إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

  : كلام جد

الفراشة بتفضل فاكرة نفسها دودة طول عمرها.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

إعرف حظك اليوم برج الحمل بالتفصيل السبت 16/12/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

متتعصبش وتحاول تداري إحساسك بالذنب او بالندم ف الزعيق عشان دة مش صح.. ياتعترف انك غلطان يا إما تسكت خالص.. ثم عادي على فكرة.. كل الناس بتغلط..مش انتا بس.

برج الحمل عملياً

( الشغل والمذاكرة والتخطيط لبكرة ):

مبتحبش تطلع غلط ف اي حاجة ولا بتحب حد يغلطك اصلا ولا بتحب تعترف بالغلط ف حين انك اوقات بتاخد الغلط دة ف حضنك وتدافع عنه ضد العالم كله وانتا عارف انه هتصرف غلط..ليه بتعمل كدة؟..

برج الحمل صحياً

( نفسيا وجسمانيا وكل مايخص طاسة المزاج ):

صحتك محتاجة منك تاكل كويس وتنام كويس ومتتهربش من انك تنهي اي حاجة انتا اللي إبتديتها..

إعرف توافق برج الحمل مع باقي الأبراج النهاردة:

متوافق مع الابراج البسبوسية والمرمرية والحربائية والترابية..

إعرف حظك اليوم برج الثور بالتفصيل السبت 16/12/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

من حقك النهاردة تريح عشر دقايق كل ساعة ومن حقك تلعب ساعة كل تلات ساعات.

برج الثور عملياً

( الشغل والمذاكرة والتخطيط لبكرة ): 

فكك من اي حاجة النهاردة واقعد اسمع اغاني فرنساوي قديمة وحب ف روحك ودلعها حبة..

برج الثور صحياً 

( نفسيا وجسمانيا وكل مايخص طاسة المزاج ):

صحيا انتا محتاج تفهم وحنان وأمان.. غير كدة كل حاجة كويسة وماشي حالها..

إعرف توافق برج الثور مع باقي الأبراج النهاردة:

متوافق مع الابراج البسكوتية والحربائية والهوائية..

إعرف حظك اليوم برج الجوزاء بالتفصيل السبت 16/12/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

فكر كويس النهاردة وإختار كلامك صح عشان متبوظش كل حاجة على نفسك بدون داعي..كمان حاول تبعد عن اللون الابيض ف الهدوم عشان العكوسات..

برج الجوزاء عملياً 

( الشغل والمذاكرة والتخطيط لبكرة ):

مش كل اللي يقولك حاجة تصدقها علاطول كدة..خصوصا لو كان قلبك هو اللي بيكلم عقلك..

برج الجوزاء صحياً 

( نفسيا وجسمانيا وكل مايخص طاسة المزاج ):

صحيا انتا محتاج تنعش نفسك ببرفان جديد النهاردة وتقعد ف الشمس حبة..

تعرف على توافق برج الجوزاء مع باقي الأبراج النهاردة:

متوافق مع الابراج الحنتوسية والكتكوتية والبركانية والنارية..

إعرف حظك اليوم برج السرطان بالتفصيل السبت 16/12/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

مش كل حاجة هتسمعها النهاردة او هتتقالك بتلزمك ترد عليها..ابدا والله..ممكن تطنش ومتديهمش أي أهمية وتبصلهم وتبتسم عادي خالص.

برج السرطان عملياً 

( الشغل والمذاكرة والتخطيط لبكرة ):

مش كل حاجة بتلمع تبقى حلوة ومبهرة..حاول تبقى عاقل حبة النهاردة وتقلل من السربعة والإعجاب المبالغ فيه لأنه دايما بيعقبه إحباط مبالغ فيه برضة..

برج السرطان صحياً 

(نفسيا وجسمانيا وكل مايخص طاسة المزاج ):

صحيا انتا محتاج مساچ بشكل عاجل ومحتاج تتقل ف الهدوم بشكل احسن من كدة عشان واضح ان الجو هيبقى سقعة بزيادة الايام دي..

تعرف على توافق برج السرطان مع باقي الأبراج النهاردة:

متوافق مع الابراج الحلبسية والنارية والحنجورية والكهربائية..

إعرف حظك اليوم برج الأسد بالتفصيل السبت 16/12/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تفش غلك ف اي حاجة النهاردة غير الناس عشان متخسرش حد..إتعامل بعقل وإتحكم ف أعصابك لحد ما الدنيا تخلص غتاتة وترجع تضحكلك ف ودانك لوحدك تاني.

برج الأسد عملياً 

( الشغل والمذاكرة والتخطيط لبكرة ):

حاول النهاردة متركزش مع اي حد مركز معاك وطنشه وخليك ف الهلاوس الجميلة الملونة اللي هتحلم بيها النهاردة وانتا صاحي..

برج الأسد صحياً 

( نفسيا وجسمانيا وكل مايخص طاسة المزاج ):

صحتك كويسة بس نفسيتك محتاجة تشجيع كتير ودلع ومحتاجة ترسم على حيطة وتشخبط بألوان كتير جدا..

تعرف على توافق برج الأسد مع باقي الأبراج النهاردة:

متوافق مع الابراج البطوطية والباراكودية والنارية والهوائية..

إعرف حظك اليوم برج العذراء بالتفصيل السبت 16/12/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طالما بتهتم بشعرك النهاردة يبقى متخافش من اي حد ولا اي حاجة وخصوصا الحاجات اللي انتا بتخوف نفسك منها مش الحاجات اللي بتخوف بجد..

برج العذراء عملياً 

( الشغل والمذاكرة والتخطيط لبكرة ):

عمليا انتا محتاج تفرفش النهاردة عشان تدي فرصة للحياة تدلعك لأنك كل ماهتكشر النهاردة هتلاقيها بترازيك بزيادة كأنها فاكراك بتطلب تترازى..

برج العذراء صحياً 

( نفسيا وجسمانيا وكل مايخص طاسة المزاج ):

خلي بالك من نفسك النهاردة ودفي قلبك كويس قوي عشان مياخدش برد..

تعرف على توافق برج العذراء مع باقي الأبراج النهاردة:

متوافق مع الابراج البرطمانية والبرمائية والهوائية والنارية..

إعرف حظك اليوم برج الميزان بالتفصيل السبت 16/12/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً 

( الكراش والإكس والبوي فريند والجيرل فريند والجوز والزوجة والقرايب ):

بلاش تحفز لحد وبلاش تخش ف اي جدال عقيم ممكن يفسد مودك الجميل النهاردة.. روق وركز ف الحاجات اللي بتحبها وبتحبك وبس.

برج الميزان عملياً 

( الشغل والمذاكرة والتخطيط لبكرة ):

ثق ف ذكائك وف حدسك وإحساسك الداخلي النهاردة وإتأكد انه مش هيخذلك..ثم لو حصل وخذلك متقلقش..تقدر تخذله بعدين براحتك بس ياريت مابينك وبينه عشان متحرجوش قدام اي حد..

برج الميزان صحياً 

( نفسيا وجسمانيا وكل مايخص طاسة المزاج ):

صحتك كويسة بس كهربة مخك زايدة النهاردة حبتين وهتحس بطاقة زيادة ممكن تشجعك تتصرف غلط..

تعرف على توافق برج الميزان مع باقي الأبراج النهاردة:

متوافق مع الابراج الدرامية والمستحية والشحتفجية والمائية..

إعرف حظك اليوم برج العقرب بالتفصيل السبت 16/12/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً 

( الكراش والإكس والبوي فريند والجيرل فريند والجوز والزوجة والقرايب ):

اليوم جميل ومنعش وأخر حلاوة.. حاول تستفيد من الموضوع دة ومتكسلش وتكمل نوم..حاول تخرج وتنبسط وتبص للعالم بنظرة تفاؤل.

برج العقرب عملياً 

( الشغل والمذاكرة والتخطيط لبكرة ):

مش لازم تتناقش النهاردة ف اي تفاصيل انتا مش عاوز تتناقش فيها ولا مهم تاخد قرارات ولا تروح ف اي حتة انتا مش عاوز تروحها..عادي..كل حاجة ممكن تتأجل..

برج العقرب صحياً 

( نفسيا وجسمانيا وكل مايخص طاسة المزاج ):

صحتك كويسة بس جواك ميل للنكد مهم تقاومه عشان مينخربش ف صواميل نفسيتك ويفكها فجأة..

تعرف على توافق برج العقرب مع باقي الأبراج النهاردة:

متوافق مع الابراج الغجرية والبرمائية والبربرية والكتكوتية..

إعرف حظك اليوم برج القوس بالتفصيل السبت 16/12/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إحترس من الضباب سواء ع الطريق وإنتا سايق عربيتك أو وانتا سايق قلبك.. ف الحالتين خلي بالك وسوق على مهلك وبلاش سربعة.. اما لو راكب اتوبيس او ميكروباس ف انتا مش مسئول عن اي حاجة ف حياتك..انتا مجرد ضحية للظروف ولسواق الميكروباس..مش أكتر.

برج القوس عملياً 

( الشغل والمذاكرة والتخطيط لبكرة ):

خد بالك من الحاجات البسيطة لأنها هي اللي ممكن تعمل مشاكل النهاردة مش الحاجات الكبيرة..كمان متقلقش..وقت اللزوم هتفتكر كل حاجة انتا ذاكرتها..متقلقش..

برج القوس صحياً 

( نفسيا وجسمانيا وكل مايخص طاسة المزاج ):

صحتك تمام وكويسة وزي الفل سواء انتا او ميكروباتك..

تعرف على توافق برج القوس مع باقي الأبراج النهاردة:

متوافق مع الابراج الفركتوزية والبربوشية والهوائية..

إعرف حظك اليوم برج الجدي بالتفصيل السبت 16/12/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً 

( الكراش والإكس والبوي فريند والجيرل فريند والجوز والزوجة والقرايب ):

طالما ولعت ف الفتيل بكامل إرادتك يبقى متزعلش لما تشوف إنفجار.. دة منطقي وطبيعي يحصل..مستغرب ليه؟.

برج الجدي عملياً 

( الشغل والمذاكرة والتخطيط لبكرة ):

خد بالك من مصلحتك عشان محدش هياخدلك باله منها غير نفسك..خد بالك كويس وخليك ناصح.. مش فهلوي..في فرق كبير جدا بين الاتنين

برج الجدي صحياً 

( نفسيا وجسمانيا وكل مايخص طاسة المزاج ):

صحتك كويسة بس انتا في ف حياتك حد عيان وممكن يعديك..ابعد عنه ومتخاطرش..

تعرف على توافق برج الجدي مع باقي الأبراج النهاردة:

متوافق مع الابراج المرمرية والحنكوشية والمائية..

إعرف حظك اليوم برج الدلو بالتفصيل السبت 16/12/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً 

( الكراش والإكس والبوي فريند والجيرل فريند والجوز والزوجة والقرايب ):

إيقاعك البهلواني العجيب هيفيدك النهاردة خصوصا وانك محاط بسخافات كتير محتاجة اللي بيعرف يقفز على الحواجز والصعاب ويديها أحلى امل كداب.

برج الدلو عملياً 

( الشغل والمذاكرة والتخطيط لبكرة ):

مش لازم تزعل نفسك على كل حاجة بتحصل حواليك وتشيل همها..حاول تكبر دماغك شوية وتقلل من التركيز ف التفاصيل والا هتتعب جدا كدة..

برج الدلو صحياً 

( نفسيا وجسمانيا وكل مايخص طاسة المزاج ):

نأمل ف يوم أفضل ف حياة أفضل ان شاء الله عشان واضح ان الحياة دي مش مظبوطة على مقاسنا او الكوكب دة محتاج يترجلش الاول قبل الاستعمال..مسيرنا نعرف ومسير كل حاجة تبان..

تعرف على توافق برج الدلو مع باقي الأبراج النهاردة:

متوافق مع الابراج الدخانية والمستحية والفرفورية والنارية..

إعرف حظك اليوم برج الحوت بالتفصيل السبت 16/12/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً 

( الكراش والإكس والبوي فريند والجيرل فريند والجوز والزوجة والقرايب ):

حاول تنقي صراعاتك اليوم ومتخشش ف مواجهة مع أي قوته ممكن تبططك او تعلم عليك لأنك انتا مش ناقص.. خليك عاقل ونقي خناقاتك النهاردة كويس جدا

برج الحوت عملياً 

( الشغل والمذاكرة والتخطيط لبكرة ):

العقل والحكمة النهاردة انتا محتاجهم ف حياتك بشكل حقيقي مش تمثيل ولا كدة وكدة زي مانتا متعود..النهاردة يوم مختلف ونواتج تصرفاتك مسيرها هتحاسبك ف خد بالك كويس من نفسك وإتصرف صح.

برج الحوت صحياً 

( نفسيا وجسمانيا وكل مايخص طاسة المزاج ):

إهتم بنفسك وقص ضوافرك وسرح شعرك وبلاش تقعد منكوش النهاردة عشان في تفتيش جايلك من كوكب تاني..

تعرف على توافق برج الحوت مع باقي الأبراج النهاردة:

متوافق مع الابراج البسبوسية واللولبية والفهلوية والترابية..