسة المزاج ):

صحتك كويسة وزي الفل.. بطل قلق ع الفاضي

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والنارية..

إعرف حظك اليوم برج الأسد بالتفصيل الجمعة 19/1/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الحب مش بالعافية وانتا عارف كدة كويس.. خد بالك ان العالم مش قاعد تحت أمر مزاجك.. إعقل شوية ومتبوظش كل حاجة

برج الأسد عملياً 

( الشغل والمذاكرة والتخطيط لبكرة ):

قدامك حاجات حلوة جاية ف الطريق.. إستعد كويس وخليك عاقل وحاول تبتسم ف وشها ولو من باب التغيير معلش

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية تفاؤل مزيكا كتير حلوة صافية وجديدة

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والترابية

إعرف حظك اليوم برج العذراء بالتفصيل الجمعة 19/1/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طالما شعرك جميل وناعم النهاردة يبقى متقلقش من اي حاجة خصوصا وان نعومته هتزحلق اي حاجة بتفكر تعيش جواه او تحته.. خصوصا خصوصا الافكار المتشائمة السودة اللي مش كويسة

برج العذراء عملياً 

( الشغل والمذاكرة والتخطيط لبكرة ):

انتا مش محتاج تمشي ورا حد النهاردة من باب الاستسهال.. فكر لنفسك وقرر لحياتك ولمستقبلك احسن

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة تمام بس حاول تقرب حبة من الخيار والخس والجزر والبنجر الاحمر والبطاطاس المهروسة والزبدة..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والهوائية والترابية والنارية.

إعرف حظك اليوم برج الميزان بالتفصيل الجمعة 19/1/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فكك من وهم التقمص ومتحطش نفسك مكان اي حد سواء عاجبك او منبهر بيه او مجرد عاوز تعرف هو بيعمل اللي بيعمله دة ازاي وليه.. بلاش عشان هتتعب ومش هيعجبك اللي هتشوفه.. بلاش

برج الميزان عملياً 

( الشغل والمذاكرة والتخطيط لبكرة ):

خد بالك من الماديات والفلوس اليومين دول عشان متحصلكش اي ازامات تفسد عليك مودك ومزاجك وانبساطك بدون داعي

برج الميزان صحياً 

( نفسيا وجسمانيا وكل مايخص طاسة المزاج ):

صحتك النهاردة ماشي حالها ومشجعة على الانبساط البسيط.. خليك بس مكانك ومتروحش لحد ف اي حتة خصوصا ف خيالك

تعرف على توافق برج الميزان مع باقي الأبراج النهاردة:

متوافق مع الابراج الدرامية والفضية والمائية والترابية

إعرف حظك اليوم برج العقرب بالتفصيل الجمعة 19/1/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خليك دبلوماسي النهاردة.. خليك رقيق.. خليك مطمئن للي حواليك.. خليك واثق انك هتضحك وهتضحك لحد ما تتعب من كتر الضحك وتقعد ساكت وف حالك خالص.

برج العقرب عملياً 

( الشغل والمذاكرة والتخطيط لبكرة ):

شوية هدوء وتأمل النهاردة هينفعوك جدا وإحتمال يتسببوا ف أحلام حلوة بالليل

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك لما تحلم متحكيش أحلامك دي لحد

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والنارية

إعرف حظك اليوم برج القوس بالتفصيل الجمعة 19/1/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متراقبش حد عشان عيب.. التركيز الزيادة ف حياة غيرك مش هيعود عليك بنفع لا من قريب ولا من بعيد.. لكل واحد تفاصيله ومبررات كتير لوجود التفاصيل دي.. كل اللي هتشوفه لما تركز هو التفاصيل ومش هتعرف بسهولة ايه هي المبررات.. ف على ايه التعب دة اساسا؟

برج القوس عملياً 

( الشغل والمذاكرة والتخطيط لبكرة ):

اليوم لطيف ومناسب للراحة والاسترخاء بشكل كبير خصوصا وانك محتاج تفضي دماغك من كل الهري اللي بيجري فيها ورا بعضه

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك شوية اهتمام بسيط بنوعية اكلك وتوقيتاته

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والترابية والهوائية

إعرف حظك اليوم برج الجدي بالتفصيل الجمعة 19/1/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فرص عمل وانبساط وانتا حيران مابينهم بشدة.. طب ليه كل الحيرة دي.. من امتى مبتعرفش تتصرف التصرف اللي يصب ف مصلحتك.. من امتى انتا مشوش كدة ومشتت؟.. غريبة بصراحة

برج الجدي عملياً 

( الشغل والمذاكرة والتخطيط لبكرة ):

حاول تسأل نفسك السؤال دة النهاردة.. هل انتا مش عارف تنظم وقتك ولا مش مهتم؟.. خصوصا وانك قدامك فرص كتير للنجاح وانتا بتتعامل معاها غلط جدا وبعناد غريب مش لايق عليك ولا على ذكائك

برج الجدي صحياً 

( نفسيا وجسمانيا وكل مايخص طاسة المزاج ):

صحيا انتا محتاج النهاردة تقلل حبة من الدخان ف حياتك وتكتر من البخار احسن ليك او لجيوبك الانفية

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والنارية والهوائية..

إعرف حظك اليوم برج الدلو بالتفصيل الجمعة 19/1/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

خد بالك من نفسك النهاردة وبص يمين وشمال قبل ماتعدي الشارع ف اي حلم هتحلمه وانتا نايم

برج الدلو عملياً 

( الشغل والمذاكرة والتخطيط لبكرة ):

واضح ان في قوى ظلامية شريرة متربصة بيك النهاردة واحتمال تهاجمك ف اي وقت الا اذا كنت حويط ومسلح بشيكولاتة تضحك بيها عليها لما تقابلها..

برج الدلو صحياً 

( نفسيا وجسمانيا وكل مايخص طاسة المزاج ):

صحتك محتاجة شوية خيال عالي وبعد عن القلق والتوتر وإصطناع المخاوف من العدم

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والهوائية.

إعرف حظك اليوم برج الحوت بالتفصيل الجمعة 19/1/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تخليك كوول النهاردة وتهدي اعصابك على قد ماتقدر خصوصا وانك مطنش قلبك بقالك فترة وبتكتفي بانك تتطمن انك محبوب وبس مش اكتر ومش فارق معاك احساس الطرف الاخر ايه بالظبط.. حاول تقلل الانانية الليلة حبة وتفكر ف غيرك زي مابتفكر ف نفسك

برج الحوت عملياً 

( الشغل والمذاكرة والتخطيط لبكرة ):

العصبية اخت التوتر وانتا مش مستحمل اي توتر النهاردة خصوصا وان خطط كتير من خططك بتفشل قدامك.. جرب تبقى دايركت وبسيط وبلاش لؤم ركيك بلاستك وانتا تفلح ويبقالك ف يوم تأثير حقيقي ف مجالك العملي

برج الحوت صحياً 

( نفسيا وجسمانيا وكل مايخص طاسة المزاج ):

صحيا النهاردة ياريت تمارس اي رياضة بخلاف النكد والمرازية ف الناس

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية