إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

مش لازم نحب بعض ولا نكره بعض.. ممكن نبقى زمايل حياة مش أكتر.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل الأحد 17/12/2017  مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

خد بالك ان عينيك بتفضح حبك لاي حد حواليك خصوصا وإنك بتقعد متنحله بزيادة ومش واخد بالك من الموضوع دة..

برج الحمل عملياً

( الشغل والمذاكرة والتخطيط لبكرة ):

مفيش قانون ضد الحب لحد دلوقتي ولا في قانون ضد انك تبص لأي حد انتا بتحبه براحتك وتتنحله برضة زي مانتا عاوز..مفيش.. بص براحتك..

برج الحمل صحياً

( نفسيا وجسمانيا وكل مايخص طاسة المزاج ):

صحتك تمام بس ضهرك محتاج حبة إهتمام..غير كدة مفيش حاجة ممكن تقلقك اوي يعني صحيا..اهتم بس بنفسيتك حبة وبلاش قمصة..كفاية الوقت اللي ضاع منك ف النكد..كفاية والله..

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والترابية..

إعرف حظك اليوم برج الثور بالتفصيل الأحد 17/12/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

حد جميل هيظهر ف حياتك النهاردة وهيشجعك على الحياة..ماشية معاك حلاوة وملكش حجة اهو..انبسط بقى عشان الحد دة مش هيقربلك طول مانتا مكشر..

برج الثور عملياً

( الشغل والمذاكرة والتخطيط لبكرة ): 

حاول تبتسم للحياة النهاردة عشان تضحكلك واضحكلها عشان متضحكش عليك ولو ضحكت عليك فكك من اي حاجة واضحك معاها..اهم حاجة متخليهاش تشوف دموعك..متستاهلش

برج الثور صحياً 

( نفسيا وجسمانيا وكل مايخص طاسة المزاج ):

صحتك محتاجة اهتمام ومحتاجة منك تبعد عن الدخان بشكل عام حتى لو مبتدخنش للأمان..

إعرف توافق برج الثور مع باقي الأبراج النهاردة:

متوافق مع الابراج البسكوتية والحربائية والنارية..

إعرف حظك اليوم برج الجوزاء بالتفصيل الأحد 17/12/2017  مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج فترات تآمل طويلة النهاردة خصوصا بالليل..كمان حاول متقعدش ف مكان نوره فلورسنت النهاردة كتير..

برج الجوزاء عملياً 

( الشغل والمذاكرة والتخطيط لبكرة ):

ابعد عن اللون الازرق بكل درجاته وابتدي ركز مع البرتقاني من النهاردة..هتنبسط والله..

برج الجوزاء صحياً 

( نفسيا وجسمانيا وكل مايخص طاسة المزاج ):

محتاج تلعب رياضة او تأجر عجل وتلف بيه ساعة واتنين وتلاتة بدون هدف واضح..

تعرف على توافق برج الجوزاء مع باقي الأبراج النهاردة:

متوافق مع الابراج الحنتوسية والكتكوتية والمعدنية..

إعرف حظك اليوم برج السرطان بالتفصيل الأحد 17/12/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عاطفيا انتا مستقر بس ف نفس الوقت مش مستقر.. ودة راجع لكونك اوقات بتبقى مبسوط ومشاعرك مزقططة بس دايما بتعرف تفتكر ف نص الفرحة حاجة تنكد بيها على نفسك.. فالح من يومك بصراحة..

برج السرطان عملياً 

( الشغل والمذاكرة والتخطيط لبكرة ):

نقاش مهم النهاردة مع حد عاقل انتا بتثق فيه وف دماغه..فال خير حلو دة جدا ولايق عليك خصوصا وانك بقال كتير ممثلتش دور العاقل دة..

برج السرطان صحياً 

(نفسيا وجسمانيا وكل مايخص طاسة المزاج ):

صحتك كويسة بس نفسيا انتا محتاج شوية حب وفرفشة على تشجيع..ميكس صعب بس مهم تدور عليه وتتمسك بيه النهاردة على قد ماتقدر..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والكهربائية والبركانية..

إعرف حظك اليوم برج الأسد بالتفصيل الأحد 17/12/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

محتاج ترتب كل حاجة حواليك بشكل عاجل.. بس قبل ماترتب الحاجات اللي برة لازم ترتب كل حاجة جوة ف قلبك ودماغك الاول..المنطق بيقول كدة..

برج الأسد عملياً 

( الشغل والمذاكرة والتخطيط لبكرة ):

المنطق النهاردة هيلعب دور مهم ف حاجات كتير اولها ترتيب اولوياتك تجاه اي حاجة انتا ناوي تعملها او تقولها..

برج الأسد صحياً 

( نفسيا وجسمانيا وكل مايخص طاسة المزاج ):

فكك من الاهتمام بأي حاجة الا نفسك النهاردة..وراعي انك اكيد اهم من اي حاجة انتا بتمتلكها..

تعرف على توافق برج الأسد مع باقي الأبراج النهاردة:

متوافق مع الابراج البطوطية والباراكودية والمستحية..

إعرف حظك اليوم برج العذراء بالتفصيل الأحد 17/12/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

التفكير الكتير قبل النوم خطر ومضر ومالوش اي لازمة ويعتبر استدعاء ودعوة مفتوحة للنكد.. مالوش اي فايدة علمية او عاطفية من اي نوع فعلا..

برج العذراء عملياً 

( الشغل والمذاكرة والتخطيط لبكرة ):

قبل النوم تسمع مزيكا هادية منعشة تشجعك تحلم احلام حلوة.. مش تسهر تفكر ف كل حاجة وحشة لمجرد انك صعبان عليك تريح مخك حبة.. مش اسلوب دة ياكابتن والله.. مش اسلوب..

برج العذراء صحياً 

( نفسيا وجسمانيا وكل مايخص طاسة المزاج ):

صحتك كويسة بس لو انتعشت وفرفشت هتبقى احسن واحسن خصوصا وان الميكروبات النهاردة اجازة..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والفرفوشية والكستبانية..

إعرف حظك اليوم برج الميزان بالتفصيل الأحد 17/12/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متلعبش لعبة الحب مع حد مش من لونك أو مقاسك ف الحياة..مش هتفهمه ولو فهتمه مش هتحسه ولوحسيته هتزهق منه بسرعة وهتهرب وتمشي بسرعة بدون إبداء الاسباب وبعدها طبيعي هترجع تحس بالندم وتزعل من نفسك وتحاسبها وتقسوا عليها ف حين انك اتصرفت صح وانتا مش واخد بالك.. وشوية وتنسى وتشوف حد تاني مهواش مقاسك..تنبهر بيه وترجع تعيد نفس القصة كلها من تاني وانتا مش واخد بالك..

برج الميزان عملياً 

( الشغل والمذاكرة والتخطيط لبكرة ):

محتاج تتفسح النهاردة وتدلع نفسك ف سينما وعشا برة كدة من باب المكافئة على وجودك ف الحياة..

برج الميزان صحياً 

( نفسيا وجسمانيا وكل مايخص طاسة المزاج ):

خد بالك من قلبة الجو وتقل احتياطي بزيادة خصوصا بالليل وحاول تقرب حبة من الجوافة والبرتقان والاستفندي..

تعرف على توافق برج الميزان مع باقي الأبراج النهاردة:

متوافق مع الابراج الدرامية والمستحية والشحتفجية والهوائية..

إعرف حظك اليوم برج العقرب بالتفصيل الأحد 17/12/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إنتعاشة وفرحة مفاجئة النهاردة وإحتمال تتعزم برة او تجيلك هدية او تسمع خبر حلو أو يجيلك مكالمة او رسالة حلوة..

برج العقرب عملياً 

( الشغل والمذاكرة والتخطيط لبكرة ):

مفيش حجة كافية للنكد النهاردة ابسلوتلي.. فرفش كدة وانبسط وإستمتع بيوم جميل..

برج العقرب صحياً 

( نفسيا وجسمانيا وكل مايخص طاسة المزاج ):

صحتك ماشي حالها بس ممك نتبقى احسن لو اتحركت بشكل اكبر واهتميت تبقى نشيط ومهتم كدة بالبحث عن السعادة المنطقية..

تعرف على توافق برج العقرب مع باقي الأبراج النهاردة:

متوافق مع الابراج الغجرية والبرمائية والمائية..

إعرف حظك اليوم برج القوس بالتفصيل الأحد 17/12/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

الهدوء وعدم الانفعال هيفيدوك النهاردة ف التعامل مع اي مشكلة ممكن تطفو على سطح عواطفك..حاول بس متغفلش قلبك وتضحك عليه..بلاش..

برج القوس عملياً 

( الشغل والمذاكرة والتخطيط لبكرة ):

بلاش تحط حد ف دماغك النهاردة..انتا اكبر من كدة بمراحل..ركز كدة عشان تفلح ف الحياة وتنجح وبس..دة قدرك الطبيعي..متقفش ف طريقه من فضلك..

برج القوس صحياً 

( نفسيا وجسمانيا وكل مايخص طاسة المزاج ):

صحتك محتاجة اهتمام خصوصا ف فترة المساء والسهرة..حاول تدفي نفسك بشكل جيد وحاول تهتم حبة بمزاجك ومتركزش مع الشتا لأنه دايما بيجيب ف ايده حبة حزن ووحدة مش لطاف ابدا..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والبربوشية والكبريتية..

إعرف حظك اليوم برج الجدي بالتفصيل الأحد 17/12/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

نعمة البصيرة والإحساس ملهاش مقاس معين ممكن يبقى طول الوقت على مقاس اي حد..هي زي هدية حلوة مفاجئة من الحياة كدة بتيجي اوقات وبتختفي اوقات..متجيش لا بالبلطجة ولا بالإدعاء.. إفتكر الكلام دة كويس النهاردة..

برج الجدي عملياً 

( الشغل والمذاكرة والتخطيط لبكرة ):

خليك نفسك وبس مهما كانت نفسك دي بسيطة وعلى قدها..إفتخر بيها وقدرها واديها حقها بدل ماتستلفلها صفات مش فيها عشان تعجب الناس..

برج الجدي صحياً 

( نفسيا وجسمانيا وكل مايخص طاسة المزاج ):

نومك وصحيانك بقى ملخبط ودي حاجة ممكن تعملك فرهدة وصداع بايخ انتا ف غنى عنه تماما..

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والمائية..

إعرف حظك اليوم برج الدلو بالتفصيل الأحد 17/12/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

عمرك ماكنت بارد ولا حاجة..هما بس اللي بيتهموك بالبرود دة من باب الاستسهال وخلاص..انتا جواك بركان لو زعل هيلسعهم كلهم وهيرجعوا يزعلوا جامد..

برج الدلو عملياً 

( الشغل والمذاكرة والتخطيط لبكرة ):

الاحساس الزيادة بالناس متعب طبعا..الاهتمام اللاإرادي برضة متعب خصوصا لما تهتم بكل حد او حاجة مش مهتمة بيك..حاول تكبر دماغك حبة معلش..

برج الدلو صحياً 

( نفسيا وجسمانيا وكل مايخص طاسة المزاج ):

إجمد وقاوم وإصمد..هانت والباقي بسيط ان شاء الله..إجمد بس وتماسك ومتخليش حد يحس بوجعك..داري كويس..

تعرف على توافق برج الدلو مع باقي الأبراج النهاردة:

متوافق مع الابراج الدخانية والمستحية والفرفورية والخيالية..

إعرف حظك اليوم برج الحوت بالتفصيل الأحد 17/12/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

متلعبش بالنار وترجع تشتكي.. نقي كويس تتعامل مع مين وليه وقيم مشاعرك ومتديهاش لأي حد معدي إلا لو انتا شايف انها ملهاش قيمة..ساعتها براحتك..جايز عندك حب مجاني للحاجات الغلط او للناس الغلط..جايز..انتا حر..

برج الحوت عملياً 

( الشغل والمذاكرة والتخطيط لبكرة ):

حاول تبقى واقعي ومتغرقش ف شوربة الاحلام وانتا بتسقي فيها لأن ف الاخر مش هتقدر تضحك على الدنيا كلها زي ما بتعرف اوقات تضحك على نفسك وتقنعها بالغلط..هيفضل مهما حصل غلط برضة مهما عملت وهيفتن على نفسه..

برج الحوت صحياً 

( نفسيا وجسمانيا وكل مايخص طاسة المزاج ):

إهتم بصحتك النفسية والعقلية النهاردة عشان عقلك ناوي يشتغلك الفترة اللي جاية دي بالجامد..خد بالك..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والهوائية..