إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

التاريخ مليان ستات ضحكت على رجالة ورجالة ضحكت على ستات ورغم كدة محدش بيتعلم يا أخي متفهمش ليه ومازال الطرفين بيتعاملوا مع بعض ولا كأن في أي حاجة حصلت لمجرد ان كل راجل وست فاكرين انهم ممكن يكتبوا التاريخ من اول وجديد بقصة حبهم.   

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الخميس 18/1/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج تعملك كوباية شاي حلوة كدة بنعناع وتقعد ف البلكونة او تبص من الشباك وتتفرج على الناس وتسجل كدة كام واحد ماشي ف الشارع لابس هدوم فيها اللون الأحمر بشكل واضح.

برج الحمل عملياً

( الشغل والمذاكرة والتخطيط لبكرة ):

محتاج تتسلى النهاردة حبة.. وياريت تكون التسلية دي دافع كافي ليك يخليك تخلص الحاجات اللي انتا بقيت مهمل فيها ف حياتك

برج الحمل صحياً

( نفسيا وجسمانيا وكل مايخص طاسة المزاج ):

فكك من حوار الدايت اللي بتفكر فيه بقالك حبة دة.. مش وقته ابدا يامعلم

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والبلاستيكية والنارية والترابية..

إعرف حظك اليوم برج الثور بالتفصيل الخميس 18/1/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

الجدية والإلتزام النهاردة هينفعوك ف مواجهة سخافات صغننة عابرة من الناس والحياة بشكل عام.. صلابة تستحق الإعجاب بصراحة.

برج الثور عملياً

( الشغل والمذاكرة والتخطيط لبكرة ): 

متستعجلش وكل حاجة هتجيلك لحد عندك.. شوية صبر وثقة بس مش اكتر

برج الثور صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية اهتمام على مستوى الشعر والسنان والحواجب..

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والترابية والهوائية..

إعرف حظك اليوم برج الجوزاء بالتفصيل الخميس 18/1/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

في حد هيظهر ف حياتك النهاردة وهيبقاله تأثير كبير عليك.. بس متقلقش.. يومين وهتقلب عليه وتنساه زيه زي غيره.

برج الجوزاء عملياً 

( الشغل والمذاكرة والتخطيط لبكرة ):

قدامك نجاح ومزيد من النجاح ف حياتك العملية خصوصا وانك بتعمل اللي وراك بعقلانية وف هدوء

برج الجوزاء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة شوية ضحك ولعب وجد وحب.. حاول تركز ف الحاجة الاسهل فيهم والاقرب وتعملها من سكات

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والترابية..

إعرف حظك اليوم برج السرطان بالتفصيل الخميس 18/1/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتراوغ وبتهرب طول الوقت عشان فاكر انك كدة غامض ومحدش يقدر يعرف انتا بتفكر ازاي.. طب ما تفترض ولو للحظة ان محدش ف الحقيقة مهتم يمكن تستريح وتبطل الموضوع دة.

برج السرطان عملياً 

( الشغل والمذاكرة والتخطيط لبكرة ):

خلص اللي وراك وركز كدة عشان ربنا يكرمك وتفلح ف حياتك ومتشغلش بالك بكلام حد

برج السرطان صحياً 

(نفسيا وجسمانيا وكل مايخص طاسة المزاج ):

صحتك كويسة بس حاول تتفاءل حبة عشان اليوم يعدي على خير من غير اي مناوشات إنسانية تضر بصحتك النفسية

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والهوائية..

إعرف حظك اليوم برج الأسد بالتفصيل الخميس 18/1/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول متبقاش من الناس اللي بتقع ف غرام صوتها إكمنه حلو وتفتكر ان اي حاجة بتقولها صح والناس المفروض تسمعها.. بلاش تغلط الغلطة التاريخية دي عشان ياما كان ليها ضحايا.

برج الأسد عملياً 

( الشغل والمذاكرة والتخطيط لبكرة ):

صحتك النهاردة ماشي حالها بس حاول تعمل اي شوية رياضة من اي نوع الليلة

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة كويسة بس نفسيتك فعلا محتاجة دندشة وفرحة بأي شكل من الاشكال

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والهوائية.

إعرف حظك اليوم برج العذراء بالتفصيل الخميس 18/1/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قاوم بكل طاقتك النهاردة وعدي اليوم على خير وإنجح ف حياتك من فضلك.. دة حقك ف الحياة المفروض.. ولو انتا مقتنعتش بيه بجد من جواك إزاي هيجيلك عين تطلب من الحياة تحققهولك.

برج العذراء عملياً 

( الشغل والمذاكرة والتخطيط لبكرة ):

امشي ورا افكارك وبس النهاردة ومتخشش ف اي منافسة مع اي حد

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تشرب عصاير فريش كتير مع حد حلو ويستاهل تعزمه

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والهوائية والمائية.

إعرف حظك اليوم برج الميزان بالتفصيل الخميس 18/1/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

جميل النهاردة ورومانسي حبة ماشاء الله.. حاول تستفيد من المود الجميل دة بأقصى شكل ممكن الليلة ومتتكسفش.. دة حقك وحق اي حد حلو ف الحياة

برج الميزان عملياً 

( الشغل والمذاكرة والتخطيط لبكرة ):

متستلفش من اي حد فلوس النهاردة خالص.. بلاش ومالوش لازمة

برج الميزان صحياً 

( نفسيا وجسمانيا وكل مايخص طاسة المزاج ):

صحتك محتاجة النهاردة تكمل سعي ورا اهدافك العملية بمنتهى الاصرار والتحدي..

تعرف على توافق برج الميزان مع باقي الأبراج النهاردة:

متوافق مع الابراج الدرامية والفضية والنارية والهوائية

إعرف حظك اليوم برج العقرب بالتفصيل الخميس 18/1/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فكك من اي حاجة النهاردة وإبحث عن الجمال ف كل شيئ براحتك.. اليوم مناسب للموضوع دة بشدة.

برج العقرب عملياً 

( الشغل والمذاكرة والتخطيط لبكرة ):

كل حاجة هتمشي زي مانتا عاوز لو بطلت تضغط وتزن عشان كل حاجة تمشي زي مانتا عاوز

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك تبقى كوول النهاردة ومتتعصبش عشان اي حاجة اساسا

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والهوائية

إعرف حظك اليوم برج القوس بالتفصيل الخميس 18/1/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تستعد النهاردة عشان غالبا هتروح مشوار مهم ومحتاج كل مجهوداتك التمثيلية الممكنة عشان تبان عاقل.

برج القوس عملياً 

( الشغل والمذاكرة والتخطيط لبكرة ):

إختار تنجح بمجهودك مش بالدعاية الإستباقية المبدئية لمجهودك

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تقلل من الحركة الزيادة المفرطة وتخلي معاك زلطة ف جيبك إحتياطي

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والنارية والمائية.

إعرف حظك اليوم برج الجدي بالتفصيل الخميس 18/1/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محدش بيقولك تعيش حياتك ازاي ابدا ولا حد يجرؤ.. الموضوع كله ان اللي بيحبوك صعبان عليهم يشوفوك بتغرق نفسك بثقة.. بس كدة مش أكتر.

برج الجدي عملياً 

( الشغل والمذاكرة والتخطيط لبكرة ):

حاول تهتم شوية بمصلحتك بشكل حقيقي اليومين دول وبلاش رغي كتير ف الفارغة والمليانة

برج الجدي صحياً 

( نفسيا وجسمانيا وكل مايخص طاسة المزاج ):

صحيا انتا محتاج النهاردة تتفرج على سيزون كامل من اي مسلسل اجنبي حلو من اللي انتا مخبيهم

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والترابية والنارية..

إعرف حظك اليوم برج الدلو بالتفصيل الخميس 18/1/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

قلبك محتاجك تقف جنبه النهاردة وخصوصا بالليل ف فترة المساء والسهرة.. حاول متنتقدوش قدام حد عشان ميزعلش

برج الدلو عملياً 

( الشغل والمذاكرة والتخطيط لبكرة ):

فكر كويس النهاردة ف المستقبل وبس.. دي الحاجة الوحيدة اللي تستاهل تفكر فيها اساسا غير كدة كله ف القشطة وماشي حاله.

برج الدلو صحياً 

( نفسيا وجسمانيا وكل مايخص طاسة المزاج ):

صحتك تمام ومتاشي حالها النهاردة ان شاء الله.. متنساش تاخد الدوا يابرنس بس مش اكتر

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والهوائية والبرمائية.

إعرف حظك اليوم برج الحوت بالتفصيل الخميس 18/1/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

شيك النهاردة وعاقل وهادي ماشاء الله.. غالبا بتدبر لحاجة من تحت لتحت ومسيرنا نعرفها

برج الحوت عملياً 

( الشغل والمذاكرة والتخطيط لبكرة ):

حاول تقلل شوية من المؤامرات ف حياتك سواء على الناس او على نفسك عشان تعرف تنبسط وتعيش

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا محتاج الليلة تاكل اكل صحي وتمارس القليل من الرياضة والكثير من التأمل.

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية الهوائية