إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

المشكلة انه كل ما كانت مناخيرك كبيرة هيزيد بالتبعية إحساسك بالبرد بس تقول لمين.. محدش مهتم.. والاهتمام بالمناخير مبيتطلبش.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأربعاء 17/1/2018 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

فكر ف كلامك كويس جدا جدا قبل ماتقوله.. مهم متزعلش منك أي حد النهاردة.

برج الحمل عملياً

( الشغل والمذاكرة والتخطيط لبكرة ):

الصبر على الآذى احيانا آذى أكبر.. خصوصا وانك لما بتقول انك بتصبر بتبقى ساكت مش عشان انتا مش عاوز ترد.. لأ.. عشان انتا مستمتع بكونك ضحية ودي مصيبة نفسية وممكن بسهولة تعملك عقد وكلاكيع انتا في غنى عنها فعلا.. خليك رايق ومتزعلش حد منك.. بس خد حقك برضة.. خد حقك بالكامل

برج الحمل صحياً

( نفسيا وجسمانيا وكل مايخص طاسة المزاج ):

صحتك كويسة بس حاول متاخدش كل كلام الناس على صدرك النهاردة.. كبر دماغك وطنش تعيش وتاكل قراقيش

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والبلاستيكية والهوائية والنارية..

إعرف حظك اليوم برج الثور بالتفصيل الأربعاء 17/1/2018 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

لو ملكش مزاج النهاردة تتعامل مع الناس يبقى تاخد جنب وتفصل دماغك بكتاب حلو من اللي انتا شاريهم من زمان وراكنهم على أمل تقراهم ف يوم فاضي.. أهو اليوم الفاضي دة جه خلاص.. عيش حياتك بقى يامعلم..

برج الثور عملياً

( الشغل والمذاكرة والتخطيط لبكرة ): 

متجريش ورا اي حاجة متجريش وراك.. مش مستاهلة اساسا فرهدة على الفاضي

برج الثور صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك تشرب مية كتير على قد ماتقدر

إعرف توافق برج الثور مع باقي الأبراج النهاردة:

متوافق مع الابراج البسكوتية والبربوشية والترابية والنارية..

إعرف حظك اليوم برج الجوزاء بالتفصيل الأربعاء 17/1/2018 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إزاي بتفهم كل حاجة وهي طايرة او بتمشي او بتزحف حتى ومش هارش لسة إزاي تداري قلبة مودك عن الناس.. راجع نفسك وإتصرف كويس ومتزعلش حد منك.

برج الجوزاء عملياً 

( الشغل والمذاكرة والتخطيط لبكرة ):

هتعمل حاجة حلوة جدا النهاردة وهتفرح بيها جدا بالنهار.. لما الليل ييجي هتحس انك معملتش حاجة والفرحة هتبتدي تقل ويمكن تختفي.. عادي.. متقلقش.. كلنا بيحصلنا كدة مش انتا بس..

برج الجوزاء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة تاكل كويس وتنام كويس ومتفكرش كتير ف حاجات ممنهاش أمل

تعرف على توافق برج الجوزاء مع باقي الأبراج النهاردة:

متوافق مع الابراج البرجماتية والحنكوشية والنارية والترابية..

إعرف حظك اليوم برج السرطان بالتفصيل الأربعاء 17/1/2018 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اللون الاسود النهاردة هيبقى فال حلو ف كل حاجة ف حياتك سواء داخليا او خارجيا.. متخافش منه وإمشي وراه

برج السرطان عملياً 

( الشغل والمذاكرة والتخطيط لبكرة ):

متطلبش من حد حاجة انتا متقدرش تعملها او مش عاوز تعملها او مبتعرفش تعملها.. فكر ف الناس حبة زي مابتفكر ف نفسك النهاردة..

برج السرطان صحياً 

(نفسيا وجسمانيا وكل مايخص طاسة المزاج ):

صحتك ماشي حالها وكويسة مفيهاش مشاكل ان شاء الله.. قلل حبة بس من التفكير ف كل الكلام اللي إتقالك طول اليوم ومعرفتش ترد عليه.. خصوصا بالليل قبل ماتنام..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والكتكوتية والمائية والنارية..

إعرف حظك اليوم برج الأسد بالتفصيل الأربعاء 17/1/2018 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

السعادة والهنا بيلفوا حواليك بقالهم فترة بس غالبا خايفين يقربوا منك عشان معظم الوقت متضايق ومكشر وعصبي.. حقهم يخافوا بصراحة..

برج الأسد عملياً 

( الشغل والمذاكرة والتخطيط لبكرة ):

شوية تفاؤل ولو بلاستك عشان اليوم يعدي بس على خير الله يباركلك ف صحتك وعافيتك ياشيخ..

برج الأسد صحياً 

( نفسيا وجسمانيا وكل مايخص طاسة المزاج ):

صحتك النهاردة كويسة بس نفسيتك فعلا محتاجة دندشة وفرحة بأي شكل من الاشكال

تعرف على توافق برج الأسد مع باقي الأبراج النهاردة:

متوافق مع الابراج الفشكولية والباراكودية والمائية والنارية.

إعرف حظك اليوم برج العذراء بالتفصيل الأربعاء 17/1/2018 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طول مانتا واثق ف نفسك وف شياكتك وذكائك النهاردة يبقى متقلقش من اي حاجة..

برج العذراء عملياً 

( الشغل والمذاكرة والتخطيط لبكرة ):

مش كل حاجة بتلمع تبقى جميلة ولا مهمة.. اوقات اللمعان دة بيبقى مجرد شكل حلو بيخفي جواه منتهى الولا حاجة..

برج العذراء صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة مترغيش ف الموبايل كتير خصوصا قبل ماتنام الا لو هتحب ف التليفون.. غير كدة لأا

تعرف على توافق برج العذراء مع باقي الأبراج النهاردة:

متوافق مع الابراج البرطمانية والكستبانية والنارية والهوائية.

إعرف حظك اليوم برج الميزان بالتفصيل الأربعاء 17/1/2018 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متخافش وإفرح براحتك النهاردة وميهمكش من اي حد ولا أي حاجة.. من حق اي انسان يفرح وبراحته ف الكوكب دة ومن حقه برضة يفكه من الناس ونكد الناس

برج الميزان عملياً 

( الشغل والمذاكرة والتخطيط لبكرة ):

متنكدش على نفسك ابدا لمجرد انك محاط بناس نكدية او بتحب النكد.. الحزن مينفعش يبقى موضة على فكرة ولا عمره هينفع

برج الميزان صحياً 

( نفسيا وجسمانيا وكل مايخص طاسة المزاج ):

صحتك محتاجة النهاردة شوية فرحة طازة مع ضحك وابتسام كتير على قد ماتقدر

تعرف على توافق برج الميزان مع باقي الأبراج النهاردة:

متوافق مع الابراج الدرامية والفضية والهوائية المائية والبرمائية..

إعرف حظك اليوم برج العقرب بالتفصيل الأربعاء 17/1/2018 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بتحاول بكل قوتك تفرح وتزقطط وبتحاول ف نفس الوقت تشد اللي بتحبهم بجد للفرحة دي يمكن يعرفوا يفرحوا معاك بس تقريبا مالهمش مزاج او مش عاوزين يفرحوا

برج العقرب عملياً 

( الشغل والمذاكرة والتخطيط لبكرة ):

فكر تغير اللوك بتاعك وتعمل نيولوك من باب التجديد والإنعاش.. كمان ياريت النهاردة تسرح ف خيالك ساعة براحتك وتحلم وانتا صاحي حبة.. دة حقك على فكرة ومهواش حاجة عيب ولا هزار..

برج العقرب صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك تتمشى حبة على رجليك مع مزيكتك وازازة المية بتاعتك.. وياريت متبطلش مشي الا لما المية اللي ف الازازة تخلص

تعرف على توافق برج العقرب مع باقي الأبراج النهاردة:

متوافق مع الابراج الحنكوشية والبرطمانية والهوائية والمائية

إعرف حظك اليوم برج القوس بالتفصيل الأربعاء 17/1/2018 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متديش حد حاجة النهاردة لمجرد انك عاوز تريح دماغك من زنه وقرفه وصداعه.. متريحوش

برج القوس عملياً 

( الشغل والمذاكرة والتخطيط لبكرة ):

اللي بيزرع ملوخية بيحصد ملوخية واللي بيزرع قلقاس بيحصد قلقاس برضة.. مش ملوخية.. اظن الرسالة وصلت

برج القوس صحياً 

( نفسيا وجسمانيا وكل مايخص طاسة المزاج ):

صحتك النهاردة محتاجة منك شوية رياضة على خفيف خالص.. شوية تمارين بطن وضغط وانتا قاعد ف السرير كدة هتفرفشك وتنعنشك وتقوي مناعتك..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والحبشتكانية والحنجورية والهوائية

إعرف حظك اليوم برج الجدي بالتفصيل الأربعاء 17/1/2018 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متتخدعش ف جمالك النهاردة لأنه مش هينفعك ولا هيشفعلك طول الوقت قصاد مرازية الأيام.. الحياة ملهاش كبير ولا عزيز ولا الجمال بيدوم..

برج الجدي عملياً 

( الشغل والمذاكرة والتخطيط لبكرة ):

طلع حاجة لله ولا ساعد اي حد النهاردة يكون محتاج المساعدة دي وهتفرق معاه بشكل جذري ف حياته وبطل تهري وتنكت ف روحك بالليل خالص

برج الجدي صحياً 

( نفسيا وجسمانيا وكل مايخص طاسة المزاج ):

صحيا انتا محتاج النهاردة تشرب شايك ف البلكونة وتتفرج على الناس لمدة نص ساعة على الاقل من غير ماتفكر ف اي حاجة من اي نوع..

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والترابية والهوائية..

إعرف حظك اليوم برج الدلو بالتفصيل الأربعاء 17/1/2018 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إمشي ورا إحساسك زي ما روبي قالت ف الاغنية وفكك من العقل والمنطق خالص النهاردة وانتا بتتعامل مع مشاعركبشكل خاص او قلبك بشكل عام

برج الدلو عملياً 

( الشغل والمذاكرة والتخطيط لبكرة ):

إعتمادك على التكنولوجيا النهاردة لازم يقل.. حاول ترجع تاني للحياة البدائية البسيطة وريح دماغك..

برج الدلو صحياً 

( نفسيا وجسمانيا وكل مايخص طاسة المزاج ):

صحتك محتاجة شوية مثابرة بس وهترجع تبقى زي الفل قريب جدا ان شاء الله..

تعرف على توافق برج الدلو مع باقي الأبراج النهاردة:

متوافق مع الابراج الكستبانية والدخانية والمونوكرومية والمائية والبرمائية.

إعرف حظك اليوم برج الحوت بالتفصيل الأربعاء 17/1/2018 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متنساش تطفي النور وانتا خارج النهاردة عشان متحصلكش اي عكوسات كهربائية خصوصا وانتا بتهرب من حياة حد كنت بتحبه وزهقت منه فجأة

برج الحوت عملياً 

( الشغل والمذاكرة والتخطيط لبكرة ):

الهدوء والعقل احسن كتير من العصبية خصوصا الليلة.. فكر كويس وإتصرف صح ومتخسرش حد

برج الحوت صحياً 

( نفسيا وجسمانيا وكل مايخص طاسة المزاج ):

صحيا انتا محتاج الليلة ربع كيلو جزر وخساية ونص كرنبة حمرا تنقنق فيهم عشان يعدلوا مزاجك

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والنارية